13 අහෝසි කිරීම ගැන සාකච්ඡාවක් නෑ – අලි සබ්‍රි

20 වැනි සංශෝධනය ගෙන ඒම ප්‍රධාන අරමුණ 19 වැනි සංශෝධනය තුළ තිබෙන අඩුපාඩු අවම කර ගැනීම බව අධිකරණ අමාත්‍ය අලි සබ්‍රි මහතා පවසයි.

19 වැනි ව්‍යවස්ථා සංශෝධනය හරහා ආණ්ඩුක්‍රම ව්‍යවස්ථාව තුළ ගැට රාශියක් ගසා ඇති බවත්, ආණ්ඩුවට නිදහසේ වැඩ කිරීමේ අවස්ථාව අහිමි කර ඇති බවත් ඇමතිවරයා පෙන්වා දෙයි.

අලි සබ්‍රි මහතා මේ බව සඳහන් කළේ අස්ගිරි මල්වතු මහ නාහිමිවරුන් හමුවීමෙන් පසු මාධ්‍ය වෙත අදහස් දක්වමිනි.

එහිදී මාධ්‍යවේදීන් ඇමතිවරයාගෙන් විමසා සිටියේ 13 වැනි ව්‍යවස්ථා සංශෝධනය අහෝසි කිරීම හෝ අලුතෙන් උප අගමැති ධුරයක් ස්ථාපිත කිරීම නව සංශෝධනය හරහා සිදුවන්නේද යන්න පිළිබඳවයි.

ඊට පිළිතුරු දෙමින් ඇමතිවරයා සඳහන් කළේ එවැනි වෙනස් කිරීම් සම්බන්ධයෙන් සාකච්ඡා කර නොමැති බවයි. විශේෂයෙන් උප අගමැති ධුරයක් ස්ථාපිත කිරීම පිළිබඳව ආණ්ඩුව තුළ හෝ කැබිනට් මණ්ඩලය තුළ කිසිදු සාකච්ඡාවක් සිදුව නොමැති බව ඇමතිවරයා අවධාරණය කරයි.

13 වැනි ස‍ංශෝධනය පිළිබඳව හෝ එය අහෝසි කිරීම පිළිබඳව හෝ දැනට කිසිදු සාකච්ඡාවක් සිදුව නොමැති බව පෙන්වා දෙන ඇමතිවරයා පවසන්නේ එම කරුණ පිළිබඳව අවධානය යොමු කරන්නේ නව ව්‍යවස්ථාවක් සකස් කිරීමේදී පමණක් බවයි. ඒ පිළිබඳව ඉදිරියේදී අවධානය යොමු කරන බවත් දැනට අත්‍යවශ්‍යම කරුණ වී ඇත්තේ 19 වැනි සංශෝධනය හරහා මතුව ඇති ගැටලු විසඳා ගැනීම පමණක් බවත් අලි සබ්‍රි මහතා පෙන්වා දෙයි.

The post 13 අහෝසි කිරීම ගැන සාකච්ඡාවක් නෑ – අලි සබ්‍රි appeared first on ColomboXnews.

Source From Colomboxnews
Author: Kamal Dhammika
#SriLanka #News #lka