“සිරිකොත අල්ලන්න අපි එන්නේ නෑ – දැන්වත් රනිල් සජිත්ට කතා කරලා වෙච්චි වැරැද්ද හදන්න” – නලින්

සිරිකොත පක්ෂ මූලස්ථානයට කඩාවැදී එහි බලය අල්ලාගැනීමේ වුවමනාවක් සමගි ජන බලවේගයේ කිසිවෙකුටත් නොමැති බවත් දැන්වත් එක්සත් ජාතික පක්ෂයේ නායකයින් එකතු වී සාකච්ඡා කර, රනිල් වික්‍රමසිංහ මහතා සෘජුවම සජිත් ප්‍රේමදාස මහතා සමඟ ද සාකච්ඡා කර මෙතෙක් සිදුවූ වැරදි නිවැරදි කරගත යුතු බවත් සජබ අපේක්ෂක නලින් බණ්ඩාර මහතා පවසයි. 

නලින් බණ්ඩාර ජයමහ මහතා මේ බව පැවසුවේ පෙරේදා (07) දිනයේදී මාධ්‍ය අමතමිනි. 

එහිදී ඒ මහතා මෙසේ අදහස් දැක්විය.

“අපි කියනවා රනිල් වික්‍රමසිංහ මැතිතුමා ඇතුළු කණ්ඩායමට අපි මේ සිරිකොතවල් අල්ලන්න කවුරුත් එන්නෙ නෑ, සත්‍ය තේරුම් අරගෙන වහාම ක්‍රියාත්මක වෙලා පක්ෂයේ එක්කෝ සම්මේලනයක් කැඳවලා එක්කෝ පරණ හිටපු කෘත්‍යාධිකාරී මණ්ඩලය කැඳවලා මේ සියලු දෙනාම එක්ක එකතු වෙලා … එහෙම නැත්නම් රනිල් වික්‍රමසිංහ මහත්තයාට සජිත් ප්‍රේමදාස මහත්තයත් එක්ක කතා කරලා නැවත මේ වැරැද්ද නිවැරදි කරන්න කටයුතු කරන්න කියලා. 

මේ පක්ෂය පල්ලම් බස්සලා. මේ අය දැන්වත් මේ වැරැද්ද නිවැරදි කරන්නෙ නැත්නම් මේ ඓතිහාසික පක්ෂය විනාශ වෙලා යයි. ඉතිං තවදුරටත් රනිල් වික්‍රමසිංහ මහත්තයාව රවට්ටපු මේ වටේ ඉන්න නඩයේ වැරදි උපදෙස් හින්දා තමයි මේ අයට මේ ඉරණම අත්වුණේ. දැන් බලන්නකො එක්සත් ජාතික පක්ෂයෙන් ඉල්ලපු දැවැන්තයෝ සේරම පරාදයිනෙ” යනුවෙන් ඒ මහතා සඳහන් කළේය. 

Source From local-news AM
Author:
#SriLanka #News #lka