රජය විසින් ඊයේ (1) දිනයේ කොරෝනා වසංගතය පැතිර යන ප්‍රදේශ සඳහා පනවන ලද නිරෝධායන ඇඳිරි නීතිය කුරුණෑගල දිස්ත්‍රික්කයේ පොලිස් බළ ප්‍රදේශ කීපයක ක්‍රියාත්මක කිරීමේදී ගැටළුකාරි තත්ත්වයක් මේවනවිට ඇතිවී තිබේ.
යුද හමුදාපති ශවේන්ද්‍ර සිල්වා මහතා විසින් ජනමාධ්‍ය මඟින් ඒ සම්බන්ධයෙන් කරන ලද නිවේදනයට අනුව කුරුණෑගල දිස්ත්‍රික්කයේ කුරුණෑගල මහ නගර සභා බළ ප්‍රදේශයට අමතරව කුලියාපිටිය පොලිස් වසමේ පමණක් නිරෝධායන ඇඳිරි නීතිය ක්‍රියාත්මක වන බව සඳහන් කළේය.
නමුත් කොරෝනා වසංගත තත්ත්වය දැඩිව පැතිරයාම හේතුවෙන් ඊයේ දිනය තෙක් ක්‍රියාත්මක කළ කුලියාපිටිය ජ්‍යෙෂ්ඨ පොලිස් අධිකාරි කොට්ඨාසයට අයත් අනෙකුත් පොලිස් බළ ප්‍රදේශ වූ නාරම්මල, ගිරිඋල්ල, පන්නල සහ දුම්මලසූරිය සඳහා එම ඇඳිරි නීතිය ඒ ආකාරයට ක්‍රියාත්මක වනවාද නැතිනම් ඊයේ දිනයේ සිට ඉවත් කළාද යන්න එම නිවේදනය මඟින් ප්‍රකාශ නොවීය.
මේ හේතුවෙන් කුරුණෑගල දිස්ත්‍රික්කයේ උසස් පොලිස් නිලධාරීන් මෙන්ම එම පොලිස් ස්ථාන වල පොලිස් ස්ථානාධිපතිවරුන්ද දැඩි ගැටළුකාරි තත්ත්වයකට මුහුණ පා සිටින බව වාර්තාවේ. මේ සම්බන්ධයෙන් කළ විමසීමකදී එක් පොලිස් ස්ථානාධිපතිවරයෙකු සඳහන් කළේ ඇඳිරි නීතිය ඉවත් කළාද නැද්ද යන්න සම්බන්ධයෙන් තමන්ට පැහැදිලි නිවේදනයක් තවමත් ලැබී නැති බවය. මෙම තත්ත්වය මත ජනතාවද ගැටළුකාරි තත්ත්වයකට මුහුණ පා සිටින බවද ඇතැම් පිරිස් ඇඳිරි නීතිය ඉවත් කර ඇතැයි සිතා නගරයට පැමිණෙමින් සිටින බවද එම පොලිස් ස්ථානාධිපතිවරයා සඳහන් කළේය.
පෙරේදා (31) දිනයේ කරන ලද පීසීආර් පරීක්ෂණ වලින් නාරම්මල පොලිස් බළ ප්‍රදේශයෙන් කොරෝනා ආසාදිතයින් 04 ක්ද, පන්නල පොලිස් බළ ප්‍රදේශයෙන් කොරෝනා ආසාදිතයින් 07 ක්ද වාර්තා වී ඇති අවස්ථාවක එම අවදානම් තත්ත්වය සැලකිල්ලට නොගෙන ඇඳිරි නීතිය ඉවත් කිරීම වැරැදි තීරණයක් බවට ජනතාව චෝදනා කරති. ඊයේ දිනය වනවිට කුරුණෑගල දිස්ත්‍රික්කයේ කොරෝනා ආසාදිතයින් 185 දෙනෙකු වාර්තා වී ඇති බව කුරුණෑගල දිස්ත්‍රික් සෞඛ්‍ය සේවා අධ්‍යක්ෂ වෛද්‍ය ප්‍රමිතා ශාන්තිලතා මහත්මිය සඳහන් කළාය.
මේ අතර එම පොලිස් බළ ප්‍රදේශ පහට ක්‍රියාත්මක කළ නිරෝධායන ඇඳිරි නීතිය ඉවත් කර ඒ වෙනුවට ජනතාවට සංචරණ සීමා පනවා අත්‍යාවශ්‍ය වෙළඳසැල් කීපයක් පමණක් අදාළ නගර තුළ විවෘත කිරීමට රජය විසින් නියම කර තිබෙන බවද උසස් පොලිස් නිලධාරියෙකු ප්‍රකාශ කළේය.(ලංකාදීප))
The post ශවේන්ද්‍ර සිල්වාගේ ප්‍රකාශයත් සමග වයඹ පළාතේ ඇඳිරිය ගැන පොලිසිය දෙගිඩියාවෙන් appeared first on ColomboXnews.
Source From Colomboxnews
Author: Kamal Dhammika
#SriLanka #News #lka