“අපි නිර්භීත නැහැ” – ඊයේ තරගය පරාද වූ විරාට් කෝලි කිව්ව කතාව

මෙරව එක්සත් අරාබි එමීර් රාජ්‍යයේ පවත්වනු ලබන ඉන්දීය ප්‍රිමියර් ලීග් තරඟාවලියේ ඊයේ (31) විරාට් කෝලි නායකත්වය දරන රෝයල් චැලේන්ජර්ස් බැංග්ලෝර් සහ සන් රයිසස් හයිද්‍රාබාද් අතර තරගයෙන් සන් රයිසස් පිල කඩුළු 5ක ජයක් ලබා ගැනීමට සමත් විය.

එහිදී ප්‍රථම ඉනිම ක්‍රීඩා කළ රෝයල් චැලේන්ජර්ස් බැංග්ලෝර් කණ්ඩායම පන්දු වාර 20 අවසානයේ කඩුළු 07ක් දැවී ලබා ගැනීමට සමත් වූයේ ලකුණු 120ක් පමණයි. පිළිතුරු ඉනිම ක්‍රීඩා කළ සන් රයිසස් හයිද්‍රාබාද් පන්දුවාර 14යි එක පන්දුවක් අවසානයේ කඩුළු 05ක් පමණක් දැවී ලකුණු 121ක් ලබා තරඟය ජය ගැනීමට සමත් විය.

තරඟයෙන් අනතුරුව මාධ්‍ය වෙත අදහස් දක්වමින් නායක විරාට් කෝලී පවසා සිටියේ තම කණ්ඩායම රැස් කළ ලකුණු ප්‍රමාණය කිසිසේත්ම ප්‍රමාණවත් නොමැති බවයි. ඊයේ තරගය පැවැත් වූ තණතිල්ල තුළ ලකුණු 140ක් පමණ රැස් කර ගැනීමට හැකියාව තිබු නමුත් තම ඉනිම පුරාවටම පන්දුවට පහර දීමට තරම් කිසිවෙකු නිර්භීත නොවූ බවද විරාට් එහිදී පවසා සිටියේය. එමෙන්ම තම ප්‍රතිවාදී පිල තණතිල්ලේ වාසිය ලබා ගත් බවත් ඔවුන් වේගය වෙනස් කරමින් පන්දු යවමින් එහි ප්‍රයෝජනය ගත් බවද විරාට් වැඩිදුරටත් පවසා සිටියේය.

කෙසේ වෙතත් අයි.පී.එල් තරඟාවලියේ ප්‍රසාද ලකුණු සටහනේ දෙවැනි ස්ථානය රඳවා ගැනීමට විරාට් නායකත්වය දරණ රෝයල් චැලේන්ජර්ස් බැංග්ලෝර් කණ්ඩායමට හැකියාව ලැබී තිබේ.