මත්ද්‍රව්‍ය ජාවාරම්කරුවන්ට බන්ධනාගාරය තුළදී නීතිවිරෝධී ලෙස සුපිරි සැප පහසුකම් ලබාදීම සම්බන්ධයෙන් චෝදනා ලබා සිටින මීගමුව බන්ධනාගාරයේ හිටපු අධිකාරී අනුරුද්ධ සම්පායෝ මහතාට එරෙහිව වරෙන්තුව ක්‍රියාත්මක කරමින් බුද්ධි අංශ මෙහෙයුමකින් ඔහුව අත් අඩංගුවට ගත් බවට පොලිසිය කළ ප්‍රකාශ අසත්‍ය බව සාක්ෂි සහිතව අනාවරණය වී ඇති හෙයින් මීගමුව මූලස්ථාන පොලිස් පරීක්ෂකවරයාට සහ පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී ජාලිය සේනාරත්න මහතාට එරෙහිව වහාම විමර්ශනයක් ආරම්භ කරන්නැයි නීතිපතිවරයා විසින් වැඩබලන පොලිස්පතිවරයා වෙත ලිඛිතව දැනුම් දී තිබේ.
“මෙම අනුරුද්ධ සම්පායෝ යන අය පොලිස් භාරයට ගත් ස්ථානයේ CCTV දර්ශන අනුව මීගමුව මූලස්ථාන පොලිස් පරීක්ෂකවරයා ඇතුළු නිලධාරීන් පිරිසක් පොලිස් ජීප් රථයකින් ද ඊට පිටුපස වෑන් රථයකින් පැමිණ සිටි අනුරුද්ධ සම්පායෝ නමැත්තාගේ සහෝදරයා ඇතුළු පිරිසක් අනුරුද්ධ සම්පායෝ එම ස්ථානයට පැමිණෙන තෙක් රැඳී බලාසිටින ආකාරයත් නිරීක්ෂණය වුණා. එසේම අනුරුද්ධ සම්පායෝ නමැත්තා රතු පැහැති ඩිස්කවරි ස්පෝට්ස් වර්ගයේ ජීප් රථයකින් එම ස්ථානයට පැමිණ රථයෙන් බැස මීගමුව මූලස්ථාන පොලිස් පරීක්ෂකවරයාගේ රථය අසලට ඇවිද යන ආකාරයත් එහි සටහන් වී තිබුණා.
එම අවස්ථාවේදී අනුරුද්ධ සම්පායෝ තම ජංගම දුරකථනයෙන් යමෙකු අමතමින් සිටි ආකාරයත් ඉන් අනතුරුව එම දුරකථන ඇමතුම මූලස්ථාන පොලිස් පරීක්ෂකවරයාට කතාකිරීමට ලබාදෙන ආකාරයත් පෙනී ගියා. තව ද මීගමුව මූලස්ථාන පොලිස් පරීක්ෂකවරයා අනුරුද්ධ සම්පායෝ නමැත්තාගේ ශරීරයට අතපාමින් ඔහුව සුහදව පිළිගන්නා ආකාරයත් හොඳින් නිරීක්ෂණය කිරීමට ලැබුණා. ඒ අනුව එය අත් අඩංගුවට ගැනීමක් නොව වරෙන්තුකරුවකු පූර්ණ සැලසුමක් සහිතව සාදරයෙන් පිළිගැනීමක් බව සාමාන්‍ය දැනුමක් ඇති ඕනෑම පුද්ගලයෙකුට පැහැදිලිව වැටහෙන කරුණක් බවට ගරු නීතිපතිවරයා විසින් වැඩබලන පොලිස්පතිවරයාට දැනුම්දීමක් සිදු කළා.
එසේම ඔවුන් එම ස්ථානයේ එසේ යම් කාලයක් රැඳී සිට ඇත්තේ එක් මාධ්‍ය ආයතනයක මාධ්‍යකරුවකුගේ පැමිණීම අපේක්ෂාවෙන් බවට CCTV දර්ශන නැරඹීමේදී මනාව පැහැදිලි වන බවට බවට ගරු නීතිපතිවරයා විසින් වැඩබලන පොලිස්පතිවරයාට දැනුම්දීමක් සිදු කළා. එසේ මාධ්‍ය ආයතනයකින් පුද්ගලයෙක් පැමිණෙන තෙක් කල්ගත කළ මොවුන් එම මාධ්‍යවේදියාගේ ජංගම දුරකථනයෙන් අනුරුද්ධ සම්පායෝ යන සැකකරුහට මාධ්‍යයට කරුණු ප්‍රකාශ කිරීමේ අවස්ථාව මීගමුව මූලස්ථාන පොලිස් පරීක්ෂකවරයා විසින්ම ලබාදී ඇති බව වැඩිදුරටත් පැහැදිලි වුණා. මීගමුව මූලස්ථාන පොලිස් පරීක්ෂකවරයා අනුරුද්ධ සම්පායෝ යන සැකකරු සමඟ එකට එක්ව කරන ලද සාමුහික රඟදැක්වීම සම්බන්ධයෙන් කරුණු විමර්ශනය කර නොපමාව වාර්තා කරන මෙන් ගරු නීතිපතිවරයා විසින් වැඩබලන පොලිස්පතිවරයාට උපදෙස් ලබාදුන්නා.
එසේම පොලිස් මාධ්‍ය ප්‍රකාශක විසින් එම සිද්ධිය සම්බන්ධයෙන් නොයෙක් මාධ්‍ය වෙත අනුරුද්ධ සම්පායෝ යන සැකකරු අත් අඩංගුවට ගත්තේ උපක්‍රමශීලීව බුද්ධි මෙහෙයුමකින් යැයි අසත්‍ය කරුණු මහජනතාව වෙත දන්වා මහජනතාව නොමඟ යැවීම සම්බන්ධයෙන් වගකීම් රහිතව කටයුතු කර ඇති ආකාරය අනාවරණය වන බැවින් ඔහුගේ එම ප්‍රකාශ සම්බන්ධයෙන් ද විමර්ශනයක් සිදුකොට නොපමාව වාර්තා කරන මෙන් ද තවදුරටත් ගරු නීතිපතිවරයා විසින් වැඩබලන පොලිස්පතිවරයාට උපදෙස් ලබාදුන්නා” යනුවෙනුයි නීතිපතිවරයාගේ මාධ්‍ය සම්බන්ධීකාරක, රජයේ නීතීඥ නිෂාරා ජයරත්න මෙනවිය සඳහන් කළේ.
The post සම්පායෝ ඇල්ලීම නාටකයක් බව CCTV දර්ශණ වලින් තහවුරුවේ – පොලිස් මාධ්‍ය ප්‍රකාශකට එරෙහිවත් විමර්ශනයක් appeared first on ColomboXnews.
Source From Colomboxnews
Author: Kamal Dhammika
#SriLanka #News #lka