වසර 30කට පසු ශ්‍රී ලංකාවට විශිෂ්ට ජයක්

ඔස්ට්‍රේලියාවට එරෙහිව පැවති තරග 5කින් සමන්විත එක්දින තරගාවලියේ ජය ශ්‍රී ලංකාව සතුවිය.

තරගාවලියේ අද පැවති සිව්වැනි එක්දින තරගය ලකුණු 4කින් ජයගැනීමත් සමඟ තවත් තරගයක් ඉතිරිව තිබියදීම තරගාවලියේ ජය ශ්‍රී ලංකාවට හිමිවිය.

ඔස්ට්‍රේලියා කණ්ඩායමට සියලුදෙනා දැවී රැස්කර ගතහැකිවූයේ ලකුණු 254ක් පමණි.

ඔස්ට්‍රේලියා කණ්ඩායම එක්දින ක්‍රිකට් තරගාවලියක් ශ්‍රී ලංකාවේදී මෙලෙස පරාජයට පත්වූයේ වසර 30කට පසුවය.

අවසන් පන්දුවාරය භාරධුර වගකීම සිය කර මතට ගත් නායක දසුන් ශානක විසින් එම පන්දුවාරයේ අවසන් පන්දුවට Kuhnemann දවාගනිමින් මෙම සුවිශේෂී ජයග්‍රහණය ශ්‍රී ලංකාව වෙත හිමිකරදීමට සමත්විය.

තරගය උඩුයටිකුරු කළ කඩුල්ල ලෙස ඩේවිඩ් වෝනර් ස්ටම්ප් කිරීමකට හසුකර ගැනීමෙන් තරගය නරඹන්නෙක් බවට පත්කිරීමට දික්වැල්ල සමත්විය.

ධනංජයද සිල්වා යොමුකළ පන්දුවක් හමුවේ ඩේවිඩ් වෝනර් දැවී යාමත් සමඟ තරගයේ වාසිය යළි ශ්‍රී ලංකා කණ්ඩායමට හිමිවිය.

ධනංජය ද සිල්වා පන්දුවාර 10 අවසානයේ ලකුණු 39කට කඩුලු 2ක් දවාගැනීමට සමත්විය.

ජෙෆ්රි වැන්ඩසේ කඩුලු 2ක් දවාගැනීමට සමත්විය.

නායක ෆින්ච් හට ලකුණු රැස් නොකරම නැවත ක්‍රීඩාගාරය වෙතට යාමට සිදුවූයේ චාමික කරුණාරත්නගේ පන්දුවක් හමුවේ කඩුල්ල මුවා කිරීමේ වරදට හසුවීමෙනි.

චාමික කරුණාරත්න පන්දුවාර 5කදී ලකුණු 19කට කඩුලු 2ක් දවාගැනීමට සමත්විය.

ලකුණු 26ක් රැස්කර සිටි Mitchell Marsh වෙල්ලාලගේ යොමුකළ පන්දුවක් හමුවේ ධනංජය ද සිල්වා වෙත උඩපන්දුවක් ලබාදෙමින් දැවී ගියේය.

මේ අතර අද තරගයේ බොහෝදෙනෙකුගේ අවධානය යොමුවූ සිදුවීමක් වූයේ මැක්ස්වෙල්ගේ දැවී යාමය.

එහිදී මහීෂ් තීක්ෂණ යොමුකළ පන්දුවකට කඩුල්ල මුවා කිරීමේ වරදට හසුවී ඔහු දැවී ගියේය.

එම කඩුල්ල ශ්‍රී ලංකාවට හිමිවූයේ විනිසුරු තීරණය අභියෝගයට ලක්කිරීමේ අවස්ථාව ප්‍රයෝජනයට ගැනීම හරහාය.

ශ්‍රී ලංකාව වෙනුවෙන් අගනා පන්දු යැවීමක නිරතවූ ශ්‍රී ලංකා පන්දු යවන්නන් වන මහීෂ් තීක්ෂණ, වනිඳු හසරංග, දුනිත් වෙල්ලාලගේ සහ දසුන් ශානක එක් කඩුල්ල බැගින් දවාගැනීමට සමත්විය.

තරගයේ කාසියේ වාසිය දිනූ ඔස්ට්‍රේලියා කණ්ඩායමේ ආරාධනයෙන් ප්‍රථමයෙන් පන්දුවට පහරදුන් ශ්‍රී ලංකා කණ්ඩායම සියලුදෙනා දැවී ලකුණු 258ක් රැස්කර ගැනීමට සමත්විය.

එහිදී අගනා ඉනිමක් ක්‍රීඩා කළ චරිත් අසලංක පන්දු 106කදී ලකුණු 110ක් රැස්කරගැනීමට සමත්විය.

ඔහුගේ ඉනිමට හයේ පහරක් සහ හතරේ පහර 10ක් ඇතුලත් විය.

ධනංජය ද සිල්වා පන්දු 61කදී ලකුණු 60ක් රැස්කරගැනීමට සමත්විය.

ඔහුගේ ඉනිමට හතරේ පහර 7ක් ඇතුලත්විය.

මෙහිදී පන්දු 8කට පමණක් මුහුණදී සිටි ශ්‍රී ලංකා නායක දසුන් ශානක අවාසනාවන්ත ලෙස දුවද්දී දැවීයාමකට හසුවී නැවත ක්‍රීඩාගාරයට ගමන්කිරීමට සිදුවිය.

ඔස්ට්‍රේලියාව වෙනුවෙන් අගනා පන්දු යැවීමක නිරත වූ Mitchell Marsh, Matthew Kuhnemann සහ Pat Cummins කඩුලු 2 බැගින් දවාගැනීමට සමත්විය. 

The post වසර 30කට පසු ශ්‍රී ලංකාවට විශිෂ්ට ජයක් appeared first on ColomboXnews.