ට්‍රම්ප්ගේ තීරුබදු ප්‍රතිපත්තිය ලංකාවේ කොටස් වෙළෙඳපොළට රු. කෝටි 43,500ක් අහිමි කරයි

එක්සත් ජනපද ජනාධිපති ඩොනල්ඩ් ට්‍රම්ප් විසින් පසුගිය අප්‍රේල් 02 දින හඳුන්වා දෙන ලද නවතම ආනයනික තීරුබදු ප්‍රතිපත්ති, මේ වන විට ගෝලීය ආර්ථික අර්බුදයක් නිර්මාණය කිරීමක් දක්වා දුරදිග ගොස් තිබේ.

මෙම තත්ත්වය තුළ ලොව පුරා කොටස් වෙළෙඳපොළ ගණනාවක් දැවැන්ත කඩාවැටීමකට ලක්ව ඇති අතර ආසියාකරයේ කොටස් වෙළෙඳපොළ ගණනාවක් ද එහි දැඩි බලපෑමට භාජනයවී ඇත.

පවතින වාතාවරණය තුළ ශ්‍රී ලංකාවේ එකම කොටස් වෙළෙඳපොළ වන කොළඹ කොටස් වෙළෙඳපොළ ද, ජනාධිපති ට්‍රම්ප්ගේ මෙම තීරණයේ ගොදුරක් බවට පත්ව ඇත්තේ, එකී තීරණය ප්‍රකාශයට පත්වීමත් සමඟම අඛණ්ඩ ගනුදෙනු දින 3ක් පුරාවට දැවැන්ත පරිහානියක් විඳදරා ගැනීමට සිදුවීමත් සමඟිනි.

පසුගිය අප්‍රේල් 02 දින ගනුදෙනු අවසානයේ දී කොළඹ කොටස් වෙළෙඳපොළ සියලු කොටස් මිල දර්ශක අගය ඒකක 16,007.44 ක් ලෙසින් සටහන්ව තිබුණු අතර එය ඊයේ (07) දිනයේ ගනුදෙනු සමාප්තිය වන විට ඒකක 14,660.45 ක් දක්වා දැවැන්ත පහළ යාමක් වාර්තා කර ඇත. එනම් මෙම ගනුදෙනු දින 03 තුල දී පමණක් ඒකක 1,346.99 කින්, නැතහොත් 8.41% කින් කොළඹ කොටස් වෙළෙඳපොළ කඩාවැටී ඇත.

මේ අතර අප්‍රේල් 02 දින වන විට රු. බිලියන 5,688.56 ක් ලෙසින් වාර්තා වූ කොළඹ කොටස් වෙළෙඳපොළ, වෙළෙඳපොළ ප්‍රාග්ධනීකරණ වටිනාකම ඊයේ (07) වන විට රු. බිලියන 5,253.18 ක් දක්වා පහළ බැස ඇත්තේ මෙම දින 03 තුළ දී පමණක් රු. බිලියන 435.37 ක්, එනම් රු. කෝටි 43,537 ක්, කොළඹ කොටස් වෙළෙඳපොළෙන් සෝදා හරිමිනි. මෙහිදී ඊයේ (07) දිනය තුළ දී පමණක් කොටස්‌ වෙළෙඳපොළට අහිමිව ඇති වටිනාකම රු. බිලියන 227කි.

The post ට්‍රම්ප්ගේ තීරුබදු ප්‍රතිපත්තිය ලංකාවේ කොටස් වෙළෙඳපොළට රු. කෝටි 43,500ක් අහිමි කරයි appeared first on Adaderana Biz Sinhala | Sri Lanka Business News.