කැලණිය විශ්විද්‍යාලයේ තොරතුරු තාක්ෂණ අධ්‍යයන අංශයට අවශ්‍ය ආචාර්යවරුන් ගණන 26ක් වුවත් දැන් සිටින්නේ හතර දෙනෙක් බව ත් රටේ බැංකුවල ඉහළ වෘත්තීයවේදීන් පමණක් 3,800කට වැඩි පිරිසක් රට අත්හැර ගොස් තිබෙන බව ත් ජනතා විමුක්ති පෙරමුණේ නායක, කොළඹ දිස්ත්‍රික් පාර්ලිමේන්තු මන්ත්‍රී අනුර කුමාර දිසානායක පැවසීය.
පසුගිය (අප්‍රේල් 16) දකුණු කොරියාවේ තේගු නගරයේදී එරට වෙසෙන ශ්‍රී ලාංකිකයන් අමතමින් මන්ත්‍රීවරයා මේ බව අනාවරණය කළේ ය.
මෙම රැස්වීම තේගු නගරයේ එක්ස්කෝ ශාලාවේදී පැවත්වූ අතර ඊට විශාල පිරිසක් සහභාගි වී තිබේ.
“අපේ රටේ විදෙස්ගත වෙන කණ්ඩායමේ ප්‍රධාන වර්ග තුනක් තිබෙනවා. එකක් රට ඇතුළෙත් යම් සමාජ තත්ත්වයක් තිබෙන, රැකියාවක් තිබෙන, ආදායම් මාර්ගයක් තිබෙන එහෙත් අනාගතය පිළිබඳ අවිශ්වාසයක් තිබෙන පිරිස.
පසුගිය කාලයේ වාර්තාවීම් ගත්තොත් කැලණිය විශ්වවිද්‍යාලයේ අයි.ටී. ඩිපාට්මන්ට් එකේ මහාචාර්යවරයෙක් කිව්වා ඒ අංශයට සාමාන්‍යයෙන් ආචාර්යවරු 26ක් වත් අවශ්‍යයි කියලා. නමුත් දැන් සිටින්නේ හතර දෙනයි. පත්තරේක දැන්වීමක් දාලා සම්මුඛ පරීක්ෂණ කැඳවා තිබුණා. නමුත් එවැනි දැනුමක් තිබෙන, හැකියාවක් තිබෙන, කුසලතාවක් තිබෙන වෘත්තීයවේදීන් කවුරුවත් ඇවිත් නැහැ කියලා පසුගිය දිනවල මාධ්‍ය මගින් වාර්තාවෙලා තිබුණා.
අනුරාධපුර ළමා රෝහලේ ළමා රෝග විශේෂඥ වෛද්‍යවරුන් හතර දෙනා ම විදෙස් ගතවෙලා. ළමා රෝහලේ ඒ අංශය වසා දමන්න සිදුවුණා. ඒ වගේ ම අපේ රටේ බැංකුවල ඉහළ වෘත්තීයවේදීන් 3800කට වැඩි පිරිසක් රට අත්හැර ගොස් තිබෙනවා. බැංකු කළමනාකරුවෙක්, විශ්විද්‍යාල ආචාර්යවරයෙක්, වෛද්‍යවරයෙක්, අයි.ටී. ඉන්ජිනේරුවරයෙක් කියන්නේ රටක වෘත්තීමය ශ්‍රමය. කොරියාවේ සංවර්ධනයේ ඉතිහාසය බැලුවොත් වැදගත් ම කාර්යභාරයක් වෙලා තිබෙනවා අධ්‍යාපනය සහ වෘත්තීමය ශ්‍රමය. අලුත් නිෂ්පාදන, නව සොයාගැනීම්, නව තාක්ෂණයේ අවස්ථා, නිර්මාණය කර තිබෙන්නේ වෘත්තීමය ශ්‍රමය. අපේ රටේ වෘත්තීමය ශ්‍රමය රට අතහැර යන තත්ත්වයකට පත්වෙලා තිබෙනවා.” යැයි ද හෙතෙම වැඩිදුරටත් පැවසීය.
The post “වෘත්තීයවේදීන් 3,800ක් රට හැර ගිහින්” – අනුර කුමාර appeared first on ColomboXnews.
Source From Colomboxnews
Author: Kamal Dhammika
#SriLanka #News #lka