අමෙරිකා එක්සත් ජනපදයේ සුනඛයෙකු අතින් අහම්බයකින් ගිනි අවියක් ක්‍රියාත්මක වී පුද්ගලයෙකු ජීවිතක්ෂයට පත් වී තිබේ. ඉකුත් සති අන්තයේ එම අනතුර සිදු වී ඇතැයි එරට කැන්සාස් ප්‍රාන්ත පොලිසිය සඳහන් කර ඇත.
අදාළ සුනඛයා කැබ් රථයක පිටුපස අසුනේ තිබී ඇති තුවක්කුවක් මතට අහම්බයකින් පැන ඇති අතර එහිදී තුවක්කුව ක්‍රියාත්මක වී ඇතැයි විදෙස් මාධ්‍ය වාර්තා කළේ ය.
වෙඩි ප්‍රහාරයට ලක් වූ පුද්ගලයා කැබ් රථයේ ඉදිරිපස මගී අසුනේ සිට තිබේ.
ඔහු සහ සුරතලයට ඇති කරන අදාළ සුනඛයා සෙනසුරාදා (ජන. 21) විනෝදය සඳහා දඩයමේ ගොස් ඇති අතර එහිදී මෙම අනතුර සිදුවී ඇතැයි කැන්සාස් ප්‍රාන්ත පොලිසිය ප්‍රකාශ කර ඇත.
“කැබ් රථයේ හිමිකරුට අයිති සුනඛයෙකු රයිෆලයට උඩට පැනලා ගිනිඅවිය ක්‍රියාත්මක වෙලා. වෙඩි වැදී තුවාල වීම නිසා මගී අසුනේ හිටපු පුද්ගලයා එම ස්ථානයේදී ම මිය ගියා,” සම්නර් ප්‍රාන්ත ෂෙරිෆ් කාර්යාලය ප්‍රකාශ කර තිබේ.
එය දඩයම් කිරීමට ගොස් සිදුවුණු අනතුරක් බවට මූලික පරීක්ෂණවලින් අනාවරණය වී ඇතැයි විදෙස් මාධ්‍ය වාර්තා කළේ ය.
කෙසේ වෙතත්, මියගිය 30 හැවිරිදි පුද්ගලයා සුනඛයාගේ හිමිකරු දැයි නිලධාරීන් ප්‍රකාශ කර නොමැති බව එම වාර්තාවල දැක්වේ.
විදෙස් මාධ්‍ය වැඩිදුරට ත් වාර්තා කළේ, මිනිසුන්ට වඩා තුවක්කු ඇති රටක් වන අමෙරිකා එක්සත් ජනපදයේ අත්වැරදීම්වලින් සිදු වන මෙවැනි අනතුරු බහුල බව ත් එරට රෝග පාලනය සහ වැළැක්වීමේ මධ්‍යස්ථානවල දත්තවලට අනුව, 2021 වසරේදී ගිනි අවි අනතුරුවලින් 500කට වැඩි පිරිසක් මිය ගොස් ඇති බව ත් ය.
The post සුනඛයෙකු අතින් ගිනි අවියක් ක්‍රියාත්මක වීමෙන් පුද්ගලයෙක් මරුට appeared first on ColomboXnews.
Source From Colomboxnews
Author: Kamal Dhammika
#SriLanka #News #lka