කොවිඩ් 19ට එරෙහිව බන්ධනාගාර තුල හදිසි සැලැස්මක් ක්‍රියාවට නැංවීමට ඇමති සුදර්ශිනීගෙන් උපදෙස්

රට තුළ පවතින තත්වය අනුව කොවිඩ් 19 බන්ධනාගාරතුළට ඇතුළුවීමට ඇති අවස්ථා අවම කිරීමත් යම් හෙයකින් කොවිඩ් 19 ආසාදිත‍යින් බන්ධනාගාර තුළින් හදුනාගතහොත් ඒ සම්බන්ධයෙන් ක්‍රියාකල යුතු ආකාරය පිළිබදව පූර්ව හදිසි සැලසුමක් සකස් කර ක්‍රියාවේ යෙදවීමට බන්ධනාගාර ප්‍රතිසංස්කරණ හා සිරකරුවන් පුනරුත්ථාපන රාජ්‍ය අමාත්‍ය විශේෂඥ වෛද්‍ය සුදර්ශිනී ප්‍රනාන්දුපුල්ලේ මහත්මිය විසින් බන්ධනාගාර බලධාරීන්ට උපදෙස් ලබාදී තිබේ.

කොවිඩ් 19 සමග කටයුතු කිරීමේදී අනුගමනය කල යුතු සෞඛ්‍ය මාර්ගෝපදේශයන් පිළිබදව කාර්ය මණ්ඩල, සෞඛ්‍ය සේවා සපයන්නන් සහ බන්ධනාගාර නිලධාරීන් නිරන්තරයෙන් දැනුවත් කිරීමත් එමගින් බන්ධනාගාරවල සහ වෙනත් රැදවුම් ස්ථානවල කොවිඩ් 19ට ප්‍රතිචාර දැක්වීමේදී වැදගත් මානව හිමිකම් අංග කෙරෙහි ගරු කරමින් ක්‍රියාකිරීම අවධාරණය කෙරෙන අයුරින් සකස් කිරීමටත් කටයුතු කරන ලෙස රාජ්‍ය ඇමතිනිය මෙහිදී උප‍දෙස් ලබාදී තිබේ.

COVID-19 විශාල වශයෙන් පැතිරීම වැළැක්වීම සහ ආසාදන පැතිරීම පාලනය කිරීම අත්‍යවශ්‍ය වන අතර එම වැඩපිළිවෙල ඔස්සේ බන්ධනාගාරවල ජීවත්වන, වැඩ කරන සහ සංචාරය කරන සියලු දෙනාගේ සහ සාමාන්‍ය ජනතාවගේ සෞඛ්‍යය හා යහපැවැත්ම ආරක්ෂා වන පරිදි කටයුතු සිදු කිරීමේ වැදගත්කම රාජ්‍ය ඇමතිනිය මෙහිදී පෙන්වාදෙන ලදි.

බන්ධනාගාර ජනගහණය වෙත මෙවැනි වෛරසයක් පැතිරීමේ අවධානම වැඩි අතර එය අවමකර ගැනීම සදහා පහත සදහන් හදිසි පියවරයන් අනුගමනය කිරීමට උපදෙස් ලබාදී ඇත.

1. සිරකරුවන්ගේ සියලු චලනයන් සීමා කිරීම

අ) බන්ධනාගාර අතර සිරකරුවන් මාරු කිරීම සීමා කිරීම

ආ) නැවත දැනුම් දෙන තුරු සිරකරුවන් බාහිර වැඩවලට නොයැවීම

ඇ) උසාවි සංචාරය හැකිතාක් සීමා කිරීම

ඈ) නැවත දැනුම් දෙන තුරු අමුත්තන් හෝ පිටත ආහාර ලබානොදීම

2. සියළුම බන්ධනාගාර නිලධාරීන් සෑම විටම අවදානම් හැසිරීම් සහ අනාරක්ෂිත පියවරයන්හි නිරත නොවිය යුතුය. කිසියම් ආකාරයක නිරාවරණයක් ඇත්නම් වහාම හා අවශ්‍ය පියවර සදහා දැනුම් දිය යුතුය.

3. බන්ධනාගාර කාර්ය මණ්ඩලය අභ්‍යන්තර හා බාහිර වශයෙන් වෙනම කණ්ඩායම් වැඩ කළ යුතුය. ඔවුන් එකට මිශ්‍ර නොවිය යුතුය. පෙර නියම කළ පරිදි දැඩි සෞඛ්‍ය නියාමන ක්‍රියාමාර්ග අනුගමනය කළ යුතුය.

4. හුදකලා මධ්‍යස්ථානවල සිටින සියලුම නව සිරකරුවන් බන්ධනාගාර වෙත යැවීමට පෙර PCR වලට භාජනය විය යුතුය. (වසංගත රෝග විද්‍යා ඒකකය සමඟ සහසම්බන්ධ වීම අවශ්‍යය).

යම් හදිසි අවස්ථාවක් මතුවුවහොත් ඇදන් 180ක ධාරිතාවයකින් යුත් වැළිකඩ බන්ධනාගාර රෝහල ප්‍රතිකාර මධ්‍යස්ථානයක් ලෙස භාවිතා කිරීමටත් අගුනකොළපැලස්ස බන්ධනාගාර රෝහල සහ දුම්බර බන්ධනාගාර රෝහල ප්‍රතිකාර මධ්‍යස්ථාන ලෙස සකස් කිරීම කෙරෙහිත් අවධානය යොමුව ඇත. මේ සදහා අවශ්‍ය සෞඛ්‍ය කාර්ය මණ්ඩල සහ උපකරණ සෞඛ්‍ය අමාත්‍යාංශයේ සහයෝගයෙන් ලබාගැනීමටත් අවධානය යොමුකර ඇත.

රාජ්‍ය ලේකම් ගීතාමනී කරුණාරත්න මහත්මිය, බන්ධනාගාර කොමසාරිස් ජනරාල් තුෂාර උපුල්දෙනිය මහතා ඇතුළු කොමසාරිස්වරුන් සහ බන්ධනාගාර සෞඛ්‍ය සේවා නියෝජ්‍ය අධ්‍යක්ෂ සමග පැවැති සාකච්ඡාවකදී  මෙම උපදෙස් ලබාදී ඇත.