‘ෆොන්ටෙරා ශ්‍රී ලංකා‘ ගැන තීරණයක්

ගෝලීය සමාගමක් වන Fonterra Co-operative Group Ltd විසින් සිය උපාය මාර්ගික දිශානතියේ පියවර වෙනසක් සිදුකිරීමට තීරණය කර ඇති බව නිවේදනය කර සිටී.

එහි පියවරක් ලෙසින් Fonterra Co-operative Group Ltd සිය ගෝලීය පාරිභෝගික ව්‍යාපාර කිහිපයකින් පූර්ණ හෝ අර්ධ වශයෙන් ඉවත් වීමට තීරණය කර ඇත. එම ව්‍යාපාර අතරට සිය සමෝධානික ව්‍යාපාර වන Fonterra Oceania සහ Fonterra Sri Lanka ද ඇතුළත් බව Fonterra Co-operative Group Ltd  වැඩිදුරටත් සඳහන් කරයි.

ඉහළ වටිනාකමක් ඇති නව්‍ය කිරි අමුද්‍රව්‍ය සපයන ලොව ප්‍රමුඛතම සැපයුම්කරුවෙකු ලෙස සිය ස්ථාවරය තවදුරටත් ශක්තිමත් කිරීමට තමන් කැප වී සිටින බව Fonterra Co-operative Group Ltd මෙහිදී අවධාරණය කරයි.

මේ සම්බන්ධයෙන් අදහස් දක්වමින් Fonterra Co-operative Group Ltd හි සභාපති Peter McBride පවසන්නේ මෙම සුවිශේෂී පියවර සිය කිරි ගොවියන්ට සහ ඒකක හිමියන්ට දිගුකාලීන වටිනාකමක් වර්ධනය කිරීම සඳහා උපකාරී වනු ඇති බවයි.

මේ අතර Fonterra Co-operative Group Ltd ප්‍රධාන විධායක නිලධාරී Miles Hurrell මේ සම්බන්ධයෙන් පවසන්නේ සිය ගෝලීය පාරිභෝගික ව්‍යාපාර මෙන්ම Fonterra Oceania හා Fonterra Sri Lanka යන සමෝධානික ව්‍යාපාරවලින් ඉවත්වීම සඳහා මේ වන විය විකල්ප ගවේෂණය සිදුකරමින් සිටින බවයි.  මෙම පියවර සිය කිරි ගොවීන් සමඟ ශක්තිමත් සබඳතාවක් තහවුරු කරගැනීමටත්, නම්‍යශීලී නිෂ්පාදන හා සැපයුම්දාම ස්ථාවරයක් සමඟ උපායමාර්ගික ගනුදෙනුකරුවන් සමඟ ගැඹුරු සම්බන්ධතාවක් පවත්වා ගැනීමටත් උපකාරී වනු ඇති බව ඔහු වැඩිදුරටත් සඳහන් කරයි.

The post ‘ෆොන්ටෙරා ශ්‍රී ලංකා‘ ගැන තීරණයක් appeared first on Adaderana Biz Sinhala | Sri Lanka Business News.