බන්ධනාගාර කොමසාරිස් අධිකරණයෙන් සමාව ගනී

බන්ධනාගාර භාරයේ සිටින මත්ද්‍රව්‍ය ජාවාරමකට සම්බන්ධ නඩුවක විත්තිකරුවකු අධිකරණයට ඉදිරිපත් කිරීමට පෙර නඩු දිනයේ අපොහොසත් වීම සම්බන්ධයෙන් ලිඛිතව අධිකරණයෙන් සමාව ඉල්ලා සිටි බන්ධනාගාර කොමසාරිස් ජනරාල් තුෂාර උපුල්දෙණිය මහතා මින් ඉදිරියට එවැනි සිදුවීමක් නොවීමට වගබලා ගන්නා බවට ද කොළඹ මහාධිකරණයට ඊයේ (09) ලිඛිතව පොරොන්දුවක් ලබා දී තිබේ.
 
සෙල්වරාජා සහදේවන් නමැති විත්තිකරුවකු ඉදිරිපත් නොකිරීම සම්බන්ධයෙන් පෞද්ගලිකව අධිකරණය හමුවේ පෙනී සිට නිදහසට කරුණු දක්වන ලෙස දන්වා කොළඹ මහාධිකරණ විනිසුරු දමිත් තොටවත්ත මහතා විසින් බන්ධනාගාර කොමසාරිස් ජනරාල්වරයාට ඉකුත් දිනෙක නොතීසි නිකුත් කර තිබිණි.
 
එකී නියෝගය ප‍්‍රකාරව බන්ධනාගාර කොමසාරිස්වරයා වෙනුවෙන් අධිකරණය හමුවේ පෙනී සිටි කොළඹ නව මැගසින් බන්ධනාගාරයේ අධිකාරිවරයා කොමසාරිස් ජනරාල්වරයාගේ එකී ලිඛිත පොරොන්දුව හා සමාව ඉල්ලා සිටීමේ ලිපිය අධිකරණයට ඉදිරිපත් කළේය.

කොරෝනා වසංගත තත්ත්වය මර්දනය සම්බන්ධයෙන් ඊයේ (09) විශේෂ රැස්වීමක් පැවැත්වෙන බැවින් තමාට පෞද්ගලිකව අධිකරණය හමුවේ පෙනී සිටීමේ හැකියාව නොමැති බවද බන්ධනාගාර කොමසාරිස් ජනරාල්වරයා එකී ලිපිය මගින් අධිකරණය දැනුවත් කර ඇතැයි මහාධිකරණ විනිසුරු දමිත් තොටවත්ත මහතා විවෘත අධිකරණය හමුවේදී පෙන්වා දුන්නේය.

මත්ද්‍රව්‍ය ජාවාරමට සම්බන්ධ නඩුවේ විත්තිකරුව ඊයේ (09) අධිකරණය හමුවට ඉදිරිපත් කිරීමට ද බන්ධනාගාර අධිකාරිවරයා පියවර ගෙන තිබිණි.