2005 වසරේ සිට මේ දක්වා අවස්ථා දෙකකදී හැර අනෙක් සෑම තරගාවලියකදීම අවසන් තරගයට සුදුසුකම් ලැබීමට සෙලාන් බැංකුවේ මේස පන්දු කණ්ඩායම සමත් විය. මෙවර තරගාවලියේදී 3-1 ක් ලෙස ඔවුන් අතින් පරාජයට පත්වූයේ MAS Holdings කණ්ඩායමයි. ඊට පෙර, තරගාවලියේ අර්ධ අවසන් වටයේදී 99X Technologies කණ්ඩායම 3-2 ක් ලෙස පරාජයට කිරීමට සෙලාන් බැංකු කණ්ඩායමට හැකියාව ලැබිණි.
අවසන් තරගයේදී මෙන්ම තරගාවලිය පුරාම සෙලාන් බැංකු කණ්ඩායමේ ජයග්‍රහණය වෙනුවෙන් කේන්ද්‍රීය භූමිකාවක් ඉටුකළ ක්‍රීඩකයා වූයේ චලිත රංජනයි. සිව් වරක් ජාතික මේසපන්දු ශූරතාව දිනා ඇති, පොදු රාජ්‍ය මණ්ඩලීය තරගාවලියකදී ලෝකඩ පදක්කමක්ද ලැබූ චලිත, තරගාවලිය පුරාම ඒකල කාණ්ඩ සහ යුගළ කාණ්ඩ (සසික විජේසූරිය සමග) යටතේ තරග වදිමින් අපරාජිතව සිටීමට සමත් විය. අවසන් තරගයේදී MAS Holdings හි උපසේන සහ වීරසිංහ සමග පැවති තරගය 3-2 ක් ලෙස ජයගැනීමට චලිත රංජන සහ සසික විජේසූරිය සමත් වූ අතර, කේවල කාණ්ඩයේදී 3-0 ක් ලෙස ජයම්පති රත්නායක පරාජය කිරීමට චලිත රංජනට හැකියාව ලැබිණි. ඊට පෙර ජයම්පති රත්නායක අතින් 0-3 ක් ලෙස පරාජයට පත් වූයේ චමිත් ඩිල්ශාන් ය. මීට අමතරව මිහිඳු උපසේන සමග පැවති තරගය 3-2 ක් ලෙස ජයගැනීමට සසික විජේසූරිය සමත් විය.
ඉහත සඳහන් ජයග්‍රහණවලට අමතරව 70 වන වෙළඳ සේවා ටේබල් ටෙනිස් තරගාවලියේදී විවෘත පිරිමි කේවල කාණ්ඩය (ඔහු වෙළඳ සේවා පිරිමි ශූරතාව ජයගත් 10 වැනි අවස්ථාව මෙයයි), මාස්ටර්ස් කේවල සහ විවෘත පිරිමි යුගල අංශ ජයගැනීමටද චලිත රංජනට හැකියාව ලැබිණි. ඔහු ලබාගත් ජාත්‍යන්තර ජයග්‍රහණ අතර ප්‍රධාන තැනක් ගන්නේ 2004 පොදු රාජ්‍ය මණ්ඩලීය ක්‍රීඩා තරගාවලියේදී ඔහු ලබාගත් ලෝකඩ පදක්කමයි. ශ්‍රී ලාංකික මේස පන්දු ක්‍රීඩකයෙකු මේ දක්වාම එම තරගාවලිය තුළ වාර්තා කළ ඉහළම පදක්කම එය වීම විශේෂත්වයකි. මීට අමතරව ඔහු 1999, 2003 සහ 2010 යන වසරවල දකුණු ආසියානු තරගාවලි වලදීත්, 2017, 2018 සහ 2019 වසරවල නවසීලන්ත විවෘත තරගාවලි වලදීත් ජයග්‍රහණ වාර්තා කර තිබේ. එමෙන්ම 2019 වසරේ වෙළඳ සේවා තරගාවලියේදී විශිෂ්ටතම මේස පන්දු ක්‍රීඩකයා බවට පත් වූ ඔහු, 2007 සහ 2008 වසරවල ජාතික ක්‍රීඩා තරගාවලි වලදීද විශිෂ්ටතම මේස පන්දු ක්‍රීඩකයා ලෙස ඇගයීමට ලක් විය. සිව් වරක් ජාතික ශූරතාව දිනා ඇති චලිත රංජන 1999 සිට 2004 දක්වා සහ 2008 සිට 2010 දක්වා ශ්‍රී ලංකාවේ අංක එකේ මේස පන්දු ශූරයා ලෙස ශ්‍රේණිගත වීමට සමත් විය.
තරගාවලිය පුරාම චලිත රංජන ඇතුළුව සෙලාන් බැංකු කණ්ඩායමේ සියලුම දෙනා කණ්ඩායම් හැඟීමෙන් යුතුව තරග වැදුණු අතර, චලිත රංජනට අමතරව සසික විජේසූරිය, උදිත කලුආරච්චි සහ චමිත් ඩිල්ශාන් කණ්ඩායමේ ජයග්‍රහණ වෙනුවෙන් විශාල දායකත්වයක් ලබාදුන්හ. සසික විජේසූරිය යනු වසර 20 කට අධික කාලයක් සෙලාන් බැංකුවේ මේස පන්දු කණ්ඩායමේ ජයග්‍රහණ වෙනුවෙන් උර දෙමින් සිටින සුවිශේෂී ක්‍රීඩකයෙකි. මෙවරත් ඔහු තරගාවලියේ අවසන් වටයේදී විශිෂ්ට දස්කම් දැක්වීමට සමත් විය.
2003 සිට 2005 දක්වා සෙලාන් බැංකුවේ මේස පන්දු කණ්ඩායමේ නායකයා ලෙසද කටයුතු කළ උදිත කලුආරච්චි එම කණ්ඩායම සහභාගී වූ ප්‍රධාන තරගාවලි සියල්ලෙහිදීම කණ්ඩායමේ සාර්ථකත්වය වෙනුවෙන් කේන්ද්‍රීය භූමිකාවක් ඉටු කර තිබේ. ක්‍රීඩකයෙකු මෙන්ම සම්බන්ධීකාරකවරයෙකු ලෙසද කටයුතු කරන උදිත, සෙලාන් බැංකුවේ මේස පන්දු කණ්ඩායමේ ආරම්භයේ සිට මේ දක්වා ගෙවුණු වසර 25 පුරාවටම එම කණ්ඩායම නියෝජනය කර ඇති අතර, දැනට එම කණ්ඩායමේ සිටින වඩාත්ම ප්‍රවීණ ක්‍රීඩකයා ඔහුය. කණ්ඩායමේ නැගී එන තරුව මෙන්ම වයසින් අඩුම ක්‍රීඩකයා වන චමිත් ඩිල්ශාන්, අනාගතයේදී මේස පන්දු ක්‍රීඩා ක්ෂේත්‍රයේ විශිෂ්ටයෙකු බවට පත්වීමේ හැකියාව තමන් සතු බව දැනටමත් පෙන්නුම් කර තිබේ. මෙම ක්‍රීඩකයන්ගේ හැකියාව, දක්ෂතාව හා කැපවීම මෙන්ම, ඔවුන්ගේ ක්‍රීඩා කටයුතු වෙනුවෙන් සෙලාන් බැංකුව දක්වන සහයෝගය සහ, වෘත්තීය හා පෞද්ගලික ජීවිත අතර සමබරතාව පවත්වා ගැනීම සඳහා බැංකුවෙන් ලැබෙන අත්වැල මෙම ජයග්‍රහණවලට පිටුබලය සැපයූ තවත් ප්‍රධානතම සාධකයක් ලෙස හැඳින්විය හැක.
ඡායාරූපය: (වමේ සිට) චමිත් ඩිල්ශාන් (විකුණුම් ඒකකය), ශෂික විජේසූරිය (බොගවන්තලාව ශාඛාව), වරුණ කොග්ගලගේ (නියෝජ්‍ය සාමාන්‍යාධිකාරී – අභ්‍යන්තර විගණන/ සභාපති – සෙලාන් ක්‍රීඩා සමාජය), රමේෂ් ජයසේකර (අධ්‍යක්ෂ/ ප්‍රධාන විධායක නිලධාරී, සෙලාන් බැංකුව), චලිත රංජන (සෙලාන් කාඩ්පත් මධ්‍යස්ථානය) සහ නලින් කරුණාරත්න (ප්‍රධාන කළමනාකරු – අලෙවි/ලේකම් – සෙලාන් ක්‍රීඩා සමාජය) යන මහත්වරුන්. [උදිත කලුආරච්චි මහතා (භාණ්ඩාගාර අංශය) ඡායාරූපයෙහි නොමැත]
The post සෙලාන් බැංකුවේ මේස පන්දු කණ්ඩායම වෙළඳ සේවා A කාණ්ඩයේ ශූරතාව යළි තමන් සතු කරගනී appeared first on Adaderana Biz Sinhala | Sri Lanka Business News.
Source From biz.adaderana
Author: Bizweb2 Bizweb2
#SriLanka #News #lka