දශක තුනකට අධික කාලයක් පුරා විශිෂ්ට සුව සේවාවක් සැපයීම වෙනුවෙන් කැප වී කටයුතු කල සුවසෙවන රෝහල මහනුවර ප්‍රදේශයේ කීර්තිමත්ම පෞද්ගලික රෝහලක් වන අතර 2021 වසරේදී කීර්තිමත් මූල්‍ය සමාගමක් වන Commercial Credit and Finance PLC සමාගම විසින් අත්පත් කරගැනීමෙන් පසුව රෝහලේ සේවාවන්, පහසුකම් සහ තාක්ෂණික හැකියාවන් තව දුරටත් වැඩිදියුණු කිරීමට කළමනාකාරීත්වය කටයුතු කරමින් සිටී. මෙම ආයෝජනයන්ගෙන් සැළකිය යුතු කොටසක් ප්‍රදේශයේ ප්‍රමුඛතම අක්ෂි සත්කාර සේවාව වන සුවසෙවන අක්ෂි සේවා මධ්‍යස්ථානයේ සංවර්ධනය වෙනුවෙන් යෙදවීමට කළමනාකාරීත්වය කටයුතු කර තිබීම සුවිශේෂී කරුණකි.
“දශක ගණනාවක් පුරා මහනුවර ප්‍රදේශෙය් අති විශාල ජනකායකට සේවය සැපයූ සුවසෙවන අක්ෂි මධ්‍යස්ථානය පරම්පරා ගණනාවක විශ්වාසය දිනූ තැනක්. මේ විශිෂ්ටත්වය කෙරෙහි බලපෑ ප්‍රධානතම සාධකය වන්නේ ඒ වෙනුවෙන් අපි නිරන්තරයෙන්ම කැප වී ක්‍රියා කිරීමයි. නව ආයෝජන සිදු කරමින් අක්ෂි සේවා මධ්‍යස්ථානයට නව පහසුකම් එක් කිරීම අපේ ඒ කැපවීමට හොඳ උදාහරණයක්. ඉදිරියේදී දෘෂ්ටිවිතානය ආශ්‍රිත සැත්කම් සිදු කිරීම සඳහා අවශ්‍ය කටයුතු අපි මේ වන විට සම්පාදනය කරමින් සිටිනවා. එනිසා තව දුරටත් රෝගීන්ට දෘෂ්ටිවිතානය ආශ්‍රිත සැත්කම් සඳහා කොළඹට යොමු වීමට අවශ්‍ය නොවනු ඇති.” යැයි මේ පිළිබඳව අදහස් දක්වමින් සුවසෙවන රෝහලේ ප්‍රධාන විධායක නිලධාරී නලීන් පැස්කුවෙල් මහතා පැවසීය.
ZEISS LUMERA® 700 ශල්‍ය උපකරණය සියලුම අක්ෂි විශේෂතාවයන් සඳහා නිර්මාණය කර ඇති අතර ශල්‍යකර්ම කාර්යක්ෂමතාවය වැඩි දියුණු කිරීම ඉලක්ක කරගත් විශේෂාංග ගණනාවක් එය සතු වේ. එහි සලකුණු රහිත IOL පෙළගැස්වීම සහ අභ්‍යන්තර අක්ෂි කාච පෙළගැස්වීම ඉතා සරල වන අතර ක්‍රියාකාරී OCT3 රූපකරණය හරහා සැත්කම් අතරතුර තත්‍ය කාලීන රූප ලබා දීමට ඊට හැකියාව ඇත. ZEISS Cataract Suite නිෂ්පාදන සමූහයට අයත් අන්වීක්ෂයක් වශයෙන් එම නිෂ්පාදන සමූහයට අයත් අනෙකුත් තාක්ෂණික උපාංග සමඟ මනා සංකලනයෙන් ක්‍රියා කිරීමට ඊට හැකියාව ඇත.
“සුවසෙවන අක්ෂි මධ්‍යස්ථානයට එක් කළ නව ශල්‍යාගාරය සහ ZEISS LUMERA® 700 ශල්‍ය උපකරණය හරහා මහනුවර ප්‍රදේශයේ අක්ෂි වෛද්‍ය සේවාවේ ප්‍රමිතිය තව දුරටත් ඉහළට එසවීමට අපට හැකි වී තිබෙනවා. අඛණ්ඩවම සුවසෙවන අක්ෂි මධ්‍යස්ථානයට නව තාක්ෂණික උපාංග සහ පහසුකම් එක් කිරීම හරහා මහනුවර ප්‍රදේශයේ ජනතාවට මහනුවරදී ලැබිය හැකි උසස්ම සේවාව ලබා දීමට හැකි වීම අපට විශාල සතුටක්.” යැයි සුවසෙවන රෝහලේ ව්‍යපාර සංවර්ධන ප්‍රධානී ශ්‍රීමත් වැලිවිට මහතා මේ පිළිබඳව අදහස් දක්වමින් පැවසීය.
සුවසෙවන අක්ෂි සේවා මධ්‍යස්ථානය සිය විශේෂඥ අක්ෂි වෛද්‍ය පිරිස, ප්‍රවීණ කාර්යමණ්ඩලය, අති නවීන තාක්ෂණය සහ උසස්ම තත්ත්වයේ පහසුකම් සමඟින් සේවාලාභීන් හට ලැබිය හැකි ඉහළම සේවාව ලබා දීමට කැපවීමෙන් කටයුතු කරන අතර සුවසෙවන අක්ෂි සේවා මධ්‍යස්ථානය සම්බන්ධයෙන් සුවිශේෂී කරුණක් වන්නේ සෑම සේවාලාභියෙක්ටම පෞද්ගලිකව අවධානය යොමු කිරීමට ඇති හැකියාවයි.
මහනුවර නගර මධ්‍යයේ පිහිටා තිබෙන අති නවීන පහසුකම් වලින් සමන්විත සුවසෙවන රෝහල ප්‍රදේශයේ කීර්තිමත් සහ ප්‍රමුඛතම පෞද්ගලික රෝහලක් වන අතර සියලුම උපාංගවලින් සමන්විත, වායුසමීකරණය කරන ලද සුවපහසු කාමර 120කට වැඩි ප්‍රමාණයක් සුවසෙවන රෝහල තුළ රෝගීන් වෙනුවෙන් වෙන් වී පවතී. මෙම සියලුම පහසුකම් සහ රෝහල වෙනුවෙන් කැප වී සිටින විශිෂ්ට වෛද්‍ය, හෙද, තාක්ෂණික වෘත්තිකයින් පිරිස ද සමඟින් ඉදිරියටත් සේවාලාභීන්ගේ සුවය සහ පහසුව වෙනුවෙන් සංවර්ධන කටයුතු සිදු කිරීමට සුවසෙවන රෝහලේ කළමනාකාරීත්වය අපේක්ෂා කරයි.
The post රුපියල් මිලියන සියයක ආයෝජනයකින් සුවසෙවන අක්ෂි සේවා මධ්‍යස්ථානයට නව ශල්‍යාගාරයක් සහ නවතම ZEISS LUMERA® 700 ශල්‍ය උපකරණයක් appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka