ඉන්දියාවේ පක්ෂවලට මෙරට ඡන්දය ඉල්ලන්න බෑ – මැතිවරණ කොමිසම

ඉන්දියාවේ භාරතීය ජනතා පක්ෂයට හෝ විදෙස් රටක කිසිදු පක්ෂයකට මෙරට මැතිවරණවලට තරග කිරීමේ හැකියාවක් නොමැති බව මැතිවරණ කොමිෂන් සභාවේ සභාපති, නීතිඥ නිමල් පුංචිහේවා මහතා පවසනවා. 1981 අංක 01 දරන පාර්ලිමේන්තු මැතිවරණ පනත හා ආණ්ඩුක්‍රම ව්‍යවස්ථාව අනුව එවැනි කිසිදු හැකියාවක් නොමැති බවයි ඔහු පෙන්වා දෙන්නේ.

මැතිවරණ කොමිසමේ සභාපතිවරයා මේ බව සඳහන් කර තිබෙන්නේ ඉන්දියාවේ පාලක භාරතීය ජනතා පක්ෂය මෙරට තුළ ලියාපදිංචි කිරීමට හා මැතිවරණවලට තරග කිරීමට සූදානමින් සිටින බවට පළවන මාධ්‍ය වාර්තා සම්බන්ධයෙන් අදහස් දක්වමිනි.

BJP ප්‍රධානියෙකු මෙන්ම ඉන්දීය ස්වදේශ කටයුතු අමාත්‍ය අමිත් ෂා මහතා ඉන්දීය මාධ්‍ය වෙත ප්‍රකාශ කර තිබුණේ භාරතීය ජනතා පක්ෂය ගෝලීය දේශපාලන ව්‍යාපාරයක් දක්වා වර්ධනය කිරීමට බලාපොරොත්තුවෙන් සිටින බවයි. ඒ යටතේ තම පක්ෂය ශ්‍රී ලංකාව සහ නේපාලය යන අසල්වැසි රටවල ලියාපදිංචි කරන බවද අමිත් ෂා මහතා පවසා තිබෙනවා.

BJPයේ මෙම තීරණය සම්බන්ධයෙන් ඉන්දීය කොන්ග්‍රස් පක්ෂයේද විරෝධය එල්ල වී ඇති අතර එම පක්ෂය පවසන්නේ ශ්‍රී ලංකාව, නේපාලය වැනි ස්වෛරී පාලනයක් සහිත රටවල කටයුතුවල මැදිහත්වීමේ කිසිදු අයිතියක් භාරතීය ජනතා පක්ෂයට නොමැති බවයි.

The post ඉන්දියාවේ පක්ෂවලට මෙරට ඡන්දය ඉල්ලන්න බෑ – මැතිවරණ කොමිසම appeared first on ColomboXnews.