මුන්දලමේ අධි සංවේදී කඩොලාන රක්ෂිතයක් විනාශ කරලා

මුන්දලම ප්‍රාදේශීය ලේකම් කොට්ඨාශයට අයත් විරුත්තෝඩෙ ග්‍රාම නිලධාරි වසමේ පුලිදිවායල්හි අධි සංවේදී ස්වභාවික කඩොලාන රක්ෂිතයක් විනාශ කර ඇතැයි වාර්තා වේ.

මේවන විට එම අධි සංවේදී කඩොලාන රක්ෂිතයේ අක්කර 02කට ආසන්න ප්‍රමාණයක් විනාශ කර ඇති බවත් ජංගම කියත් ආධාර කර ගනිමින් මෙම රක්ෂිතය විනාශ කිරීම සිදු කර ඇති බවත් වාර්තා වේ.

ඉස්සන් වගා පොකුණු ඉදිකිරීමේ මුවාවෙන් සංවිධානාත්මක පිරිසක් මෙම දැවැන්ත විනාශ සිදුකර ඇති බව ප්‍රදේශවාසීන් පෙන්වා දෙයි.

මෙම තත්ත්වය නිසා පාරිසරික ගැටලු රැසකට මුහුණදීමට සිදුව ඇති බවයි ප්‍රදේශවාසීන් පවසයි.

සිද්ධිය පිළිබඳව මේ වනවිටත් විමර්ශනයක් ක්‍රියාත්මක බව මුන්දලම ප්‍රාදේශීය ලේකම් විජානි වසන්තිකා මහත්මිය කියා සිටියාය.