ජාත්‍යන්තර ස්වෛරීත්ව බැඳුම්කර හුවමාරුව දියත් කරන බව ශ්‍රී ලංකාව නිල වශයෙන් නිවේදනය කරයි

ශ්‍රී ලංකාවේ විදෙස් ණ්‍ය ප්‍රතිව්‍යූහගතකරණය කිරීමේ ක්‍රියාවලියේ දී ස්වෛරී ණය තිරසාරත්වය යථා තත්ත්වයට පත් කිරීම වෙනුවෙන් ජාත්‍යන්තර ස්වෛරී බැඳුම්කර ප්‍රතිව්‍යූහගත කිරීම ක්‍රියාත්මක කිරීම පිළිබඳව ශ්‍රී ලංකා රජයේ නිල ආරාධනය අද දින ප්‍රකාශයට පත් කරන ලදී.

ඒ අනුව 2024 නොවැම්බර් 25 දින වන විට හිඟව පවතින එක්සත් ජනපද ඩොලර් බිලියන 12.55ක පමණ වටිනාකමකින් යුතු ජාත්‍යන්තර ස්වෛරී බැඳුම්කර ප්‍රමාණයක් ප්‍රතිව්‍යූහගතකරණයට භාජනය වන අතර ඒ වෙනුවෙන් නව ස්වෛරී බැඳුම්කර නිකුත් කිරීමක් සිදුකෙරෙනු ඇත.

මුදල්, ක්‍රමසම්පාදන හා ආර්ථික සංවර්ධන අමාත්‍යවරයා වශයෙන් ජනාධිපති අනුර කුමාර දිසානායක මහතා මේ සම්බන්ධයෙන් පවසන්නේ, පෞද්ගලික ණය හිමියන් සමඟ ජාත්‍යන්තර ස්වෛරීත්ව බැඳුම්කර ප්‍රතිව්‍යුහගත කිරීම ආරම්භ කිරීම පිළිබඳ අද නිල නිවේදනය ශ්‍රී ලංකාවට වැදගත් සන්ධිස්ථානයක් සනිටුහන් කරනු ලබන බවයි. එහිදී මෙම ස්වෛරී බැඳුම්කර ප්‍රතිව්‍යූහගතකරණ ක්‍රියාවලිය සඳහා සහයෝගය දක්වන ලෙස ජනාධිපතිවරයා සියලු පුද්ගලික ණය හිමියන්ගෙන් ඉල්ලා සිටී.

මුදල්, ක්‍රමසම්පාදන හා ආර්ථික සංවර්ධන අමාත්‍යාංශය විසින් නිවේදනයක් නිකුත් කරමින් මේ බව අනාවරණය කරයි.

මේ සම්බන්ධයෙන් කැබිනට් මණ්ඩල අනුමැතිය හිමිව ඇති අතර අදාළ කැබිනට් තීරණයේ මෙසේ සඳහන් වේ.

2024 ජුනි මාසයේදී ශ්‍රී ලංකා රජය විසින් ප්‍රධාන ද්විපාර්ශ්වික ණය දෙන්නන්ගේ නිල ණය දීමේ කමිටුවේ (OCC) සාමාජිකයින් සමඟ ණය ප්‍රතිව්‍යූහගතකිරීම පිළිබඳ අවසන් එකඟතාවකට පැමිණෙන ලදී. 2024 සැප්තැම්බර් මාසයේදී ප්‍රතිපත්තිමය වශයෙන් ඇමෙරිකානු එක්සත් ජනපද ඩොලර් බිලියන 14.2ක පමණ ස්වෛරී ණය ප්‍රතිව්‍යූහගතකිරීම පිළිබඳව ජාත්‍යන්තර ආයෝජකයින්ගේ නියෝජිත කණ්ඩායමක් වන ස්වෛරීත්ව බැඳුම්කර හිමියන් (AdHoc Bond Holders) තත්කාර්ය කණ්ඩායමක් සහ ශ්‍රී ලංකාවේ දේශීය බැඳුම්කර හිමියන්ගේ එකමුතුව (Local Consortium of Sri Lanka) සමඟ පවත්වන ලද සම්මුති සාකච්ඡාවන්ගෙන් අනතුරුව, අන්තර්ජාතික බැඳුම්කර හිමියන් සමඟ මූලික වශයෙන් එකඟතාවකට පැමිණෙන ලදී. ඒ අනුව, ශ්‍රී ලංකාවේ ජාත්‍යන්තර ස්වෛරීත්ව ණය සංයුතිය, ආයෝජකයින් සහ පියවීම් සම්බන්ධයෙන් කරුණු සැලකිල්ලට ගනිමින්, ශ්‍රී ලංකා ආර්ථිකයට සිදු කරනු ලබන බලපෑම පිළිබඳව ශ්‍රී ලංකා රජයේ මූල්‍ය හා නීති උපදේශකයින් විසින් සිදු කරන ලද විශ්ලේෂණයකින් අනතුරුව සහ ශ්‍රී ලංකාව සඳහා වන ජාත්‍යන්තර මූල්‍ය අරමුදලේ විස්තීර්ණ ණය පහසුකම යටතේ වන විධිවිධාන පරිදි එම අරමුදල විසින් සිදු කරනු ලබන ණය තිරසර විශ්ලේෂණය මඟින් පෙන්වා දෙන ලද පරාමිතීන්ට අනුව, දැනට පවතින බැඳුම්කර සඳහා නව බැඳුම්කර හුවමාරු කිරීමේ මාර්ගයෙන් ශ්‍රී ලංකාවේ ජාත්‍යන්තර ස්වෛරී බැඳුම්කර ප්‍රතිව්‍යුහගතකරණය සඳහා මුදල්, ක්‍රමසම්පාදන සහ ආර්ථික සංවර්ධන අමාත්‍ය වශයෙන් ජනාධිපතිවරයා ඉදිරිපත් කරන ලද යෝජනා අමාත්‍ය මණ්ඩලය විසින් අනුමත කරන ලදී.

 

 

The post ජාත්‍යන්තර ස්වෛරීත්ව බැඳුම්කර හුවමාරුව දියත් කරන බව ශ්‍රී ලංකාව නිල වශයෙන් නිවේදනය කරයි appeared first on Adaderana Biz Sinhala | Sri Lanka Business News.