මැදපෙරදිග ඇවිලෙයි. කොළඹ කොටස් වෙළෙඳපොළ ගිලෙයි

අද (13) දිනයේ දී කොළඹ කොටස් වෙළෙඳපොළ මිල දර්ශකවල කැපීපෙනෙන කඩාවැටීමක් වාර්තා විය.

දිනයේ ගනුදෙනු අවසානයේ දී සියලු කොටස් මිල දර්ශක අගය පෙර දිනයට සාපේක්ෂව ඒකක 234.37කින් හෙවත් 1.33%කින් පහළ ගිය අතර S&P SL20 දර්ශකය ඒකක 81.09 කින් හෙවත් 1.54% කින් පහළ ගියේය.

ඒ අනුව දිනයේ දී ගනුදෙනු අවසානයේ දී සියලු කොටස් මිල දර්ශක අගය ඒකක 17,427.08 ක් හා S&P SL20 දර්ශක අගය ඒකක 5,193.92 ක් ලෙසින් සටහන් වුණි.

ප්‍රධාන වශයෙන් බැංකු සමාගම් ඇතුළු ප්‍රධාන මිල දර්ශක වෙත වැඩි බර තැබීමක් ඇති සමාගම් ගණනාවකම කොටස් මිල ගණන් දිනය තුළ පහළ යාම, සියලු කොටස් මිල දර්ශකයේ කඩා වැටීමට බෙහෙවින් බලපා තිබුණි. ඒ අතුරින් HNB, DFCC හා සම්පත් යන බැංකු සමාගම්වල කොටස් මිල පහළ යාම් ප්‍රධාන වශයෙන් හේතු වූ අතර මෙලස්ටාකෝප් හා ජෝන් කීල්ස් හෝල්ඩිංග්ස් යන සමාගම්වල කොටස් මිල පහළ යාම්ද සියලු කොටස් මිල දර්ශකයට දැඩි සෘණාත්මක බලපෑමක් එල්ල කර තිබුණි. අද දින ලැයිස්තුගත සමාගම් 173කම මිල ගණන් ඊයේ දිනයට සාපේක්ෂව පහළ ගොස් තිබීම විශේෂත්වයකි.

මේ වන විට ඊශ්‍රායලය හා ඉරානය අතර මතුව ඇති යුද ගැටුම් හේතුවෙන් ගෝලීය අස්ථායී තත්ත්වයක් උද්ගතව ඇති අතර ලොව පුරා කොටස් වෙළෙඳපොළ නිරීක්ෂණයේ දී ඒ බව මනාව තහවුරු වනු ඇත. එම බලපෑමෙන් මිදී සිටීමට ශ්‍රී ලංකාව වැනි කුඩා වෙළෙඳපොළකට කිසිසේත්ම අවස්ථාවක් නොමැති බව අද දින කොළඹ කොටස් වෙළෙඳපොළ හැසිරීමෙන් පිළිබිඹු වන බව වෙළෙඳපොළ විශේෂඥයින්ගේ අදහසයි.

අද දින ආසියානු කලාපයේ සියලු ප්‍රධාන කොටස් වෙළෙඳපොළ පහත දැක්වෙන පරිදි කැපීපෙනෙන පහළ යාමකට ලක්ව තිබුණි.

GIFT NIFTY (-0.78%)

Nikkei 225 (-0.90%)

Straits Times (-0.28%)

Hang Seng (-0.60%)

Taiwan Weighted (-0.97%)

KOSPI (-0.88%)

SET Composite (-0.53%)

Jakarta Composite(-0.53%)

Shanghai Composite (-0.76%)

The post මැදපෙරදිග ඇවිලෙයි. කොළඹ කොටස් වෙළෙඳපොළ ගිලෙයි appeared first on Adaderana Biz Sinhala | Sri Lanka Business News.