“රට බෙදන්න ව්‍යවස්ථාව හැදුවෙත් උගත්තු – උගතුන් විතරක් පාර්ලිමේන්තු යවන්න කියන කතාවට මම විරුද්ධයි”

කලා නිර්මාණ බිහි කරන්නත්, ඒවා රස විඳින්නත් මනසට නිදහස තිබිය යුතුයි. ඒ සඳහා රටේ ජාතික ආරක්‍ෂාව තහවුරු විය යුතු යැයි කොළඹ දිස්ත‍්‍රික් ශ‍්‍රී ලංකා පොදුජන පෙරමුණේ අපේක්‍ෂක රියර් අද්මිරාල් ආචාර්ය සරත් වීරසේකර මහතා පැවසීය.
 
ඒ මහතා එසේ සඳහන් කළේ කැස්බෑව ආසනයේ ප‍්‍රවීණ කලාකරුවන් රැසක් පිළියන්දල සංවිධානය කර තිබූ රැස්වීමක් අමතමිනි.
 
එහිදී සරත් වීරසේකර මහතා මෙසේද කීවේය.

“ත‍්‍රස්තවාදින් බෝම්බ පුපුරුවන විට අපට සතුටින් ඉන්න බෑ. බෝම්බයක් පිපුරුවාහැරිය විට ඒ ස්ථානයට ඇවිත් අවට විනාශ කිරීමවත් ත‍්‍රස්තවාදීන්ගේ දෙමාපියන්ට හිංසා පීඩා කිරීමවත් නෙවෙයි ජාතික ආරක්‍ෂාව කියන්නේ. ප‍්‍රහාරයක් එන්න පළමුව ත‍්‍රස්තවාදියා හඳුනා ගැනීමත් ත‍්‍රස්ත ක‍්‍රියා අඩපන කිරීමත් තමයි ජාතික ආරක්‍ෂාව කියන්නේ. රටක කොඳු නාරටිය ජාතික ආරක්‍ෂාව නම් ජාතික ආරක්‍ෂාවේ කොඳු නාරටිය බුද්ධි අංශයයි. මහින්ද රාජපක්‍ෂ මැතිතුමා යටතේ අපි යුද්ධය දිනනකොට බුද්ධි බළකා තිබුණේ තුනයි. යුද්ධයෙන් පස්සේ එම අංශය තවත් වර්ධනය කළා. ඒ නිසා පසු කාලයේ එල්ල වීමට ඉඩ තිබූ ත‍්‍රස්ත ක‍්‍රියා වැළකී ගියා. අන්තවාදී අදහස් ඉගැන්වූ ගුරුවරු 160 ක් අපි රටින් පිටුවහල් කළා බුද්ධි අංශය නිසා. නමුත් යහපාලන ආණ්ඩුවේදී රණවිරුවන් සිරගෙවල්වල දැම්මා යුද අපරාධ කළා කියා. ඒ අය දැන් හිරෙන් ඇවිත් හිටියත් සාක්‍ෂි නැති නිසා නඩු දාන්න බැරුව ඉන්නවා. බුද්ධි අංශ නැති නිසා තමයි කිලෝ ගණන් බර බෝම්බ පිටේ බැඳගෙන ගිහින් මේ රටේ හෝටල් හා ආගමික ස්ථාන කිපයක් අන්තවාදීන් විසින් විනාශ කළේ. ගෝඨාභය රාජපක්‍ෂ මැතිතුමා ආපු හැටියේ බුද්ධි බළකාය ශක්තිමත් කළා. ඒ නිසා ඉදිරියේදී බෝම්බ ප‍්‍රහාර එල්ල වේවි කියා හිතන්නේ නෑ. ඒ වගේම අද කථාවක් තියෙනවා පාර්ලිමේන්තුවට යා යුත්තේ උගත් බුද්ධිමත් අයයි කියලා. ඒකට මම සම්පූර්ණයෙන් විරුද්ධයි.”

“මොකද මේ රට බෙදන ව්‍යවස්ථාව හැදුවේ, හම්බන්තොට වරාය විකුණන්න කටයුතු කළේ, මහ බැංකු කොල්ලය කළේ පාර්ලිමේන්තුවේ හිටපු උගත් අය තමයි. උගත් බුද්ධිමත් අය වගේම දේශයට ආදරය කරන මාතෘ භූමියට ආදරය කරන අය තමයි පාර්ලිමේන්තුවට යැවිය යුත්තේ. එවැනි අය කවුද කියන එක තමයි හඳුනාගත යුත්තේ. ජනතාවට මාතෘභූමියට ආදරය කරන අය පාර්ලිමේන්තුවට ගියාම කවදාවත් රට, ජනතාව, රණවිරුවන් පාවා දෙන්නේ නෑ. ඒ නිසා මෙවර මැතිවරණයේදී ඉතා කල්පනාවෙන් ඡුන්දය පාවිච්චි කළ යුතුයි. මේ රටේ ත‍්‍රස්තවාදය විනාශ කරන්න රණවිරුවන් සෘජුව දායක වුණා. මහජනතාව ඇතුළු කලා ශිල්පීන් වක‍්‍රව එයට දායක වුණා. බොහෝ කලා නිර්මාණවලින් යුද්ධ කරන සෙබළාගේ මානසිකත්වය වර්ධනය වුණා. යුද සමයේ මෙරට බිහි වූ සමහර නිර්මාණවලින් යුද සෙබළාගේ මානසිකත්වය අඩපණ කළා නම්, බිරිඳගේ ගරුත්වය කෙළසුනා නම්, එය ත‍්‍රස්තවාදය වර්ධනය කිරීමක්. අන්න ඒ නිසා තමයි මම යම් යම් සිනමා අධ්‍යක්‍ෂවරුන් සමඟ පටලැවිලි ඇතිකර ගත්තේ. මමත් මගේ මවත්, බිරිඳත් කලාවට සම්බන්ධයි. ඒ නිසා කලාකරුවන් ඇතුළු ජනතාව සමගයි මා ඉන්නේ. ජනාධිපතිතුමාගේ ඉල්ලීම මත මම මෙවර මැතිවරණයට කොළඹ දිස්ත‍්‍රික්කයෙන් තරග කරනවා.’’