සහරාන්ව අත්අඩංගුවට ගන්න බැරිවෙන්න බලපෑ හේතු පාස්කු කොමිෂමේදී හෙළිදරව් වේ.

පාස්කු ප්‍රහාරය වළක්වා ගැනීමට තිබුණු ප්‍රහාරයක් වන බවත් සහරාන්ව අත්අඩංගුවට ගැනීමට හැකිවූයේ නම් වෙනත් ආකාරයටකට මෙය විසඳා ගැනීමට තිබුණු නමුත් සහරාන් හෂීම් අත්අඩංගුවට ගැනීම සඳහා විවිධ දුෂ්කරතා පැවති බව අපරාධ පරීක්ෂණ දෙපාර්තමේන්තුවේ හිටපු ප්‍රධානී ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න මහතා පැවසුවේය. 

ඒ, පාස්කු ප්‍රහාරය සම්බන්ධයෙන් විමර්ශනය කරන ජනාධිපති විමර්ශන කොමිෂන් සභාව හමුවේදීය. 

රවී සෙනෙවිරත්න මහතා මේ බව සඳහන් කළේ අති උතුම් අගරදගුරු කාදිනල් මැල්කම් රංජිත් හිමිපාණන් වහන්සේ වෙනුවෙන් කොමිසම හමුවේ පෙනී සිටි ජනාධිපති නීතිඥ ශමිල් පෙරේරා මහතාගේ හරස් ප්‍රශ්නයකට පිළිතුරු දෙමිනි. 

එහිදී ජාන්ධිපති නීතිඥවරයා විමසා සිටියේ 21 වැනි දින ප්‍රහාරය වළක්වා ගැනීමට හැකියාව තිබුණේද සහ වළක්වා ගැනීමට නොහැකි වූයේ ඇයිද  යන්න විමසීය. 

ඒ අනුව මෙහි මූලික වරද කාගේද යන්න ශමිල් පෙරේරා මහතා  රවී සෙනෙවිරත්න මහතාගෙන් අසා සිටියේය. 

ඊට පිළිතුරු දෙමින් අපරාධ පරීක්ෂණ දෙපාර්තමේන්තුවේ ප්‍රධානී කියාසිටියේ එය විමර්ශනයකින් පසුව තීරණය කළ යුතු බවයි. 

රවී සෙනෙවිරත්න මහතා වෙනුවෙන් පෙනී සිටි නීතිඥ උපුල් කුමාරප්පෙරුම මහතා සිය සේවාදායකයාගෙන් ප්‍රශ්න කර සිටි අතර එහිදී ඔහු විමසා සිටියේ අවසන් මොහොතේ ප්‍රහාරයක් එල්ල වෙන බවට ලද තොරතුරෙන් පසු අපරාධ පරීක්ෂණ දෙපාර්තමේන්තුවට ගත හැකි වෙනත් පියවරක් තිබුණේද යන්නයි. 

ඊට පිළිතුරු දෙමින් රවී සෙනෙවිරත්න මහතා පැවසුවේ ”කිසිම පියවරක් නැහැ ස්වාමීනි” යනුවෙනි. 

සංවිධානාත්මක ලෙස ඊට ක්‍රියාමාර්ග ගත යුතුව තිබුණු අතර ඒ අවස්ථාවේ පොලිස්පතිවරයා මැදිහත්විය යුතු බවද සෙනෙවිරත්න මහතා සඳහන් කරන ලදී. 

එහෙත් එය පොලිස්පතිවරයාට පමණක් තනිව කිරීමට නොහැකි අතර එයට සෙසු ආරක්ෂක අංශවලද සහය හිමිවිය යුතු බව ඔහු ප්‍රකාශ කළේය.

ඒ මොහොතේ නායකත්වයක් දිය යුතු අතර එවැනි තැනක ආරක්ෂක මණ්ඩලයට වගකීමක් පැවරෙනවා  නේදැයි උපුල් කුමාරප්පෙරුම මහතා විමසා සිටියේය. 

එහිදී රවී සෙනෙවිරත්න මහතා කියා සිටියේ ”ඔව් ආරක්ෂක මණ්ඩලය ලෙස එයට නායකත්වය දිය යුතු වෙනවා” යනුවෙනි.  

පාස්කු ප්‍රහාරයෙන් පසු සහරාන් හෂිම්ගේ ප්‍රචණ්ඩත්වයට හසු වූ සියලුම දෙනා අත්අඩංගුවට ගැනීමට හැකි වුවද ආරක්ෂාව සම්පූර්ණයෙන්ම තහවුරු කර ඇති බවට සහතිකයක් දිය නොහැක්කේ සහරාන් මෙහෙය වූ අය නිදහසේ සිටීම බව අපරාධ පරීක්ෂණ දෙපාර්තමේන්තුවේ හිටපු ප්‍රධානී ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න මහතා පැවසුවේය.

සහරාන් හෂීම්ව මෙහෙය වූ බලවේගයක් සිටි අතර තමන් විශ්‍රාම යන තෙක්ම උත්සහ කළේ එම පුද්ගලයා අත්අඩංගුවට ගැනීමට බව ජ්‍යෙෂ්ඨ නියෝජ්‍ය පොලිස්පතිවරයා සඳහන් කළේය.

පාස්කු ප්‍රහාරය සහරාන් හෂිම්ගේ අනුගාමික කණ්ඩායමේ තීරණයක් නොවන අතර එය ඔහුගේ තනි තීරණයක් මත ක්‍රියාත්මක වූවක් බවද කොමිසම හමුවේ සාක්ෂි දෙමින් රවී සෙනෙවිරත්න මහතා කියා සිටියේය. 

වව්නතිව්,මාවනැල්ල,වනාතවිල්ලුව,තාලම්කුඩා බයිසිකල් බෝම්බය පුපුරුවා හැරීම යන සිදුවීම් සම්බන්ධයෙන් ඒ වන විටත් අපරාධ පරීක්ෂණ දෙපාර්තමේන්තුව විසින් විමර්ශන කරමින් සිටි අතර එම  සිදුවීම් පසුපස සහරාන් හෂීම් සහ ඔහුගේ අනුගාමිකයින් සිටි බවට තොරතුරු පැවති හෙයින් අපරාධ පරීක්ෂණ දෙපාර්තමේන්තුව කටයුතු කරමින් සිට තිබුණේ සහරාන් හෂීම් අත්අඩංගුවට ගැනීම සඳහා බවද කොමිසම හමුවේ සාක්ෂි ඉදිරිපත් විය. 

මෙහිදී සාක්ෂිය මෙහෙය වූ රජයේ ජ්‍යෙෂ්ඨ අධිනීතිඥවරයා සාක්ෂිකරු වන අපරාධ පරීක්ෂණ දෙපාර්තමේන්තුවේ හිටපු ප්‍රධානී ජ්‍යෙෂ්ඨ නියෝජ්‍ය පොලිස්පතිවරයාට ප්‍රශ්නයක් යොමුකරමින් විමසුවේ අප්‍රේල් 21 ප්‍රහාරය ක්‍රියාත්මක වීමට තිබුණේ කුමන කාලයකද යන්න දැනුවත්ව සිටියේද යන්නයි.

ඊට පිළිතුරු දෙමින් රවී සෙනෙවිරත්න මහතා පැවසුවේ, ”සහරාන්ගේ ක්‍රියාකාරිත්වය ඇරඹෙන්නේ 2014 වසර වගේ කාලයේ සිට. ප්‍රහාරයක් සම්බන්ධයෙන් තීරණයකට ඇවිල්ලා තිබුණේ 2016-2017 වගේ කාලයේ. මුලින්ම කණ්ඩායමක් යොදලා ප්‍රහාර  සිදුකිරීමට උත්සහ කළත් එය කරගන්න බැරිවෙනවා. ඊට පස්සේ බැරිම තැනක තමා සාදික් කියන තැනැත්තාට කියල තිබුණේ බුදු පිළිමයක ශිර්ෂයට හෝ ගල් පහරක් ගහන්න හරි ඕනේ කියලා. සහරාන් දේශනා පවත්වද්දී ප්‍රහාර ගැන කියද්දී ෆයිටර් කෙනෙක් වෙන්න කැමතිද සූසයිඩර් කෙනෙක් වෙන්න කැමතිද කියල අහනවා. ෆයිටර් කෙනෙක් වෙන්න කැමති වුණත් ලංකාවේ ඒකට තත්ත්වයක් නැති නිසා පිටරටකට ගිහින් ෆයිට් කරන්න කැමති බව තමයි දේශනවලට සහභාගී වෙන අය කියල තිබුණේ. නමුත් සහරාන් කියන්නේ දේශනා කරද්දී හරිම ඇග්‍රසිව් පුද්ගලයෙක්. ඔහු දේශනා කරලා අහද්දී සූසයිඩර් කෙනෙක් වෙනවද කියල ඉන්න අය අත උස්සනවා. 2020 තමයි ඔහු ප්‍රහාරයක් එල්ල කරන්න සැලසුම් කරන්නේ. 2019 ඔහු සලසුම් කරනවා තව දරුවෙක් හදන්න. ඒ නිසා ඔහු බිරිඳව යොමුකරනවා ප්‍රසව හා නාරිවේද වෛද්‍යවරයෙක් වෙත. නමුත් ප්‍රහාරය ගැන 2019 අප්‍රේල් වෙද්දී තීරණය වෙනස් කරනවා. ඉක්මණින් ප්‍රහාරයක් එල්ල කරන්න අවශ්‍ය බව පැවසුවත් ඔහුගේ කණ්ඩායම ඒකට එකඟවෙන්නේ නැහැ. මතභේද මතුවෙනවා. ඔවුන්ගේ කණ්ඩායමේ ප්‍රශ්න මතුවෙනවා. අප්‍රේල් 09 වගේ තමයි තීරණය කරන්නේ ප්‍රහාරයක් සිදුකරන්න. ඒක සහරාන්ගේ තනි තීරණයක්. නමුත් ඒ වෙද්දීත් නිශ්චිත දිනයක් තිබිලා නැහැ. අප්‍රේල් 18 වගේ තමයි නිශ්චිතව දිනය තීරණය කරන්නේ. ප්‍රහාරයෙන් පස්සේ සහරාන්ගේ කණ්ඩායමේ ප්‍රචණ්ඩත්වයට හසු වූ සියලුම දෙනා අත්අඩංගුවට ගත්තා. එත් ආරක්ෂාව තහවුරුයි කියල කියන්න බැහැ. මොකද සහරාන්ට ඉහළින් සහරාන් මෙහෙයවූ පුද්ගලක් ඉන්න බව විමර්ශන වලින් වැටහුණා.  මම විශ්‍රාම යන තෙක්ම උත්සහ කළේ සහරාන්ව මෙහෙය වූ කෙනාව හොයාගන්න” යනුවෙනි. 

බිරිඳ සමඟ වෛද්‍යවරයා මුණගැසීමට පැමිණීමේදී සහරාන්ව අත්අඩංගුවට ගැනීම සඳහා අපරාධ පරීක්ෂණ දෙපාර්තමේන්තුව සැලසුම් කරගෙන තිබුණු බවද  සෙනෙවිරත්න මහතා සාක්ෂි දෙමින් පවසන ලදී. 

 මේ අතර සහරාන් හෂීම්ට අයත් බැංකු ගිණුම් 41 ක් පිළිබඳ කරුණු හෙළිදරව් වී තිබෙන අතර ඒවාද තහනම් කිරීමට කටයුතු කර තිබේ. 

ඔවුන්ට මුදල් ලැබී තිබුණේ විදේශයන්ගෙන් බවට කියවුණද විමර්ශනවලදී හෙළි වී ඇත්තේ මුදල් යොදවා ඇත්තේ ඊබ්‍රහිම් සහෝදරයින් බවයි. 

සහරාන්ගේ බිරිඳ හමුවෙන්නට නියමිතව සිටි වෛද්‍යවරයාව අපරාධ පරීක්ෂණ දෙපාර්තමේන්තුව විසින් හඳුනාගෙන තිබුණේද යන්න මෙහිදී රජයේ ජ්‍යෙෂ්ඨ අධි නීතිඥවරයා සක්ෂිකරුගෙන් ප්‍රශ්න කළේය. 

සහරාන්ව අත්අඩංගුවට ගැනීම සඳහා සැලසුම් කළේ එම වෛද්‍යවරයාව හඳුනාගෙන බව ඊට පිළිතුරු දෙමින් රවී සෙනෙවිරත්න මහතා කියාසිටියේය.

ඒ ගැන වෛද්‍යවරයා සමඟ කතා කර තිබුණේද යන්න විමසීමට පිළිතුරු දෙමින් සෙනෙවිරත්න මහතා පැවසුවේ විමර්ශන නිලධාරීන් විසින් එය කරන ලද්දේද යන්න තමන් නොදන්නා බවයි. 

ප්‍රහාරය ආසාර්ථක වුවහොත් තවත්  සැලැස්මක් 

යම්කිසි අයුරකින් ප්‍රහාරය අසාර්ථක වුවහොත් මරාගෙන මැරෙන බෝම්බකරුවන්ට තවත් සැලැස්මක් සහරාන් විසින් යොදවා තිබී ඇත. 

ඒ අනුව ප්‍රහාරයට පැමිණි අයෙක් ආසාර්ථක වුවහොත් එම පුද්ගලයා පැමිණිය යුතු ස්ථානයක් සූදානම් කරගෙන ඇති අතර එය දෙහිවල ප්‍රදේශයේ දේවස්ථානයක් බව ද අපරාධ පරීක්ෂණ දෙපාර්තමේන්තුවේ විමර්ශනවලින් අනාවරණය වී තිබේ. එම ස්ථානයට තැනැත්තෙකු පැමිණෙන අතර ඔහු විසින් ප්‍රහාරකයා රැගෙන ආරක්‍ෂිත ස්ථානයකට යාමටයි සැලසුම වී ඇත්තේ.  මෙහිදී එම අසාර්ථක වන ප්‍රහාරකයන් රැගෙන යාමට සූදානමින් සිටි පුද්ගලයාගේ නම සාක්ෂිකරු විසින් කොළයක සටහන කර කොමිසමට ඉදිරිපත් කළ අතර මේ වන විට එම තැනැත්තා අත්අඩංගුවේ පසුවන බවද පැවසුවේය. 

එවකට අමාත්‍යවරයෙකුව සිටි කබීර් හෂීම් මහතාගේ සම්බන්ධීකරණ ලේකම් තස්ලීම්ට වෙඩි තැබීමේ සිද්ධියෙන් පසු මුස්ලිම් සමාජයෙන් තොරතුරු ලැබීම සම්පූර්ණයෙන් පාහේ නතර වූ බවද අපරාධ පරීක්ෂණ දෙපාර්තමේන්තුවේ හිටපු ප්‍රධානී සාක්ෂි දෙමින් සඳහන් කරන ලදී. 

ප්‍රහාරයක් එල්ල වෙන බවට (විදෙස් බුද්ධි සේවාවකින් ලද තොරතුර) රාජ්‍ය බුද්ධි සේවයේ අධ්‍යක්ෂ විසින් යොමුකරන ලද ලිඛිත වාර්තාව සම්බන්ධයෙන්ද මෙහිදී කොමිසම  අවධානයට ලක්කළේය. 

රජයේ ජ්‍යෙෂ්ඨ අධිනීතිඥ: රාජ්‍ය බුද්ධි සේවයේ අධ්‍යක්ෂ විසින් ප්‍රහාරයක් එල්ල වෙන බවට ජාතික බුද්ධි ප්‍රධානියා වෙත යොමුකර තිබුණු ලිපිය පොලිස්පතිවරයා මඟින් ඔබට ලැබුණාද?

සාක්ෂිකරු:මට ලැබුණේ නැහැ ස්වාමීනි. නමුත් පොලිස්පතිවරයාට අප්‍රේල් 09 වැනිදා ඒවා තිබුණු ලිපියේ පිටපතක් අප්‍රේල් 16 මට ලැබුණා. අප්‍රේල් 07 වැනිදා මම විදෙස් ගත වුණා ජාත්‍යන්තර පොලීස් ප්‍රධානීන්ගේ හමුවකට සහභාගී වෙන්න. මම නැවත ආවේ 13 වැනිදා හවස. 14 සහ 15 අවුරුදු නිවාඩු දවස් නිසා මම නිවසේ රැඳී සිටියේ. නැවත රාජකාරී සඳහා ගියේ අප්‍රේල් 16 වැනිදා. ඒ අවස්ථාවේ තමයි මගේ පෞද්ගලික සහකාර විසින් මට මේ ලිපිය දුන්නේ. 
පොලිස්පති මට එය වෙනම යොමුකරලා තිබුණේ නැහැ. ඒ පිටපතේ තිබුන විදිහට නම් සඳහන් ඇතැම් පුද්ගලයන් ගැන අවබෝධයක් තිබුණා. අළුත් නම් කිහිපයකුත් තිබුණා. නියෝජ්‍ය පොලිස්පතිවරු හතරදෙනෙකුට එය යොමුකරලා තිබුණා. මම අධ්‍යක්ෂ සමඟ මේ ගැන කතා කළා. ඒ වන විටත් අපිට තිබුණ වගකීම සහරාන් ඇතුළු කණ්ඩායම අත්අඩංගුවට ගැනීම. ඒ සඳහා දිවයිනේ ප්‍රදේශ කිහිපයකම විමර්ශන සිදුවෙමින් තිබුණේ. 

රාජ්‍ය බුද්ධි සේවයේ අධ්‍යක්ෂ විසින් ජාතික බුද්ධි ප්‍රධානී වෙත යොමුකර තිබුණු එම ප්‍රහාරයක අවදානම සම්බන්ධයෙන් වන ලිපියෙහි වරෙන්තු නිකුත් කර තිබුණු ආමී මොහිදීන්ගේ නම සඳහන්ව තිබෙන අතර ඒ වන විට අපරාධ පරීක්ෂණ දෙපාර්තමේන්තුවේ නිලධාරීන් දෙදෙනෙකු විසින් ඔහුව නිවසේදී මුණ ගැසී ඇති නමුත් ඔහුව අත්අඩංගුවට නොගැනීම ගැන දැනීමක් තිබුණේද යන්න මෙහිදී රවී සෙනෙවිරත්න මහතාගේ රජයේ අධිනීතිඥවරයා ප්‍රශ්න කළේය. 

”ඒ අවස්ථාවේ දැනීමක් තිබුණේ නැහැ ස්වාමීනි” යනුවෙන් ඊට සෙනෙවිරත්න මහතා පිළිතුරු දුන්නේය.

මේ සම්බන්ධයෙන් වැඩිදුරටත් ප්‍රශ්න විමසමින් කොමිසමේ සභාපති විනිසුරුවරයා අසා සිටියේ වරෙන්තු නිකුත් කර තිබෙන පුද්ගලයෙක් අපරාධ පරීක්ෂණ දෙපාර්තමේන්තුව සෘජුව තොරතුරුකරුවෙක් ලෙස තබන්නේ නම් එය ජ්‍යෙෂ්ඨ නියෝජ්‍ය පොලිස්පතිවරයා දැන සිටිය යුතුයි  නේද? යන්නයි. 

සාක්ෂිකරු: තොරතුරුකරුවෙක් පවත්වාගෙන යාම ජ්‍යෙෂ්ඨ නියෝජ්‍ය පොලිස්පතිවරයාට දැනුවත් කිරීම අවශ්‍යම නැහැ ස්වාමීනි. 

සභාපති විනිසුරු: වරෙන්තු නිකුත් කර තිබෙන කෙනෙක් ගැන ඔබ දැන ගත යුතුයි නේද?

සාක්ෂිකරු:වරෙන්තුකරුවෙක් සම්බන්ධයෙන් කටයුතු කිරීමට ජ්‍යෙෂ්ඨ නියෝජ්‍ය පොලිස්පති දැනුවත් වෙන්නේ නැහැ. ජ්‍යෙෂ්ඨ නියෝජ්‍ය පොලිස්පතිවරයා මැදිහත් වීම අවශ්‍යයි නම් එය අධ්‍යක්ෂ හරහා මා වෙත දැනුවත් කරනවා ස්වාමීනි. 

සභාපති විනිසුරු: අධ්‍යක්ෂවරයා විසින් එය ඔබව දැනුවත් කිරීම වැදගත් නේද?

සාක්ෂිකරු: එය සුදුසුයි

රාජ්‍ය බුද්ධි සේවයේ අධ්‍යක්ෂ නිලන්ත ජයවර්ධන මහතා විසින් ප්‍රහාරය සම්බන්ධව ලැබී තිබුණු තොරතුර සම්බන්ධයෙන් තමන් සමඟ කතා කළේද නැති බව අපරාධ පරීක්ෂණ දෙපාර්තමේන්තුවේ හිටපු ප්‍රධානී කියා සිටියේය. 

අප්‍රේල් 14 වැනි දින තත්පර 215ක ඇමතුමක් රවී සෙනෙවිරත්න මහතා විසින් නිලන්ත ජයවර්ධන මහතා වෙත ගෙන ඇති නමුත් එම අවස්ථාවේදී ද මෙම ප්‍රහාරය සම්බන්ධයෙන් ලද තොරතුර සම්බන්ධයෙන් කතා කළ බවක් තමන්ගේ මතකයේ නැති බවයි ඔහු පැවසුවේ. 

කෙසේවෙතත් එම ලිපිය ලද පසු තමන් අපරාධ පරීක්ෂණ දෙපාර්තමේන්තුවේ අධ්‍යක්ෂ ශානි අබේසේකර මහතා සමඟ කතා කළ අතර ඒ වන විට අපරාධ පරීක්ෂණ දෙපාර්තමේන්තුව විසින් කරමින් තිබුණු විමර්ශන සම්බන්ධයෙන් විමසූ බව කියා සිටි සෙනෙවිරත්න මහතා වැඩිදුරටත් සඳහන් කළේ ඒ වන විට නුවරඑළිය,වාලච්චේන, නැගෙනහිර පළාත,මන්නාරම යන ප්‍රදේශවල විමර්ශන නිලධාරීන් විසින් ඔවුන්ගේ රාජකාරී කරමින් සිටින බව අධ්‍යක්ෂවරයා තමන්ට දැනුම් දුන් බවයි. 

ඒ අනුව රවී සෙනෙවිරත්න මහතා ප්‍රහාරය සම්බන්ධයෙන් ලැබුණු පිටපතට සටහනක් යොදා අපරාධ පරීක්ෂණ දෙපාර්තමේන්තුවේ නියෝජ්‍ය පොලිස්පතිවරයා වෙත අප්‍රේල් 19 වැනිදා යොමුකර තිබෙන නමුත් එය නියෝජ්‍ය පොලිස්පතිවරයාගෙන් අධ්‍යක්ෂ වෙත ලැබී ඇත්තේ අප්‍රේල් 23 වැනිදාය.

ඒ අනුව ශානි අබේසේකර මහතා ලිපිය දකින්නේ ප්‍රහාරයෙන් පසුව අප්‍රේල් 23 වැනි දිනය. 

රජයේ ජ්‍යෙෂ්ඨ අධිනීතිඥ: ඇයි ඒ ගැන වැඩිදුරටත් පැහැදිලිකර ගැනීම සඳහා පොලිස්පතිවරයා හෝ රාජ්‍ය බුද්ධි සේවයේ අධ්‍යක්ෂවරයාව සම්බන්ධ කරගත්තේ නැත්තේ?

සාක්ෂිකරු:මේ ගැන ගත යුතු පියවර ගැන සොයා බැලුවා. ඒ වන විට පොලිස්පති විසින් නියෝජ්‍ය පොලිස්පතිවරු හතර දෙනෙක් දැනුවත් කරලා තිබුණේ. මම හිතුවා අපේ වැඩේ විමර්ශනය කරලා මේ අය අත්අඩංගුවට ගැනීම කියලා. ඒ නිසා මම අවධානය යොමු කළේ ඒ ගැන. 

ඒ අනුව රවී සෙනෙවිරත්න මහතා විසින් අපරාධ පරීක්ෂණ දෙපාර්තමේන්තුවේ අධ්‍යක්ෂවරයාව දැනුවත් කර ඇත. 

රාජ්‍ය බුද්ධි සේවයෙන් එවලා තියෙන්නේ බුද්ධි තොරතුරක් නෙවෙයි 

මෙහිදී කොමිසමේ සභාපති විනිසුරුවරයා විමසුවේ රාජ්‍ය බුද්ධි සේවය විසින් යොමුකර තිබෙන ලිපිය දෙස බැලූ විට අවබෝධ වුණේ කුමක්ද යන්නයි.

ඊට පිළිතුරු දෙමින් අපරාධ පරීක්ෂණ දෙපාර්තමේන්තුවේ හිටපු ප්‍රධානී සඳහන් කළේ සහරාන්ගේ කණ්ඩායම ප්‍රහාරයකට සූදානම් වන බව යන්නයි. 

සභාපති විනිසුරු: තොරතුර අනුව වියහැකිභාවයක් තිබුණද ?

සාක්ෂිකරු:16 වැනිදා තත්ත්වය අනුව සිදුවීමේ ආසන්නතාවයක් මට දැනුණේ නැහැ ස්වාමීනි.

සභාපති විනිසුරු:ඇයි?

සාක්ෂිකරු: ලිපියේ වගේම රාජ්‍ය බුද්ධි සේවයට ලැබුණු වාර්තාවේත් යන දෙකේම අවසානයට සඳහන් කරලා තිබෙනවා මේ ගැන රහසිගතව පරීක්ෂණයක් කරලා තහවුරු කරගන්න,ඔවුන්ටත් දැනුම් දෙන්න කියලා. ලිපියේ අවසාන කොටස දිහා බැලුවහම සිදුවීමේ ආසන්නතාවයක් නැහැ.   

සභාපති විනිසුරු: ඔබ NIB එකේ කොපමණ කාලයක් සේවය කළාද?

සාක්ෂිකරු:වසර 7ක් ස්වාමීනි 

සභාපති විනිසුරු :වසර හතක සේවා කාලය තුළ බව බුද්ධි වාර්තා දැක තිබෙනවාද?

සක්ෂිකරු:ඔව් 

සභාපති විනිසුරු: පිළියෙළ කර තිබෙනවාද?

සාක්ෂිකරු: ඔව් ස්වාමීනි 

ඒ අනුව රාජ්‍ය බුද්ධි සේවයේ අධ්‍යක්ෂ විසින් ප්‍රාහරය සම්බන්ධයෙන් යොමුකරන ලද ලිපිය බුද්ධි වාර්තාවක්ද නැද්ද යන්න සම්බන්ධයෙන් සභාපති විනිසුරුවරයා තවදුරටත් ප්‍රශ්න කරන ලදී.

”මම පිළියෙළ කර තිබෙන වර්තාවක කරුණු මම කියන්නම් ස්වාමීනි. වාර්තාව අවසානයේ අපි සාමාන්‍යයෙන් යොදනවා තොරතුරුකරු විශ්වාසවන්තයි තොරතුර සත්‍යයි කියලා. එහම නැත්නම් තොරතුරුකරු ඉතා විශ්වාසවන්තයි තොරතුර සත්‍යයි කියලා.”  යනුවෙන් රවී සෙනෙවිරත්න මහතා පිළිතුරු දුණි. 

ඔබ එලෙස සඳහන් කරන්නේ NIB වෙතින් ලද පුහුණුව නිසාදැයි මෙහිදී සභාපති විනිසුරුවරයා විමසුවේය.

සාක්ෂිකරු ”ඔව්” යනුවෙන් ඊට පිළිතුරු දෙන ලදී. 

බුද්ධි වාර්තාවක් සෑදීමේදී අදාළ කරුණු සටහන් කරන අතර ඊට සම්බන්ධව පවතින තවත් කරුණු ඇත්නම් ඒවා සටහන් කිරීම අවශ්‍ය බවත් සිදුවීමක් සිදුවන්නේ නම් එය සිදුවන ආසන්නතම වෙලාව,දවස,ස්ථාන ආදිය පිළිබඳවද සඳහන් කළ යුතු බව හෙතෙම පැවසුවේය. 

මෙහිදී තවදුරටත් සභාපති විනිසුරුවරයා සක්ෂිකරුගෙන් විමසුවේ බුද්ධි වාර්තාව අවසානයේ නිර්දේශ සඳහන් කරනවාද යන්නයි.

”සමහර අවස්ථාවල පවතින කරුණු පාදක කරගෙන නිර්දේශ සඳහන් කරනවා. ඒවගේම තමයි බුද්ධි වාර්තාව සකස් කරන නිලධාරියාගේ නිරීක්ෂණත් සඳහන් කරනවා” යනුවෙන් ඊට සාක්ෂිකරු පිළිතුරු ලබාදුන්නේය. 

තවදුරටත් මෙම කාරණය ගැන විමසමින් සභාපති විනිසුරුවරයා අසා සිටියේ ප්‍රහාරයට පෙර වනාතවිල්ලුව පුපුරණ ද්‍රව්‍ය සොයාගැනීමේ සිද්ධිය සම්බන්ධයෙන් සහරාන්ගේ සම්බන්ධයක් පැවති බවට තොරතුරු තිබුණ බවත්, ආමී මොහිදීන් සැඟවිලා සිටි තැන ගැන දැනුවත්ව සිටීමත්,රිල්වාන්,සාහිඩ් යන අය ගැන පැවති දැනුවත්භාවයත් යානදියත් සමඟ රාජ්‍ය බුද්ධි සේවයේ අධ්‍යක්ෂගෙන් ලද ලේඛනයේ අපැහැදිලි බවක් තිබෙනවා කියල නිගමනය කළ හැකිද යන්නයි.

”අප ළඟ තිබුණ හා නොතිබුණ නම් එහි තිබුණ නිසා තමයි අපරාධ පරීක්ෂණ දෙපාර්තමේන්තුවේ බුද්ධි අංශයෙන් ඒ ගැන හොයන්න යෙදවූයේ.නමුත් මේ වාර්තාවේ අවසානයට තිබෙන වාක්‍යය අවිනිශ්චිතයි.” යනුවෙන් පිළිතුරු දුණි.

සභාපති විනිසුරු:එම ලේඛනයේ අන්තිම වාක්‍ය නැත්නම් එය සලකා බැලීමේදී ප්‍රහාරයක් විය හැකි බව තිබෙනවාද?

සාක්ෂිකරු: ඔව් ස්වාමීනි.

සභාපති විනිසුරු: රහසිගත පරීක්ෂණ පවත්වා අත්අඩංගුවට ගන්න කියලා NIB ලියුම්වලට එකතු කරනවාද?

සාක්ෂිකරු: නැහැ ස්වාමීනි 

කෙසේවෙතත් රාජ්‍ය බුද්ධි සේවයේ අධ්‍යක්ෂ නිලන්ත ජයවර්ධන මහතා විසින් අප්‍රේල් 09 වැනිදා ජාතික බුද්ධි ප්‍රධානී වෙත යොමුකර තිබුණු ප්‍රහාරයක් එල විය හැකි බවට ලේඛනය බුද්ධි තොරතුරක් නොව එය තොරතුරක් පමණක් බවයි අපරාධ පරීක්ෂණ දෙපාර්තමේන්තුවේ හිටපු ප්‍රධානී කොමිසම හමුවේ අවධාරණය කළේ. 

පාලමුණේ බයිසිකල් පිපිරීම සහරාන්ගේ වැඩක් බවට සැක හිතුණා 

පාලමුණේ බයිසිකල් පිපිරීමේ සිද්ධිය සම්බන්ධයෙන් රාජ්‍ය බුද්ධි සේවයේ අධ්‍යක්ෂවරයා අප්‍රේල් 18 වැනිදාම තමන්ව දැනුවත් කළ අතර එම ස්ථානය පරීක්ෂාවටද ගිය අතර එම විමර්ශනය සඳහා අපරාධ පරීක්ෂණ දෙපාර්තමේන්තුවේ විමර්ශන කණ්ඩායමක් යොදන බව පොලිස්පතිවරයාව දැනුවත් කළ බවද රවී සෙනෙවිරත්න මහතා සාක්ෂි දෙමින් පැවසුවේය. 

පිපිරීම පසුපස සිටින්නේ කවුද යන්න ඒ මොහොතේම අනාවරණය නොවුණත් එය සහරාන්ගේ කණ්ඩායමේ ක්‍රියාවක් බවට සැක පළ වූ බවයි ඔහු සඳහන් කළේ. ඒ අනුව විමර්ශන කිරීම සඳහා උපදෙස් දීම සිදුකර තිබේ. 

රජයේ ජ්‍යෙෂ්ඨ අධිනීතිඥ: 2019.04.20 වැනි දින ඔබට පැය 16.57.46 ට තත්පර 271ක දුරකථන ඇමතුමක් ලැබිලා තිබෙන බව පිළිගන්නවාද?

සාක්ෂිකරු: ඔව් ස්වාමීනි 

රජයේ ජ්‍යෙෂ්ඨ අධිනීතිඥ: රාජ්‍ය බුද්ධි සේවයේ අධ්‍යක්ෂ ඔබට දැනුම් දුන්නේ කුමක්ද?

සාක්ෂිකරු: ඔහු මා වෙත දැනුම් දුන්නා කතෝලික පල්ලි වෙත ප්‍රහාරයක් එල්ල කරන බව සහරාන්ගේ කණ්ඩායම විසින් 

රජයේ ජ්‍යෙෂ්ඨ අධිනීතිඥ: ඔබ මොනවද ගත් පියවර?

සාක්ෂිකරු: පාලමුණේ පිපිරිම ගැන විමර්ශනයේ තත්ත්වය බැලුවා. සහරාන්ව අත්අඩංගුවට ගැනීමට හැකි වුණාද කියලා බැලුවා.පොලිස්පතිතුමාට කතා කරලා රාජ්‍ය බුද්ධි සේවයේ අධ්‍යක්ෂගේ තොරතුර අනුව කිසියම් ක්‍රියාමාර්ගයක් ගත යුතු බව දැනුම් දුන්නා ස්වාමීනි.

රජයේ ජ්‍යෙෂ්ඨ අධිනීතිඥ:පොලිස්පතිතුමාට කිව්වට පස්සේ ඔහු මොනවද කිව්වේ?

සාක්ෂිකරු: මේ ගැන බස්නාහිර පළාත් ජ්‍යෙෂ්ඨ නියෝජ්‍ය පොලිස්පති නන්දන මුණසිංහව දැනුවත් කරන්න කිව්වා. 

ඒ අනුව එම අවස්ථාවේදීම රවී සෙනෙවිරත්න මහතා විසින් එනම් අප්‍රේල් 20 වැනිදා පැය 17.46.53ට තත්පර 242ක දුරකථන ඇමතුමක් ගෙන නන්දන මුණසිංහ මහතා දැනුවත් කරමින් පවසා ඇත්තේ රාජ්‍ය බුද්ධි සේවයේ අධ්‍යක්ෂගේ තොරතුර අනුව පල්ලි සහ හෝටල් වෙත ආරක්ෂාව වැඩි කිරීමට සිදුවන බවයි. 

රජයේ අධි නීතිඥ: එසේ කියද්දී නන්දන මුණසිංහ මහත්මයා මොනවද කිව්වේ?

සාක්ෂිකරු: ඒ වනවිටත් පල්ලිවලට ආරක්ෂාව යොදවා තිබුණේ කියලා නන්දන මුණසිංහ මහත්මයා මට කිව්වා. අවශ්‍ය නම් තවදුරටත් ආරක්ෂාව වැඩි කරනවා කියලත් ඔහු කිව්වා. 

එම ප්‍රහාරය සම්බන්ධයෙන් රාජ්‍ය බුද්ධි සේවයේ අධ්‍යක්ෂ වෙත ලැබී තිබුණු දුරකථන පණිවිඩයද තමන් වෙත ගෙන්වා ගෙන එය පොලිස්පතිවරයාට හා ජ්‍යෙෂ්ඨ නියෝජ්‍ය පොලිස්පති නන්දන මුණසිංහ මහතා වෙත යැවූ බවද රවී සෙනෙවිරත්න මහතා සාක්ෂි දෙමින් පැවසුවේය. 

එමෙන්ම ඒ සම්බන්ධයෙන් අපරාධ පරීක්ෂණ දෙපාර්තමේන්තුවේ අධ්‍යක්ෂ හා විමර්ශන නිලධාරී සහකාර පොලිස් අධිකාරී වික්‍රමසේකර මහතා වෙතද දැනුම් දීම කළ අතර වික්‍රමසේකර මහතා සතුව තිබුණු පාලමුණේ පිපිරීමේ සිදුවීමට අදාළ විමර්ශනයේදී අනාවරණය වී තිබුණු තවත් යතුරු පැදි අංකයක්  වික්‍රමසේකර නිලධාරියාගෙන් ගෙන්වාගෙන එය පොලිස්පතිවරයාට හා නන්දන මුණසිංහ මහතා වෙත යවා ඇත. 

එමෙන්ම අප්‍රේල් 21 වැනිදාද රාජ්‍ය බුද්ධි සේවයේ අධ්‍යක්ෂ විසින් ප්‍රහාරය ගැන තමන්ට SMS පණිවිඩයක් ඒවා තිබී ඇති අතර එය තමන් දුටුවේ ප්‍රහාරයෙන් පසුව බවයි රවී සෙනෙවිරත්න මහතා පැවසුවේ. 

සහරාන් ගැන තොරතුරු මුලින් හෙළිවුණේ වනාතවිල්ලුවේ විමර්ශනයේදී 

රවී සෙනෙවිරත්න මහතාගෙන් ආරක්ෂක මණ්ඩලයට කැඳවීම ගැනද මෙහිදී ප්‍රශ්න කෙරුණි. 

සාක්ෂිය මෙහෙය වූ රජයේ අධි නීතිඥවරයා රවී සෙනෙවිරත්න මහතාගෙන් විමසුවේ ආරක්ෂක මණ්ඩලයට සහභාගී වී ඇත්ද යන්නයි.

තමන් ආරක්ෂක මණ්ඩලයේ නිත්‍ය සාමාජිකයෙක් නොවන අතර කැඳවීමක් ලැබුණහොත් පමණක් එයට සහභාගී වන බවයි. 

ඒ අනුව පාස්කු ප්‍රහාරයට පෙර ඔහුව ආරක්ෂක මණ්ඩලයට කැඳවා තිබුණේ 2018 වසරේ දෙසැම්බර් මුල් සතියේ පැවති ආරක්ෂක මණ්ඩල රැස්වීමටය. 

එසේ එදින කැඳවා ඇත්තේ වව්නතිව් ප්‍රදේශයේදී සිදුවූ පොලිස් නිලධාරීන් දෙදෙනාගේ ඝාතනයේ විමර්ශනවල ප්‍රගතිය ව්විමසිම සඳහාය. 

එම කරුණු දැක්වීමෙන් අනතුරුව ආරක්ෂක මණ්ඩලයෙන් ඉවත්ව යන ලෙසයි රවී සෙනෙවිරත්න මහතාට දැනුම් දී ඇත්තේ. 

එහෙයින් එම ආරක්ෂක මණ්ඩල රැස්වීමේදී ඉස්ලාම් අන්තවාදය ගැන සාකච්ජා කළේද යන්න තමන් නොදන්නා අතර තමන් සිටි කාලය තුළ එවැන්නක් කතා නොකළ බවද කොමිසම හමුවේ සාක්ෂි දෙමින් පැවසුවේය. 

වනාතවිල්ලුව පුපුරණ ද්‍රව්‍ය සම්බන්ධයෙන් අනාවරණය වන්නේ අපරාධ පරීක්ෂණ දෙපාර්තමේන්තුව විසින් සිදුකළ මාවනැල්ල බුදු පිළිමවලට හානි කිරීමේ සිදුවීමේ විමර්ශනයේ දිගුවක් ලෙස බවද රවී සෙනෙවිරත්න මහතා කියාසිටියේය. 

වනාතවිල්ලුව සිදුවීම සම්බන්ධයෙන් සැකකරුවන් සිව් දෙනෙකු අත්අඩංගුවට පත්වූ අතර දෙදෙනකු ඊට සම්බන්ධයක් නොතිබුණු හෙයින් ඔවුන් නිදහස් කළ  බවත් අනෙක් දෙදෙනාගෙන් දීර්ඝ වශයෙන් ප්‍රශ්න කළ අතර සහරාන් හෂීම් ගැන පළමුවරට ආනාවරණය වුයේ එම අවස්ථාවේ බවද ඔහු සඳහන් කරන ලදී. ඒ අනුව 2019 ජනවාරි 05 වැනිදා වනාතවිල්ලුවෙන් සොයාගනු ලැබූ දෑ පිළිබඳව පොලිස්පතිවරයා වෙත වාර්තාවක් යොමු කළ අතර පොලිස්පතිවරයා හමුවී සකාච්ජා කිරීමටද අපරාධ පරීක්ෂණ දෙපාර්තමේන්තුව කටයුතු කර තිබේ. 

වනාතවිල්ලුව අවි ආයුධ රැස්කරන හා අවි පුහුණුව දෙන කඳවුරක් ලෙස පවත්වාගෙන ගොස් ඇති අතර රසායනික ද්‍රව්‍ය යොදාගෙන පුපුරණ ද්‍රව්‍ය නිපදවා ඇති බවත් ඉදිරියේදී ත්‍රස්ත ප්‍රහාරයක් එල්ල විය හැකි බවත් පොලිස්පතිවරයා වෙත දැනුම් දී ඇත.  ආරක්ෂක මණ්ඩලයට එය දැනුම් දිය යුතු වුවත් ඒ වන විට පොලිස්පතිවරයාව එයට නොකැඳ වන බව පැවැසූ හෙයින් ඒ ගැන ආරක්ෂක මණ්ඩලයට දැනුම් දීමට අවස්ථාවක් නොමැති බව වැටහී ගිය බවද සෙනෙවිරත්න මහතා කියාසිටියේය. 

ඇමති හරීන්ගේ පියා ප්‍රහාරයක් ගැන දැනගත්තේ කොහොමද? 

පාස්කු ප්‍රහාරයෙන් පසුව එවකට අමාත්‍යවරයෙකුව සිටි හරීන් ප්‍රනාන්දු මහතාගේ පියා ප්‍රහාරයක් සිදුවන බවට දැනගෙන තිබීම ගැන මෙහිදී කොමිසම රවී සෙනෙවිරත්න මහතාගේ අවදානයට යොමුකළේය.

අප්‍රේල් 20 වැනිදා රාත්‍රියේ හරීන් ප්‍රනාන්දු මහතාගේ පියා, ඉදිරිපත්ව තිබෙන සාක්ෂි අනුව ඒ ගැන දැන ගෙන තිබුණේ අපරාධ පරීක්ෂණ දෙපාර්තමේන්තුවේ පොලිස් සැරයන් නන්දලාල් මහතා වෙතින් වන අතර එම විමර්ශන නිලධාරීන් 21 වැනිදා ප්‍රහාරයක් එල්ලවෙන බවට දැනගත්තේ කෙසේද යන්න පිළිබඳව රජයේ ජ්‍යෙෂ්ඨ අධිනීතිඥවරයා විමසුවේය. 

ඊට පිළිතුරු දෙමින් රවී සෙනෙවිරත්න මහතා සඳහන් කළේ නන්දලාල් නිලධාරියට එම තොරතුර ලැබුණේ කෙසේද යන්න දැනුමක් නොමැති බවයි. නමුත් පහුවදා ප්‍රහාරයක් එල්ල වෙන බවට නිලන්ත ජයවර්ධන මහතාගෙන් ලැබුණු තොරතුර සිය දෙපාර්තමේන්තුවේ අධ්‍යක්ෂ හා විමර්ශන නිලධාරී සහකාර පොලිස් අධිකාරී වික්‍රමසේකර වෙත යොමු කර තිබුණු බව ඒ සම්බන්ධයෙන් ඔහු තවදුරටත් සඳහන් කළේය. 

රවී සෙනෙවිරත්න මහතාගේ මූලික ප්‍රශ්න කිරීම අවසන් කරමින් හරස් ප්‍රශ්න විමසීම අනතුරුව ආරම්භ කරන ලදී. 

The post සහරාන්ව අත්අඩංගුවට ගන්න බැරිවෙන්න බලපෑ හේතු පාස්කු කොමිෂමේදී හෙළිදරව් වේ. appeared first on ColomboXnews.