කොළඹ සහ වත්තල ආසාදිතයින්ගේ ආශ්‍රිතයින් සොයා ගැනීම තවමත් ගැටළුවක්

ඇඳිරි නීතිය අවසන් කළ පමණින් සංචරණ සීමාවන්ට සහනයක් ලැබී ඇතැයි අදහස් නොකළ යුතු යැයි ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ පැවසීය.

මාධ්‍යයට වැඩිදුරටත් අදහස් දැක්වූ ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා මෙසේද පැවසීය.

‘‘දින කීපයක් දිවයිනේ ප්‍රදේශ කීපයකට පනවා ඇති ඇඳිරි නීතිය යම් ආකාරයකට මේ වන විට ලිහිල් වී තිබෙනවා. ඇතමුන් කියා සිටියා බස්නාහිර පළාතේ ඇඳිරි නීතිය ඉවත් කළ යුතු බව. නමුත් බිම් මට්ටමේ රාජකාරි කටයුතු සිදු කරන තාක්ෂණික නිලධාරීන් වශයෙන් අප කියා සිටියේ තවමත් බස්නාහිර පළාතේ ඇඳිරි නීතිය ඉවත් කිරීමට කාලය එළැඹ නොමැති බවයි.

විශේෂයෙන්ම කොළඹ මහ නගර සභා සීමාව තුළ සහ වත්තල ප්‍රදේශවලින් හමුවී ඇති කොවිඩ් ආසාදිතයන්ගේ සමීපතම ආශ්‍රිතයන් සොයා ගැනීම තවමත් ගැටලුවක් වී තිබෙනවා. එවන් වටපිටාවක් තුළ ඇඳිරි නීතිය ඉවත් කිරීමෙන් ඇති වන ප්‍රතිඵලය අනතුරු දායක වන්නට ඉඩ තිබෙනවා.

අප තවමත් උත්සාහ කරමින් සිටින්නේ කොවිඩ් වසංගතය විසින් නතු කර ගෙන ඇති පාලනය අපේ අතට ගන්නයි. ඒ සදහා ඇඳිරි නීතිය පැනවීමෙන් පමණක් යමක් කරන්න අපහසුයි. මහජනතාවගේ පූර්ණ සහාය ඒ සඳහා ලැබිය යුතුමයි.

මේ වන විට බොහෝ ප්‍රදේශවලින් ඇඳිරි නීතිය ඉවත් කර තිබෙනවා. ඇඳිරි නීතිය ඉවත් කළ පමණින් සංචරණය සඳහා පූර්ණ නිදහසක් ලබාදී ඇති බවට යම් අයෙකු අදහස් කරනවා නම් එය වැරදියි. ඇඳිරි නීතිය ඇතත් – නැතත් අප සංචරණය සීමා කළ යුතුමයි. එසේ නොවුණහොත් පවතින තත්ත්වය පාලනය කර ගැනීමට නොහැකි වේවි.

රටවැසියන් ලෙස අප සියලුම දෙනා අවධානයට ගත යුතු කරුණ වන්නේ තවමත් අපි සිටින්නේ අවදානම් කාලයක බවයි.

මෙම තත්ත්වය නිසා ජනතාවගෙන් නැවත නැවතත් ඉල්ලා සිටින්නේ කොවිඩ් පාලනයට සහාය දෙන්න. ඒ සඳහා සංචරණය හැකි තාක් සීමා කරන ලෙසයි.’’