දින දෙකක දී රු. බිලියන 386 ක් කොටස් වෙළෙඳපොළට අහිමි වෙයි

කොළඹ කොටස් වෙළෙඳපොළ ක්‍රමික පරිහානිය තවදුරටත් තීව්‍ර කරමින් සියලු කොටස් මිල දර්ශක අගය අද (29) දිනය තුළ දී ඒකක 494.75 ක පහළ යාමක් වාර්තා කරන ලදී. මෙය පෙර දිනයට සාපේක්ෂව 4.88% ක කඩා වැටීමක් වන අතර දිනය අවසානයේ දී සියලු කොටස් මිල දර්ශකය ඒකක 9,657.55 ක් ලෙසින් සටහන් ව තිබුණි.

2021 ඔක්තෝබර් 25 දිනෙන් පසු සියලු කොටස් මිල දර්ශකය ඒකක දසදහසේ සීමාවෙන් මෙපිටට පැමිණි පළමු අවස්ථාව මෙයයි.

ඊයේ (28) දිනයේ දී ද සියලු කොටස් මිල දර්ශකයේ ඒකක 313.03 ක පහළ යාමක් දක්නට ලැබුණි.

මේ අතර S&P SL20 දර්ශකය ඒකක 167.12 ක හෙවත් 4.77% ක පහළ යාමක් අද දින වාර්තා කළ අතර දිනය අවසානයේ දී එහි අගය ඒකක 3,338.03 ක් ලෙසින් සටහන් වුණි.

මේ අතර S&P SL20 දර්ශකය පෙර දිනයට වඩා 5% ක ප්‍රමාණයකින් පහළ ගිය හෙයින් දිනයේ ගනුදෙනු අතරවාරයේ දී පස්වරු 1.10 සිට පස්වරු 1.40 දක්වා මිනිත්තු 30 ක කාලයක් සඳහා තාවකාලිකව ගනුදෙනු අත්හිටුවීමක් ද අද දින සිදුවුණි.

රු. බිලියන 2.70 ක ගනුදෙනු පිරිවැටුමක් අද දින වාර්තා වී තිබේ.

එහිදී රු. බිලියන 2,47 ක් දේශීය මිල දී ගැනීම් ලෙසත්, රු. බිලියන 2.61 ක් දේශීය විකිණුම් ලෙසත් සටහන් වූ අතර රු. මිලියන 231.52 ක් විදේශීය මිල දී ගැනීම් හා රු. මිලියන 83.83 ක් විදේශීය විකිණුම් ලෙසින් වාර්තා වුණි.

මේ අතර අද (29) දිනය අවසානයේ දී කොළඹ කොටස් වෙළෙඳපොළ සමස්ත වෙළෙඳපොළ ප්‍රාග්ධනීකරණ වටිනාකම රු. බිලියන 4,166.02 ක් ලෙසින් දැක්වෙන අතර පසුගිය සිකුරාදා (25) දින ගනුදෙනු අවසානයේ දී එම අගය දැක්වුණේ රු. බිලියන 4,552.70 ක් ලෙසයි.

මේ අනුව ඊයේ (28) සහ අද (29) යන දෙදින තුළ දී පමණක් රු. බිලියන 386.67 ක් කොළඹ කොටස් වෙළෙඳපොළට අහිමි වී තිබේ.

The post දින දෙකක දී රු. බිලියන 386 ක් කොටස් වෙළෙඳපොළට අහිමි වෙයි appeared first on Adaderana Biz Sinhala | Sri Lanka Business News.