20 හදපු අය චුත වෙලා – හදපු එකෙනුත් භාගයක් ආණ්ඩුව හකුලගෙන්

20 හදපු අය චුත වෙලා - හදපු එකෙනුත් භාගයක් ආණ්ඩුව හකුලගෙන්

විසිවැනි ආණ්ඩුක‍්‍රම ව්‍යවස්ථාව සකස් කළ අය මේ වනවිට පොළෝ තලයෙන් අතුරුදන් වී ඇතැයි ද එම 20 න් භාගයක්ම ආණ්ඩුව විසින් ද හකුළා ගෙන ඇතැයි විපක්ෂ නායක සජිත් පේ‍්‍රමදාස මහතා පැවසීය.
 
 හෙතෙම මේ බව කියා සිටියේ 19 න් ඉදිරියට ජාතික ව්‍යාපාරයේ සම්මන්ත‍්‍රණය අමතමිනි. මෙම සම්මන්ත‍්‍රණය කොළඹ නව නගර ශාලාවේදී පැවැත්විණි.
 
 එහිදී වැඩිදුරටත් අදහස් දැක්වූ විපක්ෂ නායක සජිත් පේ‍්‍රමදාස මහතා මෙසේ ද කීය.
 
 අද දවස ඉතාමත් වැදගත් දවසක්. අද දවස හඳුන්වන්නේ ජාත්‍යන්තර ප‍්‍රජාතන්ත‍්‍රවාදී දිනය හැටියට. ජාත්‍යන්තර ප‍්‍රජාතන්ත‍්‍රවාදී දිනයේ, අද අපි මේ ශාලාවට එකතු වෙලා සිටින්නේ, ආඥාදායකත්වය පරාජය කරවලා, ප‍්‍රජාතන්ත‍්‍රවාදය ජයග‍්‍රහණය කරවන්න. අපි හැමෝම දන්නවා විසිවැනි ආණ්ඩුක‍්‍රම ව්‍යවස්ථා සංශෝධනය, රටට අහිතකර, රටට අසුබවාදී, රටට විනයක් වූ ව්‍යවස්ථා සංශෝධනයක බව. රටට ආදරය කරන බොහෝ දෙනා මේ තර්කය පිළිගන්නවා.
 
 මම ආරම්භයේදීම කියන්න කැමැතියි, මම විධායක ජනාධිපති ක‍්‍රමය, පිළිගත්ත, අනුමත කරපු පුද්ගලයෙක් බව. නමුත් 2010 – 2014 කාලවකවානුව තුළදී, සහ ඊට පෙරත්, මේ ක‍්‍රමවේදය තුළ ප‍්‍රජාතන්ත‍්‍රවාදී නොවන අංග ලක්ෂණයන් හරහා, රටට සිදු වූ හානිය හොඳින් අවබෝධ කරගත් පුද්ගලයකු ලෙස, ඒ නිසා තමයි 2015 ජනාධිපති මැතිවරණ ව්‍යාපාරයේදී, මා පිළිගත් මතය වෙනස් කරමින් යුගයට ඔබින ආකාරයට, ජනාධිපති ක‍්‍රමවේදයේ සංශෝධනයක්, බලය අඩු කිරීමක් වෙනුවෙන් පෙනී සිටින්නට මම තීරණය කෙරුවෙ. ඉන්පසුව 2015 ජනාධිපති ජයග‍්‍රහණයත් සමඟම 19 වැනි ආණ්ඩුක‍්‍රම ව්‍යවස්ථා සංශෝධනය ස්ථාපිත වුණා.
 
 මැයි 19 වැනි ව්‍යවස්ථා සංශෝධනය තුළින් මොනවද සිදුවුණු ප‍්‍රගතිශීලී ක‍්‍රියාදාමයන්. යහපත් රාජ්‍ය පාලනයක් වෙනුවෙන් නිර්මාණය විය යුතු ආයතන නිර්මාණය වුණා. නීති-රීති රෙගුලාසි බිහිවුණා. තනි පුද්ගලයකුට රාජ්‍ය තන්ත‍්‍රයම ගොදුරු කරගෙන, තනි තීන්දු ගැනීමේ බලය අහිමි වුණා. අධිකරණයට විනිසුරුවන් පත් කරනකොට, යම් ක‍්‍රමවේදයක් හරහා තනිපුද්ගල තීන්දු තීරණවලට නොයමින්, සහභාගිත්ව තීන්දු තීරණවලට ප‍්‍රවේශ වන්නට, ඒ ව්‍යවස්ථාදායක සභාව හරහා වැඩ කටයුතු නිර්මාණය වුණා. අධිකරණයට ඇඟිලි ගැසීම නතර වුණා. ස්වාධීන මැතිවරණ කොමිසමක් හරහා, ජීවිත අහිමි නොකොට මැතිවරණ ව්‍යාපාර කිරීමේ සංස්කෘතිය බිහි වුණා. ඇමැතිවරුන් පත් කිරීම සීමා වුණා. ප‍්‍රසම්පාදන කොමිසම බිහිවුණා. විගණන කොමිසම බිහිවුණා. සත්‍ය වශයෙන්ම, නූතන ප‍්‍රජාතන්ත‍්‍රවාදී රටක තිබිය යුතු, යහපත් රාජ්‍ය පාලනයක් උදෙසා ආයතන නිර්මාණය වුණා.
 
 රටේ තියෙන්නෙ නියෝජිත ප‍්‍රජාතන්ත‍්‍රවාදී ක‍්‍රමයක්. නිදහසින් පසුව මැදි ආදායම් රටක් බවට පත්වෙලා, දැනට අඩු මැදි ආදායම් රටක් බවට ඉදිරියට යමින්, ප‍්‍රගතිශීලී ප‍්‍රජාතන්ත‍්‍රවාදී රටක් හැටියට, නුතනවාදී රටක් හැටියට, ප‍්‍රශස්ත ප‍්‍රජාතන්ත‍්‍රවාදී ක‍්‍රමවේදයේ ඉදිරි පියවර තබන මොහොතක, අප කළ යුත්තේ ජනතා ස්වෛරීත්වය ජනතා පරමාධිපත්‍ය පලදු කරන එක නොවෙයි. අප කළ යුත්තේ ජනතා පරමාධිපත්‍ය ශක්තිමත් කිරීමයි. පාර්ලිමේන්තුවට ඉදිරිපත් කරන කෙටුම් පතකට විරුද්ධව, අණ පනතකට විරුද්ධව, මේ රටේ සිවිල් පුරවැසියන්ට අධිකරණයට යාමේ කාල සීමාව, සීමා වෙනකොට එතන සිදුවන්නේ ජනතා ස්වෛරීත්වය හීන වීමක්. බාල්දු වීමක්.
 
 නූතන ප‍්‍රජාතන්ත‍්‍රවාදී ක‍්‍රමවේදය තුළ, අපි ඉදිරියට යන්න ඕනෙ. ප‍්‍රගතියක් ලබන්න ඕනෙ. නමුත් අද සිදුවන්නේ ජනවරමක් හා ඒ වරමේ නාමයෙන්, බලය එක තැනක කේන්ද්‍ර ගත කරගෙන ඒකාධිපති ස්වරූපයකින් රටේ ව්‍යවස්ථාව නිර්මාණය කරලා, ප‍්‍රජාතන්ත‍්‍රවාදී ක‍්‍රමවේදයට තියන ඉඩකඩ අසුරලා රටේ තිබෙන ප‍්‍රජාතන්ත‍්‍රවාදී රාමුව, සහමුලින්ම ඒකාධිපති රාමුවක් බවට පත් කිරීමේ වැඩපිළිවෙළකුයි. ඒ නිසා රටේ ජනතාව තීන්දු කරන්නට ඕනෙ. ප‍්‍රසම්පාදන කොමිසමක් නිර්මාණය කිරීම යහපත් රාජ්‍ය පාලනයකට අවශ්‍ය දෙයක්ද නැති දෙයක්ද කියල. හොඳට හිතලා බැලූවොත් ප‍්‍රසම්පාදන කොමිසමේ වාසි රැුසක් රටට වගේම ජනතාවට තියෙනවා.
 
 රටක් දුවන්නෙ රාජ්‍ය ආදායම තුළින්. රාජ්‍ය ආදායම ලැබෙන්නේ බදු මුදල්වලින්. බදු අය කරන්නේ තමුන්නාන්සේලාගේ සම්පත්වලින්. එහෙමනම් තමුන්නාන්සේලාගේ බදු මුදල් වශයෙන් එකතු වෙන රාජ්‍ය ආදායම, පරිහරණය කිරීමේදී ඇඟිලි ගසන්නට බැරි ප‍්‍රසම්පාදන කොමිසමක් අවශ්‍ය වෙනවා. විනිවිදභාවයෙන් යුතු ප‍්‍රසම්පාදන කොමිසමක් දියුණු ප‍්‍රජාතන්ත‍්‍රවාදී රටකට අවශ්‍ය වෙනවා. විගණන කොමිසම අත්‍යවශ්‍යම දෙයක්. මොන රටක ද විගණන කොමිසමක් ගෙන එන්නේ, ජනාධිපතිවරයාගේ අගමැතිවරයාගේ, ඒ ආයතන වල මුදල් විගණනය තහනම් කරපු සංශෝධන. මේවා කොයි රටේ ද ගෙන එන්නේ. මේක ද දියුණු ප‍්‍රජාතන්ත‍්‍රවාදය. මේක ද නූතන ප‍්‍රගතිශීලී ගමන.
 
 අපට පෙනෙනවා මෙම ආණ්ඩුක‍්‍රම ව්‍යවස්ථා සංශෝධනය, රටේ යහපත කේන්ද්‍ර කර ගත් සංශෝධනයක් නෙමෙයි. පුද්ගලයින් කේන්ද්‍ර කර ගත් සංශෝධනයක්. අහවල් පුද්ගලයාගේ බලය පළුදු කරනවද අහවල් පුද්ගලයව පියන් කෙනෙක් ගානට වට්ටනවද, අනිත් පුද්ගලයාට දේශපාලනය කිරීමට මන්ත‍්‍රී භාවය ලබන්නට තියෙන ඉඩ ප‍්‍රස්ථාව අහිමිවුණු පුද්ගලයන්ට ඒ තත්ත්වය ලබන්න අවසර දෙනවද, බලය නැවතත් අගමැතිවරයා ළඟින් ජනාධිපතිවරයා ළඟට කේන්ද්‍රගත කරන්න කටයුතු කරනවා ද. මේ පුද්ගලයින් කේන්ද්‍ර කර ගත් ව්‍යවස්ථා සංශෝධන රටට ඉතාමත්ම අහිතකරයි. අපි පිළිගන්නට ඕනේ, දහනම වැනි සංශෝධනය අංගසම්පූර්ණ සංශෝධනයක් නෙවෙයි. ඒවායේ අඩුපාඩුකම් තියෙනවා. ගැටලූ තියෙනවා.
 
 නමුත් අඩුපාඩුකම් හා ගැටලූ තිබූ පමණින් රටට වැදගත් වන ඒ ආයතන හා ප‍්‍රතිපත්තීන්, සම්පූර්ණයෙන් විනාශ කිරීම නෙමෙයි අප කළ යුත්තේ. ඒ අඩුපාඩුකම් මගහරවාගෙන ඒ නිර්මාණය වුණු ආයතන වැඩි වැඩියෙන් ශක්තිමත් කිරීමයි. වැඩි වැඩියෙන් ඒවායේ ස්වාධීනත්වය අපි ශක්තිමත් කරන්න ඕනේ. දේශපාලන ඇඟිලි ගැසීම් නතර කරන්නට ඕනේ. ඒ ආයතනවල කාර්යක්ෂමතාවය වර්ධනය කරන්නට අවශ්‍ය මූල්‍ය සම්පත මානව සම්පත භෞතික සම්පත ලබාදෙන්න ඕනේ. අප අදහස් කරන දහනවයෙන් ඉදිරියට වැඩපිළිවෙළ අන්න එයයි. එතනින් අපි නතර වෙන්නේ නැහැ. අපි සාකච්ඡුා කරගෙන යනවා යම් වැඩ පිළිවෙළක් ජාතික ආරක්ෂාවටත්, දහ නමයට ඔබ්බෙන් ක‍්‍රියාත්මක කරන්න. හැමෝම කතා කරනවා ජාතික ආරක්ෂාව ගැන.
 
 නමුත් රටේ ජාතික ආරක්ෂක කවුන්සිලයට යම්කිසි පැහැදිලි නීතිමය පදනමක් නැහැ. අපි සූදානම් වෙනවා අපි අදහස් කරන දහනමයෙන් ඉදිරියට වැඩපිළිවෙළ තුළ, රටේ ජාතික ආරක්ෂක කවුන්සිලය ස්ථාපිත කිරීම ඇතුළු, ජාතික ආරක්ෂාව තහවුරු කරන වැදගත් වැඩසටහනකට ඉදිරියට යන්න. අපි විස්සට විරුද්ධයි. විරුද්ධයි පමණක් නොවෙයි. සමගි ජනබලවේගය ප‍්‍රමුඛ විපක්ෂයේ සිවිල් සංවිධාන හැම බලවේගයක්ම එකතු කරගෙන 20 පරාජය කරනවා කරනවාමයි කියන එක මේ අවස්ථාවේ කියන්න කැමැතියි. හැබැයි 20 පරාජය කරනකොට අපි එක දෙයක් මතක තියාගන්න ඕන. 19 බිහිවෙනකොට තිබුණු සමාජ දේශපාලන වපසරිය නෙමෙයි අද තියෙන්නෙ. හාත් පසින්ම ඒක වෙනස්.
 
 ඒකෙන් අදහස් කරන්නෙ නෑ 19 ජනතාවාදී ප‍්‍රගතිශීලී ප‍්‍රජාතන්ත‍්‍රවාදී ප‍්‍රතිපාදන අහිමි කරනවා කියලා. නෑ අහිමි කරන්නෙ නෑ අපි ඒවා තවදුරටත් ශක්තිමත් කරනවා. නමුත් තවදුරටත් ඒවා ශක්තිමත් කරමින් අපි අවබෝධ කරගන්න ඕන දහනමයෙන් ඉදිරියට යන ව්‍යාපාරය පවතින දේශපාලන ආර්ථික සමාජීය සංස්කෘතික ආගමික වපසරිය. මේක වපසරිය අවබෝධ කරගෙන ඉදිරියට යන ගමනක්. දෙදහස් පහළවේ තත්ත්වෙ නෙමෙයි අද තියෙන්නේ. මේ ගමන අපි හඳුනා ගෙන ප‍්‍රගතිශීලීව ඒ වැඩපිළිවෙළ ක‍්‍රියාත්මක කරන්න ඕනෙ. ඒ වගේම මම පැහැදිලිව කියන්නට කැමතියි, මේ 20 වෙනුවෙන් පෙනී සිටි කණ්ඩායම, හොඳට අවබෝධ කරන්න, මේ 20 ගෙන ආපු කණ්ඩායම හෝ පුද්ගලයා මේ වෙනකොට මේ පොළෝ තලෙන් අතුරුදන් වෙලා.

Source From local-news AM
Author:
#SriLanka #News #lka