වැරදිමත සමාජගත කරන්න අපේ පර්යේෂණ පාවිච්චි කරන්න එපා – මහාචාර්ය නීලිකා මලවිගේ

සිය පර්යේෂණය වැරදි මතවාද ඉදිරිපත් කිරීම සඳහා භාවිත නොකර ලෙස ශ්‍රී ජයවර්ධනපුර විශ්ව විද්‍යාලයේ ප්‍රතිශක්තිවේද සහ අණුක වෛද්‍ය විද්‍යා අධ්‍යයන අංශයේ මහාචාර්ය නිලීකා මලවිගේ මහත්මිය ඉල්ලා සිටි.

වෙබ් අඩවියක් සමඟ සම්මුඛ සාකච්ඡාවකට එක්වෙමින් ඇය ප්‍රකාශ කළේ වත්මන් කොරෝනා වෛරසය සම්බන්ධයෙන් නිකුත් කළ සිය පර්යේෂණ වාර්තාව පදනම් කරගනිමින් වැරදි මතවාද සමාජගත කිරීමට ඇතම් පිරිස් උත්සාහ දරන බවය.

මේ වන විට ව්‍යාප්ත වෙමින් පවතින කොරෝනා වෛරසයේ ප්‍රභේදය යුරෝපයේ හමුවූ ප්‍රභේදයට බෙහෙවින් සමාන බවට පර්යේෂණයෙන් තහවුරු වී ඇති අතර එම වෛරසය යුරෝපයේ සිට පැමිණි බවට ඒ හරහා නිගමනය කළ නොහැකි බව ඇය අවධාරණය කළාය.

“දැන් වෛරසය තියෙන වෛරසය ඇත්තටම යුරෝපයේ තිබුණ ප්‍රභේදයට සමානයි. ඒකෙන් කියන්නේ ඒක යුරෝපයෙන් ආව කියන එක නෙමෙයි.ඒ ප්‍රභේදය ඉස්සෙල්ලම දකින්න ලැබුනේ යුරෝපයේ. ඒක නිසයි ඒකට යුරෝපයෙන් වාර්තා වුණ වෛරසය කියලා කියන්නෙ. ඒ නිසා ශ්‍රී ලංකාවේ ප්‍රභේද යුරෝපයෙන් ආව කියන්න බෑ. මේ ප්‍රභේදය ඉන්දියාවෙන් ආවා වෙන්නත් පුළුවන්.” මහාචාර්ය නීලිකා මලවිගේ මහත්මිය පැවසීය.

ඇය පෙන්වා දුන්නේ තමන් ඇතුළු කණ්ඩායම වෛරසය පිළිබඳ ජානමය පර්යේෂණයක් සිදු කළ අතර එයින් එම වෛරසය පැමිණි රට කුමක්ද යන්න පිළිබඳව නිගමනය කළ නොහැකි බවය.

“වෛරසය ආවේ කොහෙන්ද කියලා ජානමය පරීක්ෂණයකින් කියන්න බෑනෙ. ඒක බුද්ධි අංශයේ වැඩක්. අපි කොහොමද කියන්නේ ලංකාවට වෛරසය ආවෙ කොහෙන්ද කියලා? අපේ දත්තවලින් කිසිසේත්ම කියන්න බෑ මේ වෛරසය ආවේ යුරෝපයෙන් කියලා.”

මේ අතර කොරෝනා වෛරසයට අදාළ මරණ අනුපාතය වෙනත් රටවලට සාපේක්ෂව ශ්‍රී ලංකාවේ අඩු බවට පළ කෙරෙන අදහස් ද පිළිගත නොහැකි බව ඇය පැවසීය.

“වෙනත් රටවල ටෙස්ට් කරන්නේ රෝග ලක්ෂණ පෙන්නුම් කරන අය විතරයි.ඒ නිසා ඒ රටවල වාර්තා වන රෝගීන් සංඛ්‍යාව සාපේක්ෂව අඩුයි.ඒත් අපේ රටේ බුද්ධි අංශ හරහා රෝග ලක්ෂණ නොමැති අය පවා පරික්ෂා කරන නිසා වැඩිපුර රෝගීන් සංඛ්‍යාවක් වාර්තා වෙනවා. අපේ රටේ වාර්තා වෙලා ඉන්න රෝගීන් 11,000න් රෝග ලක්ෂණ මතු වුණේ 2,000ගේ විතරයි.ඒ අනුව රෝග ලක්ෂණ මතු වුණු 2000කට මරණ 23ක් වාර්තා වෙලා තියෙනවා.ඒ කියන්නේ අනික් රටවල මරණ අනුපාතයට සමානයි අපෙත්. ඒ වගේම ඉන්දියාවෙත් මුල් කාලයේ මරණ අඩුවෙන් වාර්තා වුණේ. පස්සේ ඒක ගොඩක් වැඩි වුණා. ශ්‍රී ලංකාවේත් පරිස්සම් නොවුණොත් ඒ තත්ත්වය ඇති වෙන්න පුළුවන්.”මහාචාර්ය නීලිකා මලවිගේ මහත්මිය ප්‍රකාශ කළාය.

ඇය මෙම සාකච්ඡාවේදී තවත් වැදගත් කරුණක් පැහැදිලි කළාය. ඒ මෙම වෛරසයෙන් වැඩි බලපෑම ඇත්තේ වයස්ගත සහ නිදන්ගත රෝග සහිත අයට පමණක් යන මතය පිළිබඳව ය.

මේ සම්බන්ධයෙන් අදහස් දක්වමින් ඇය ප්‍රකාශ කළේ වයස්ගත අය පමණක් මෙම වෛරසයෙන් මරණයට පත්වන බවට දුර්මතයක් පවතින බවය.

කිසිදු නිදන්ගත රෝගයක් නොතිබුණු තරුණ පිරිස් වලට මෙම රෝගය වැළඳීමෙන් ඔවුන්ට පෙනහලු සහ හදවත් ආශ්‍රිතව දීර්ඝකාලීන සංකූලතා මතුව ඇති බවද මහාචාර්යවරිය පෙන්වා දුන්නාය.

“මේ දීර්ඝකාලීන රෝගී තත්ත්වයන් ඇතිවීම ගැන මේ වන විට වාර්තා වෙලා තියෙනවා. මෙම තත්ත්වය හඳුන්වන්නේ ලෝන්ග් කොවිඩ් (Long Covid) කියලා. ඒ නිසා මේකෙ බලපෑම වයස්ගත අයට විතරයි කියලා හිතන්න බෑ. සියලු දෙනා ප්‍රවේශම් නොවුණොත් මේ වසංගතයෙන් ගොඩ එන එක ගොඩක් දුෂ්කර වෙන්න පුළුවන්. අපි හැමෝම වෙනත් අයගෙන් අපට වෛරසය ආසාදනය නොවන ලෙසත් අපෙන් වෙනත් අයකුට අසාදනය නොවන ලෙසත් ජීවත් විය යුතුය.”

ඇය අවධාරණය කළේ මෙම වෛරස් ප්‍රභේදය මීට පෙර ශ්‍රී ලංකාවේ වාර්තා වූ ප්‍රභේදවලට වඩා ප්‍රබලත්වයෙන් වැඩි එකක් බවය.

“මේ නව ප්‍රභේදයේ ශ්වසන තරල (සෙම් සොටු) මත වෛරස් බිලියන ගණනක් තියෙනවා. ඒ නිසා මේක පැතිර යාමේ වේගය සහ ආසාදනය වීමේ ප්‍රභලත්වය ඉතාමත් වැඩියි.

ඒ නිසාම ඒ ගැන ගොඩක් අවධානයෙන් කටයුතු කරන්න සියලු දෙනා හිතට ගත යුතුයි.”

ඉදිරි පර්යේෂණ කටයුතු ?

කොරෝනා වෛරසය සම්බන්ධයෙන් මාර්තු මාසයේ සිට මේ දක්වා පර්යේෂණ කිහිපයක් ම මහාචාර්ය නීලිකා මලවිගේ මහත්මියගේ ප්‍රධානත්වයෙන් සිදු කර තිබේ.

ඇය පැවසුවේ තවදුරටත් මේ සම්බන්ධයෙන් පර්යේෂණ සිදුකරන බවය.

“මේ ගැන ලෝකයේ හැම රටක්ම වගේ පර්යේෂණ සිදු කරනවා. කොරෝනා වෛරසය සාමාන්‍යයෙන් ස්ථාවර එකක්. ඒකෙ ප්‍රභේද හරිම සියුම්. ඒ වගේ සියුම් ප්‍රභේද ලෝකයෙන්ම 70,000ක් විතර හම්බ වෙලා තියෙනවා. මේ හැම එකක්ම එක ඩේටා බේස් එකක තියනවා. ඒවා පදනම් කරගෙන තමයි එන්නත් නිෂ්පාදන කටයුතු සිදු කරන්නේ.”

මේ වන විට කොවිඩ් 19 රෝගය සම්බන්ධයෙන් එන්නත් 16ක් පමණ රසායනාගාර අත්හදා බැලීම් මට්ටමේ පවතින බවද ඇය ප්‍රකාශ කළාය.

(මව්බිම)