“සබිතාපාය”ගනුදෙනුවෙන් රනිල් බේරා ඇමැති දුමින්ද පිටින් යවයි : කොමිසමෙන් චූදිතයකු ලෙසත් නම් කරලා..

රාජ්‍ය අමාත්‍ය දුමින්ද දිසානායක මහතාව රාජ්‍ය ආයතන වල සිදු වූ වංචා හා දූෂණ සෙවීමට පත්කළ විශේෂ ජනාධිපති කොමිසම විසින් චූදිතයකු ලෙස නම් කොට තිබේ. මේ වන විට එළි දැක ඇති එම කොමිසම් වාර්තාවෙන් චුදිතයන් ලෙස නම් කොට තිබෙන දේශපාලනඥයින් අතුරින් වත්මන් ආණ්ඩුව නියෝජනය කරන එකම දේශපාලනඥයා වන්නේ දුමින්ද දිසානායක රාජ්‍ය අමාත්‍යවරයා පමණක් වීම ද විශේෂත්වයකි.

පසුගිය යහපාලන ආණ්ඩු සමයේ දැඩි මතභේදයට තුඩුදුන් දුමින්ද දිසානායක මහතා අමාත්‍ය ධූරය දැරූ කෘෂිකර්ම අමාත්‍යාංශයට රාජගිරියේ පිහිටි ඩී.පී.ජේ ජයසිංහ ගොඩනැගිල්ල කුලියට ගැනීමට වැය කළ රුපියල් මිලියන 1369.7 ක මුදලක් සම්බන්ධයෙන් දුමින්ද දිසානායක මහතාවද මෙසේ චූදිතයකු ලෙස නම් කොට තිබේ.

“සබීතාපාය”ගොඩනැගිල්ලේ සිද්ධිය ලෙස වඩාත් ප්‍රකට වූ මෙම ගනුදෙනුවේ සිදුව ඇති වංචා, දූෂණ හා අක්‍රමිකතා පිළිබඳව වූ පැමිණිල්ල මෙම ජනපති කොමිසම විසින් විභාග කිරීමෙන් අනතුරුව එම කොමිසම විසින් මෙම නිර්දේශය ලබාදී තිබේ.

වත්මන් ආණ්ඩුව එදා ඒකාබද්ධ විපක්ෂයේ සිටිද්දී කෘෂිකර්ම අමාත්‍යාංශයේ මෙම ගනුදෙනුව පිළිබඳව දැඩි විවේචන එල්ල කළ අතර එවකට කෘෂිකර්ම අමාත්‍ය ධූරය දැරූ දුමින්ද දිසානායක මහතාට ද චෝදනා එල්ල කරන ලදී.

එදා එසේ චෝදනා එල්ල කළ දුමින්ද දිසානායක මහතා අද වත්මන් පොදුජන පෙරමුණ ආණ්ඩුවෙි රාජ්‍ය අමාත්‍යවරයෙකු ලෙස කටයුතු කරයි.

මේ වන විට ශ්‍රී ලංකා නිදහස් පක්ෂයේ ජාතික සංවිධායකවරයා ලෙස කටයුතු කරන දුමින්ද දිසානායක රාජ්‍ය අමාත්‍යවරයා සෘජුවම පොදු ජන පෙරමුණට සම්බන්ධ වීමට සූදානමින් සිටින බවට ද කට කතාවක් පැතිර යමින් තිබේ.

2015-1-15 සිට 2018-12-31 දක්වා කාලය තුළ රාජ්‍ය ආයතන වල සිදුව ඇතැයි කියන දූෂණ හා වංචා සොයා බැලීමට මෙම විශේෂ ජනපති කොමිසම වත්මන් ජනපතිවරයා විසින් පත් කරන ලදී.

එම කොමිසම විසින් ජයසිංහ ගොඩනැගිල්ලේ සිද්ධිය ඇතුළුව දූෂිත සිද්ධීන් 15 ක් පිළිබඳව සිය නිර්දේශයක් ලබා දී තිබේ.

කෙසේ වෙතත් මෙම “සබීතාපාය”ගොඩනැගිල්ල රජයට බදුගැනීම සදහා අදාල කැබිනට් පත්‍රිකාව ඉදිරිපත් කලේ එවකට අගමැති ලෙස කටයුතු කල රනිල් වික්‍රමසිංහ මහතා විසිනි.

The post “සබිතාපාය”ගනුදෙනුවෙන් රනිල් බේරා ඇමැති දුමින්ද පිටින් යවයි : කොමිසමෙන් චූදිතයකු ලෙසත් නම් කරලා.. appeared first on ColomboXnews.