පැමිණිලිකරුවන්ගේ අත්සන් හොරට ගැසූ පානදුර කොස්තාපල්ගේ වැඩ තහනම්

පොලිසියට ලද පැමිණිලි විභාග කළ බවට අසත්‍ය ප්‍රකාශ සටහන් කර පැමිණිලිකරුවන්ගේ අත්සන් හොරට යොදා පැමිණිලි පාර්ශ්ව මෙන් ම පොලිස් නිලධාරීන් ද නොමග යැවූ පානදුර පොලිස් ස්ථානයේ කොස්තාපල්වරයකු ඊයේ (ඔක්. 4) සිට ක්‍රියාත්මක වන පරිදි වැඩ තහනමකට ලක්කර ඇතැයි පානදුර පොලිස් අධිකාරි කාර්යාලය සඳහන් කරයි.

පානදුර උතුර පොලිසියේ ප්‍රජා පොලිස් ඒකකයේ රාජකාරි නියුතුව සිටි සුජීව කරුණාරත්න නමැති කොස්තාපල්වරයෙකු මෙසේ වැඩ තහනමට ලක්ව ඇතැයි සඳහන් වේ.

පානදුර සහකාර පොලිස් අධිකාරි නිශාන්ත සේනාරත්න මහතාගේ නියෝග මත මෙසේ වැඩ තහනම සිදුකර ඇතැයි සඳහන් වේ.

පානදුර, කෙසෙල්වත්ත ප්‍රදේශයේ ලී මෝල් හිමියකුගේ බැන තර්ජනය කිරීමකට ලක්වූ පුද්ගලයෙකුට කරන ලද පැමිණිල්ලක් මාස තුනකට අධික කාලයක් විභාග නොවූ බවට පැමිණිලිකරු විසින් පානදුර පොලිස් අධිකාරි කාර්යාලයට කරන ලද පැමිණිල්ලක් අනුව පානදුර සහකාර පොලිස් අධිකාරි නිශාන්ත සේනාරත්න මහතා නිරීක්ෂණය කිරීමේදී එය පැමිණිලිකරු ඉල්ලා අස්කර ගෙන ඇති බවට සටහන් යොදා තිබූ බව පොලිසිය කියයි.

තවදුරට ත් පරීක්ෂා කිරීමේදී සැකකාර පොලිස් කොස්තාපල්වරයා එම ආකාරයට පැමිණිලි 5ක් නිසි විභාගයකින් හෝ ජ්‍යෙෂ්ඨ නිලධාරින්ට දැනුවත් කිරීමකින් තොරව පැමිණිලි විභාග කළ බවට අසත්‍ය ලෙස සටහන් යොදා පැමිණිලිකරුවන්ගේ අත්සන් හොරට යොදා තිබූ බවට ද නිරීක්ෂණය වී ඇතැයි පොලිසිය පවසයි.

අදාළ පොලිස් කොස්තාපල්වරයා වසර 4ක සේවා කාලයක් ඇති කොස්තාපල්වරයෙකු බව ද සඳහන් වේ.

The post පැමිණිලිකරුවන්ගේ අත්සන් හොරට ගැසූ පානදුර කොස්තාපල්ගේ වැඩ තහනම් appeared first on ColomboXnews.