සේවා දායකයකුගේ මුදල් ලබාගෙන ඔහු වෙනුවෙන් අධිකරණය හමුවේ පෙනී නොසිටීමේ චෝදනාවට වරදකරු කෙරුණු නීතිඥවරයෙකුගේ නීතිඥභාවය වසර හතක කාලයක් සඳහා අත්හිටුවීමට ශ්‍රේෂ්ඨාධිකරණය තීන්දු කළේය.
විජිත් මළල්ගොඩ, එස්. තුරෙයි රාජා සහ ප්‍රීති පද්මන් සූරසේන යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල විසින් මෙම නියෝගය ප්‍රකාශයට පත් කළේය.
පැමිණිලිකරුගෙන් ලබාගත් රුපියල් ලක්ෂ තුනක මුදල ඔහුට යළි ගෙවන ලෙස ද ශ්‍රේෂ්ඨාධිකරණය විසින් වගඋත්තරකාර නීතිඥවරයාට නියෝග කර තිබේ.
මහනුවර ප්‍රදේශයේ පදිංචි වසන්ත විජයවර්ධන නැමැති පුද්ගලයාගේ නීතිඥභාවය එසේ අත්හිටුවීමට නියෝග කර තිබුණි.
අඹතැන්න ප්‍රදේශයේ පදිංචි ආර්. එම්. කරුණාරත්න බණ්ඩා නමැති පුද්ගලයකු විසින් කරන ලද පැමිණිල්ලක් විභාග කිරීමෙන් අනතුරුව ශ්‍රේෂ්ඨාධිකරණය විසින් මෙම තීන්දුව ප්‍රකාශයට පත්කර තිබේ.
පැමිණිලිකරු සිය පැමිණිල්ලෙන් සඳහන් කර තිබෙන්නේ තමන් විසින් ශ්‍රේෂ්ඨාධිකරණය හමුවේ මූලික අයිතිවාසිකම් පෙත්සමක් ගොනු කළ බවත් එම නඩුව සඳහා පෙනී සිටීමට වග උත්තරකාර නීතිඥවරයා විසින් තමාගෙන් රුපියල් ලක්ෂ තුනක මුදලක් ලබා ගත් බවය.
පසුව මෙම පෙත්සම සලකා බැලීම සඳහා විවෘත අධිකරණයේ කැඳවනු ලැබූ අවස්ථාවේදී අදාළ නීතිඥවරයා ශ්‍රේෂ්ඨාධිකරණය හමුවේ පෙනී නොසිටීම හේතුවෙන් එය අධිකරණය විසින් නිෂ්ප්‍රභ කළ බවද පැමිණිලිකරු සිය පැමිණිල්ලෙන් සඳහන් කර තිබේ.
නිෂ්ප්‍රභ කළ එම පෙත්සම යළි සලකා බැලීම සඳහා වෙනත් දිනක ශ්‍රේෂ්ඨාධිකරණය හමුවේ යළි කැඳවූ අවස්ථාවේ ද මෙම නීතිඥවරයා පෙනී නොසිටීම හේතුවෙන් තමන්ට දැඩි අගතියක් සිදු වූ බව පැමිණිලිකරු ශ්‍රී ලංකා නීතිඥ සංගමයට ඉදිරිපත් කළ පැමිණිල්ලේ සඳහන් කර තිබුණි.
The post සේවාදායකයාගෙන් මුදල් ලබාගෙන අධිකරණයේ පෙනී නොසිටි නීතිඥයාගේ නීතිඥභාවය වසර 7කට අත්හිටුවයි appeared first on ColomboXnews.
Source From Colomboxnews
Author: Kamal Dhammika
#SriLanka #News #lka