මහින්දානන්ද ක්‍රීඩකයන්ගෙන් සමාව ගත යුතුයි – නවීන්

මහින්දානන්ද ක්‍රීඩකයන්ගෙන් සමාව ගත යුතුයි -  නවීන්

පදනම් විරහිත චෝදනා එල්ල කොට බොරුවක් ප්‍රචාරය කිරීම වෙනුවෙන් හිටපු අමාත්‍ය මහින්දානන්ද අලුත්ගමගේ මහතා ක්‍රිකට් ක්‍රීඩකයන්ගෙන් සමාව ගත යුතු බව එක්සත් ජාතික පක්ෂයේ ජාතික සංවිධායක, හිටපු අමාත්‍ය නවීන් දිසානායක මහතා පවසයි.

ජාතික ජනබලවේගයේ ක්‍රීයාකාරීන් පිරිසක් හමුවීමෙන් පසුව මාධ්‍යවේදින් විසින් නගන ලද ප්‍රශ්ණවලට පිලිතුරු දෙමින් ඒ මහතා එසේ කීය.

එහිදී වැඩිදුරටත් අදහස් දැක්වු ඒ මහතා,

“සාක්ෂි නැතිව චෝදනා ඉදිරිපත් කිරීම ඉතාමත් වැරදි ක්‍රියාවක්. අලුත්ගමගේ හිටපු ඇමැතිතුමා ඉදිරිපත් කරලා තියෙන  මේ  පදනම් විරහිත චෝදනා අද නිෂ්ඵල වෙලා තියෙනවා. ඒ නිසා එතුමා ඒකට වගකීම භාරගත යුතුයි. මෙම ක්‍රියාවෙන් ක්‍රිකට් ක්‍රීඩකයන් අපහසුතාවයට පත් කිරීම හා ඔවුන්ට හිරිහැර කිරීම සම්බන්ධයෙන් අපි දැඩි ලෙස විරෝධය හා පිලිකුල  ප්‍රකාශ කරනවා. ඒක මට දැනෙන්නේ ඡන්ද ගුන්ඩුවක් කියලයි. කිසිම සාක්ෂියක් නොමැතිව කිසිම හේතුවකින් තොරව සිදු කරන ලද මෙම ප්‍රකාශ නිකන් බොරු ප්‍රකාශයක් හැටියට මා දකිනවා. එතුමා ක්‍රිකට් ක්‍රීඩකයන්ගෙන් සමාව ගත යුතුයි.”

වතුකරයේ ජනතාවගේ පැහැදිලි කැමැත්ත එක්සත් ජාතික පක්ෂය හා අලියා ලකුණයි. ඔවුන් එයින් පරිභාහිරව ඡන්දය ප්‍රකාශ කරන්නේ නැති බව මට විශ්වාසයි. අපි මෙවර මහ මැතිවරණයේදි නුවරඑළිය දිස්ත්‍රික්කයෙන් එක්සත් ජාතික පක්ෂය අලියා ලකුණ යටතේ මන්ත්‍රී ආසන දෙකක් අනිවාර්යෙන්ම ලබා ගන්නවා. අපි ටිකක් වැඩිපුර මහන්සි වුවහොත් මන්ත්‍රී ආසන තුනකට යන්න පුළුවන්. ලංකා ජාතික වතු කම්කරු සංගමයේ අළුත් සභාපතිවරයා හැටියට මට විරුද්ධව දිගම්බරන් හිටපු ඇමැතිතුමා විශාල බොරු ප්‍රචාරයක් ගෙන යනවා වතු කම්කරුවන්ට රුපියල් 1000 ක වැටුප දීමට මම විරුද්ධ උනා කියලා. ඇත්ත වශයෙන්ම එහෙම දෙයක් වෙලා නැහැ. මෙම රුපියල් 1000 දෙන්න එකග  වන්නේ වතු සමාගම් හා වෘත්තීය සමිති අතර සාකච්ඡාවලින් පසුවයි. ඒකට මට කිසිම බලපෑමක් සිදු කරන්න බැහැ”යැයිද ඒ මහතා වැඩිදුරටත් පැවැසීය.

Source From local-news AM
Author:
#SriLanka #News #lka