19 වැනි ව්‍යවස්ථා සංශෝධනය අහෝසි කිරීම සඳහා නව ව්‍යවස්ථා සංශෝධනයක් ගෙන එන්නේ නම් ඊට පෙර ඒ සම්බන්ධයෙන් දේශපාලන පක්ෂ, සිවිල් සංවිධාන, විද්වතුන්, සාමාන්‍ය ජනතාව ඇතුළු සියලු පාර්ශ්වවල අදහස් සැලකිල්ලට ගතයුතු බව හිටපු කතානායක කරු ජයසූරිය මහතා පවසනවා. එසේම නව ව්‍යවස්ථා කෙටුම්පත සකස් විය යුත්තේ එම සියලු පාර්ශ්වයන්ගේ මත නියෝජනය වන පරිදි බවයි හිටපු කතානායකවරයා නිවේදනයක් නිකුත් කරමින් කියා සිටින්නේ.
ප්‍රජාතන්ත්‍රවාදය හා නීතියේ ආධිපත්‍යය ආරක්ෂා කිරීම අතින් 19 වැනි ව්‍යවස්ථා සංශෝධනය අතිශය වැදගත් බවත් කරු ජයසූරිය මහතා පෙන්වා දෙනවා. ඒ නිසා එම සංශෝධනයේ ඇති ප්‍රජාතන්ත්‍රවාදය සහ නීතියේ ආධිපත්‍යය ආරක්ෂා කරන වගන්ති කිසිසේත් වෙනස් නොවිය යුතු බවයි ඔහු පවසන්නේ.
එහි ප්‍රජාතන්ත්‍රික සාරය ආරක්ෂා කරමින් එහි ඇති තාක්ෂණික දුර්වලතා පිළිබඳව මනා විශ්ලේෂණයක් හා ඇගයීමක් සිදුකර එම තාක්ෂණික දුර්වලතා අහෝසි කිරීම පමණක් නව ව්‍යවස්ථා සංශෝධනයේ අරමුණ වියයුතු බව ද කරු ජයසූරිය මහතා පවසනවා.
ලොව සාඩම්බර දේශයක් ලෙස ශ්‍රී ලංකාවට නැගී සිටිමට නම් ප්‍රජාතන්ත්‍රවාදය හා නීතියේ ආධිපත්‍යය කෙරෙහි ගෞරවය අත්‍යවශ්‍ය බවද කරූ ජයසූරිය මහතා නිකුත් කළ නිවේදනයේ සඳහන් වේ.
The post 19 වෙනස් කරන්නේ නම් ඒ පිළිබඳ පුළුල් කතිකාවක් අවශ්‍යයි – කරු ජයසූරිය appeared first on ColomboXnews.
Source From Colomboxnews
Author: Kamal Dhammika
#SriLanka #News #lka