T20 ක්‍රිකට් පිටියේ පන්දු යවන්නන්ගේ හිසරදය වූ ක්‍රිස් ගේල්ගෙන් තවත් ලෝක වාර්තාවක්

T20 ක්‍රිකට් පිටිය තුළ තරගයක් උඩුයටිකුරු කළ හැකි මෙන්ම පන්දු යන්නන්ට දැඩි හිසරදයක් වූ ක්‍රිස් ගේල් විසින් නව ලෝක වාර්තාවක් පිහිටු වීමට ඊයේ (30) දිනයේ දී සමත් විය.

ඒ ගේල් ක්‍රීඩා කරන කින්ග්ස් ඉලවෙන් පන්ජාබ් කණ්ඩායම සහ රාජස්ථාන් රෝයල් කණ්ඩායම් අතර තරගයේ දී කාර්තික් ත්‍යාගි එල්ල කරන ලද පන්දුවකට දැවැන්ත 6 පහරක් එල්ල කරමිනි.

එම 6 පහර සමඟ ක්‍රිකට් ලෝකය තුළ දැඩි උණුසුම්කාරී තරඟ රටාව වන T20 ක්‍රිකට් තරඟ රටාවේ 6 පහර 1000ක් එල්ල කළ ලෝකයේ පළමු ක්‍රීඩකයා බවට ක්‍රිස් ගේල් පත්විය.

ඒ අනුව ක්‍රිස් ගේල් 6 පහර 1000ක් එල්ල කරමින් පළමු ස්ථානයේ ද, කිරන් පොලාර්ඩ් 6 පහර 690ක් එල්ල කර දෙවන ස්ථානයේ ද, බ්‍රෙන්ඩන් මැකලම් 6 පහර 485ක් එල්ල කර තෙවන ස්ථානයේ ද පසුවෙයි.

මෙම ලෝක වාර්තාව පිහිට වූ ඊයේ තරඟයේ දී ක්‍රිස් ගේල් පන්දු 63ක් තුළ ලකුණු 99කට ජොෆ්රා ආචර්ගේ පන්දුවකට දැවී යන්නේ ශතකයක් අභියසදීය. ඒ ලකුණු 99 සඳහා 6 පහර 8ක් ද ගේල් විසින් එල්ල කරන ලදී.

පළමු ඉනිම ක්‍රීඩා කළ කින්ග්ස් ඉලවෙන් පන්ජාබ් කණ්ඩායම පන්දු වාර 20ක් අවසානයේ කඩුළු 04කට ලකුණු 185ක් රැස් කර ගැනීමට සමත් වූවත්, ප්‍රවේගකාරී පිතිහරඹයක නිරත වූ රාජස්ථාන් රෝයල් කණ්ඩායමේ ක්‍රීඩකයන් පන්දු වාර 17යි පන්දු 03ක් අවසානයේ කඩුළු 03ක් දැවී ජයග්‍රාහී ඉලක්කය හඹා ගියේය.