ආයෝජකයින් පසුබසී. දෛනික පිරිවැටුම බිලියන භාගයෙන් පහළට

දීර්ඝ සතිඅන්තයකට පසු කොළඹ කොටස් වෙළෙඳපොළ, අද (27) දිනයේ දී ගනුදෙනු සඳහා විවෘත විය. වෙසක් පොහොය නිවාඩුව සහ සති අන්තය හේතුවෙන් මෙලෙස කොටස් වෙළෙඳපොළ අද දින විවෘත වූයේ දින 4කට පසුවය.

අද දිනය තුළ සියලු කොටස් මිල දර්ශක අගය ඒකක 37.52 කින් පහළ ගිය අතර S&P SL20 දර්ශකය ඒකක 16.44 කින් පහළ යන ලදී.

ඒ අනුව දිනයේ ගනුදෙනු අවසානයේ දී සියලු කොටස් මිල දර්ශග අගය ඒකක 12,311.32 ක් ලෙසත් S&P SL20 දර්ශක අගය ඒකක 3,650.45 ක් ලෙසත් සටහන් විය.

දිනය තුළ දක්නට ලැබුණු සුවිශේෂී සිදුවීම වූයේ අද දින ගනුදෙනු පිරිවැටුම රු. මිලියන 494.35 ක් තරම් සාපේක්ෂව ඉතා පහළ අගයයක් ගැනීමයි.

එහිදී දේශීය මිල දී ගැනීම් රු. මිලියන 476 ක් හා දේශීය විකිණුම් රු. මිලියන 484 ක් ලෙසින් වාර්තා විය.

අද දිනයේ දී විදෙස් ආයෝජකයින්ගේ සහභාගීත්වය ඉතා අවම මට්ටමක පැවති අතර එහිදී විදේශීය මිල දී ගැනීම් රු. මිලියන 17 ක් හා විදේශීය විකිණුම් රු. මිලියන 9 ක් තරම් අතිශය පහළ අගයයක් ගන්නා ලදී.

The post ආයෝජකයින් පසුබසී. දෛනික පිරිවැටුම බිලියන භාගයෙන් පහළට appeared first on Adaderana Biz Sinhala | Sri Lanka Business News.