මේ සඳහා හේතුව ලෙස මහ බැංකුව පෙන්වා දී ඇත්තේ විදුලි ගාස්තු සහ දේශීය ඉන්ධන මිල ගණන් සඳහා පෙර සිදු කළ සංශෝධන සහ ආර්ථිකයේ අඩු ඉල්ලුම් පීඩන මධ්‍යයේ නිතර මිල උච්ඡාවචන සහිත ආහාරවල මිල ගණන් අඩු වීමයි. ආර්ථිකයේ යටිදැරි ඉල්ලුම් තත්ත්ව පිළිබිඹු කරන මූලික උද්ධමනය ද අඩු වී ඇත.
ප්‍රධාන වශයෙන් ඉන්ධන මිල ගණන් සහ ප්‍රවාහන වියදම් විශාල වශයෙන් පහළ යෑම සහ නිතර මිල උච්ඡාවචන සහිත ආහාර මිල ගණන් අඩු වීම හේතුවෙන් ඉදිරි මාසවලදී මතුපිට උද්ධමනය පෙර පුරෝකථනවලට වඩා තීව්‍ර අවධමනයක් වාර්තා කරනු ඇතැයි නවතම පුරෝකථන මගින් පෙන්නුම් කරයි.
කෙසේ වෙතත් මහ බැංකුව පවසන්නේ, 2025 වසරේ මැද භාගය වනවිට උද්ධමනය ධන අගයක් ගනු ඇතැයි අපේක්ෂා කරනු ලබන බවයි. එසේම සුදුසු ප්‍රතිපත්තිමය ක්‍රියාමාර්ගවල සහාය ලබමින් මැදි කාලීනව එහි ඉලක්කගත සියයට 5ක මට්ටම කරා ක්‍රමයෙන් ළඟා වීමට හැකිවෙනු ඇතැයි යන්න මහ බැංකුවේ අපේක්ෂාව බව වැඩිදුරටත් සඳහන් වේ.
ඉදිරි මාස කිහිපය තුළදී මූලික උද්ධමනය තවදුරටත් අඩු වනු ඇතැයි පුරෝකථනය කර ඇති අතර, ඉන්පසුව මූලික උද්ධමනයේ මෙම මන්දගාමිවීමේ ප්‍රවණතාව වෙනස් වෙමින් මැදි කාලීනව ස්ථායි වනු ඇතැයි අපේක්ෂා කරන බවයි මහ බැංකුව පවසන්නේ.
මේ අතර සැලකිය යුතු කාලයක් පුරාවට උද්ධමනය සෘණ මට්ටමක පැවතීම, ආර්ථිකයට අහිතකර ලෙස බලපාන්නේදැයි යනුවෙන් අද දෙරණ කළ විමසීමකට ප්‍රතිචාර දක්වමින් ශ්‍රී ලංකා මහ බැංකු අධිපති ආචාර්ය නන්දලාල් වීරසිංහ මහතා පැවසුවේ පවතින වාතාවරණය තුල එවැනි අහිතකර බලපෑමක් සිදුනොවනු ඇති බවයි.
“දීර්ඝ කාලීනව පවතින්නේ නම් අවධමනය අහිතකර තත්ත්වයක් වනවා, නමුත් අපි එන්නේ ඉතාමත් අර්බුදකාරී තත්ත්වයක. උද්ධමනය 70%ක් දක්වා ඉහළ ගිහිල්ලා. ජීවන වියදම ඉතාමත් ඉහළ ගිහිල්ලා. වසර දෙකක කාලයක් ගත්තොත් 80%ක් 90%ක් විතර වැඩි වෙලා. ආහාර උද්ධමනය 100% කට වඩා වැඩි වෙලා තිබුන වාකතාවරණයක. ඒ වගේ ඉතාම ඉහළම මට්ටමක Cost වලින් වැඩි වුණ යම් කිසි කාලයක අවධමනය කියන එක අපි දක්නේ, යම් කිසි Correction එකක් විදිහට. ඒ වගේ එකපාරට ගොඩක් මිල වැඩි වුණාම යම් කිසි ආකාරයකට අඩු වෙලා තමයි සාමාන්‍ය තත්ත්වයට පත් වෙන්න ඕන. ඒක සාමාන්‍ය ක්‍රමවේදයක්. ඒ නිසා මේ වගේ අවධමන තත්ත්වයක් සෘණ උද්ධමනයක් කියන එක යම්කිසි කාලයක් පවතින එක මම හිතන්නේ ඒක ලොකු හානියක් නෙවෙයි ආර්ථිකයට. මොක ද විශාල බඩු මිල වැඩි වීමකට පස්සේ තමයි මේක එන්නේ“, යනුවෙන් මහ බැංකුව අධිපතිවරයා මෙහිදී පැවසීය.
අද (27) පෙරවරුවේ පැවති මුදල් ප්‍රතිපත්ති විවරණය දැනුම් දීමේ මාධ්‍ය හමුවේ දී මහ බැංකුව අධිපති ආචාර්ය නන්දලාල් වීරසිංහ මහතා මේ පැහැදිලි කළ අතර අධිපතිවරයා මේ සම්බන්ධයෙන් කළ සම්පූර්ණ ප්‍රකාශය පහතින් දැක්වේ.
The post අවධමනයක් වූ උද්ධමනය ආර්ථිකයට අහිතකර ද? appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka