‘මේ විනාශ කරමින් සිටින්නේ, සින්න කර දෙමින් සිටින්නේ අපේ මාතෘ භූමියයි’ – වෛද්‍ය නලින්ද ජයතිස්ස

කෙරවලපිටිය බලාගාරය සම්බන්ධයෙන් ගිවිසුම හොර රහසේ අත්සන් තබා මේ වන විට මාසයක කාලයක් ගත වී තිබෙනවා. එතරම් කාලයක් ගත වුණත් ආණ්ඩුව එය හෙළිදරව් කිරීම ප‍්‍රතික්ෂේප කර හොර ගල් අහුලමින් සිටිනවා. මෙය ජනතාවගේ දැනගැනීම සඳහා ලබා දිය යුතු බව අපි අවධාරණය කරනවා. මෙම ගිවිසුම මගින් අපේ රටේ දේශපාලනයට, ආර්ථිකයට බරපතළ බලපෑම් එල්ල වන තත්වයක් ඇති වී තිබෙනවා. ඇමරිකානු එක්සත් ජනපදයට අපේ රටට මැදිහත් විය හැකි වාතාවරණයක් උදා කර තිබෙනවා.

ජවිපෙ හිටපු පාර්ලිමේන්තු මන්ත්‍රී වෛද්‍ය නලින්ද ජයතිස්ස මහතා කොළඹ පැවති මාධ්‍ය හමුවකදී මේ බව පැවසීය.

බලශක්තිය පිළිබඳ අයිතිය තනි පුද්ගලයෙකුට, තනි සමාගමකට, තනි රටකට අයිතිවීමට ඉඩ නොතැබිය යුතු බවට පොදු පිළිගැනීමක් තිබෙනවා. ඒ අනුව විදුලි බල මණ්ඩලයද මැදිහත් වෙලා 2019දි අපේ බලශක්ති ප‍්‍රතිපත්තිය නිර්මාණය කිරීමේදී එය විශේෂයෙන් සැලකිල්ලට ගත්තා. ඒ අනුව 2010දී ඉදිකිරීම් ආරම්භ කරන ලද කොරවලපිටිය බලාගාරය සම්බන්ධයෙනුත් මෙම ප‍්‍රතිපත්තිය අනුගමනය කර තිබුණා. කෙරවලපිටිය බලාගාරය අපේ රටේ පළමු ස්වභාවික ගෑස්වලින් විදුලිය නිෂ්පාදනය කරනු ලබන බලාගාරයයි. එයට අවශ්‍ය ක‍්‍රියාවලිය සම්පූර්ණ කරගන්නා තෙක් එය ද්විත්ව බලාගාරයක් ලෙස ක‍්‍රියාත්මක වුණා. එය සම්පූර්ණ විමට බලාගාරය, ගෑස් ගබඩා පර්යන්තය, නල පද්ධතිය සහ ගෑස් සැපයුම සකස් විය යුතුව තිබුණා.

රටකට ගෑස් ගෙන්වන්නේ ද්‍රවීකෘත ගෑස් ලෙසයි. එය නැවත ගෑස් බවට පත්කිරීමට, බලාගාරය බලා ගෙනඒමටත් එයින් විදුලිය නිපදවීමටත් ඒවා විදුලි බල මණ්ඩලය මගින් මිලදීගෙන බෙදාහැරීමටත් අපේක්ෂා කෙරුණා. මෙම කි‍්‍රයාවලිය එක් පුද්ගලයෙකුට හෝ සමාගමකට නොපැවරෙන ආකාරයට ක‍්‍රියාකිරීමට විදුලි බල මණ්ඩලය සහ ඛනිජතෙල් සංස්ථාව කටයුතු කරමින් හිටියා. ඒ අනුව ඔවුන් නල පද්ධතිය හා පාවෙන ගබඩාව ඉදිකිරීම සඳහා වෙන් වෙන්ව ජාත්‍යන්තර ටෙන්ඩර් කැඳවා තිබුණා. ඒ ඒවායේ අයිතිය එක් පුද්ගලයෙක්, සමාගමක් අතට පත්වීම වැළැක්වීම සඳහායි.

කෙරවලපිටිය දැනට මෙ.වො. 300ක බලාගාරයක් වූවාට එය තවත් වසර කිහිපයකට පසුව මෙ.වො. 1000ක බලාගාරයක් වීමට නියමිතයි. එය අපේ රටේ විදුලි අවශ්‍යතාවයෙන් 1/3ක් පමණ වෙනවා. මෙවැනි බලාගාරයක් ටෙන්ඩර් ක‍්‍රියාවලිය නොසලකා ඇමරිකානු සමාගමකට පවරනු ලබනවා. මේ සඳහා ඉඩකඩ ලබාගැනීමට විදුලි බල අමාත්‍යවරයා සහ විදුලි බල මණ්ඩලයේ සභාපතිවරයා ඉවත් කළා. ඔවුන් පොදු ජන පෙරමුණ නියෝජනය කළ අයයි. ආණ්ඩුවට තමන්ගේ අරමුණ ඉටුකරගන්න ඔවුන් බාධාවක් වන විට ඉවත් කර දැම්මා. මේ බලශක්ති ඒකාධිකාරය ඇමරිකානු එක්සත් ජනපදයට පැවරීමට ආණ්ඩුව කටයුතු කළේ එහෙමයි.

මේ කොන්ත‍්‍රාත්තුව මෙම සමාගමට පැවරීම තුළ දැවැන්ත නාස්තියක්, වංචාවක් දූෂණයක් තිබෙනවා. වසර 10ක කාලයක් සඳහා ගෑස් සැපයුම ඩො.මි. 6000ක කොන්ත‍්‍රාත්තුවක්. හම්බන්තොට වරාය ඉදිකරන්නත් ගියේ ඩො.මි. 1200යි. නිව් පෝට‍්‍රස් එනර්ජි සමාගමට ටෙන්ඩරයකින් තොරව පවරන්නේ එම කොන්ත‍්‍රාත්තුවයි. මෙය ටේක් ඕ පේ (මිලදී ගන්න නැත්නම් ගෙවන්න* වර්ගයේ ගිවිසුමක්. අපට අවශ්‍ය වුවත් නැතත් ගෙවන්න සිද්ධ වෙනවා. සාමාන්‍යයෙන් අපට කෙරවලපිටිය බලාගාරය මගින් විදුලිය අවශ්‍ය වන්නේ දවසේ ප.ව. 6 සිට රාත‍්‍රී 12 අතර කාලයෙදී පමණයි. ඒ සඳහා අපට දිනකට අවශ්‍ය වන්නේ ගෑස් ගැලූම් ලක්ෂ 07ක් පමණයි. නමුත් ගිවිසුම අනුව අප පාවිච්චි කළත් නොකළත් දිනකට ගෑස් ගැලූම් ලක්ෂ 12කට අදාළ ගෙවීම් කළ යුතුව තිබෙනවා. ගැලූම් ලක්ෂ 05ක් ඉතිරි වන නිසා පෙර දිනයේ ගෙවන ලද ගෑස් ප‍්‍රමාණයට අපට පසු දිනයේත් ගෙවීම් කිරීමට සිදු වනවා. දිනකට ගෑස් ගැලූම් ලක්ෂ 05ක් බැගින් වසර 10කට දැවැන්ත වැඩිපුර ගෙවීමක් සිදුකිරීමට අපට සිදු වනවා. ජලාශවල ජල ධාරිතාව අනුව ජල විදුලිය මගින් අපට 25%-45% දක්වා ප‍්‍රමාණයක් අපට විදුලි පද්ධතියට එකතු කළ හැකියි. වැඩි ජල විදුලි බල සැපයුමක් තිබියෙදී නොමිලේම විදුලි බල සැපයුම ලබා ගත හැකිව තිබුණත් මෙම ගිවිසුම නිසා අපට ගෑස් මිලදී ගැනීමට සිදු වනවා. ආණ්ඩුව රට ඇද දමා තිබෙන්නේ මෙවැනි අවාසිදායක ගිවිසුමකටයි.

ආණ්ඩුව මේ වෙනුවෙන් තෝරාගෙන ඇති නිව් පෝට‍්‍රස් එනර්ජි සමාගම අද ලෝකයේ බංකොලොත් වෙමින් ඇති සමාගමක්. ලෝකයේ එල්එන්ජී (ස්වාභාවික ගෑස්* ව්‍යාපාර අතර පළමු 250 තුළවත් මෙම සමාගම නැහැ. ඔවුන්ට ඒ සම්බන්ධයෙන් අත්දැකීම් නැහැ. 2018 වසරේ පුවටෝරිකෝ රාජ්‍යයේ මේ සමාගම විසින් ටෙන්ඩර් රහිතව සිදු කරන ලද ¥ෂිත ව්‍යාපෘතියක් නිසා අද ඔවුනට එරෙහිව නඩු පවරනු ලැබ තිබෙනවා. නිව් පෝට්ට‍්‍රස් එනර්ජි සමාගමේ මූල්‍ය තත්වය අතිශය අවදානමේ තිබෙනවා. 2021 මාර්තු වන විට මෙම සමාගමට ඩො.මි. 1240ක ණය ප‍්‍රමාණයක් ගෙවිය යුතුව තිබුණා. වසරක් තුළ ණය ප‍්‍රමාණය ඩෙ.මි. 290කින් ඉහළ ගොස් තිබෙනවා. ආදායම් වාර්තා අනුව සමාගමේ සංචිත ලෙස තිබෙන්නේ ඩො.මි. 360.1ක මුදලක් පමණයි. ඇමරිකානු කොටස් වෙළඳපොළ තුළ සමාගමේ කොටස් මිල වේගයෙන් කඩා වැටෙමින් තිබෙනවා. ආණ්ඩුව ටෙන්ඩර් කැඳවීමකින් තොරව කෙරවලපිටිය පවරන්නේ මෙවැනි සමාගමකටයි.

විදුලි බල මණ්ඩලයේ ඉංජිනේරුවන්ගේ ගණන් බැලීමට අනුව කෙරවලපිටිය ගෑස් සැපයුම වෙනුවෙන් පමණක් ඩො.මි. 800ක පමණ අලාභයක් රටට සිදු වනවා. නමුත් ගිවිසුමට අනුව කෙරවලපිටියට පවතින බලාගාරයට අමතරව කැළණිතිස්ස, කෙරවලපිටිය ආශ‍්‍රිතව ඉදිවන ඕනෑම බලාගාරයකට, මුතුරාජවෙල ඉදිවීමට නියමිත බලාගාරයට ගෑස් සැපයීමට සමාගමට පැවරෙන නිසා අවම වශයෙන් මෙම පාඩුව ඩො.මි. 1500ක් පමණ විය හැකියි. ඒ අනුව මෙහි නාස්තිය දූෂණය ඉතාම පැහැදිලියි.

ඒ වගේම මෙම බලාගාරයේ අයිතිය පවරා ගැනීම මගින් ඇමරිකානු එක්සත් ජනපදය අපේ රටට මැදිහත්වීමට බලපත‍්‍රයක් ලබා ගන්නවා. අපේ රටේ විදුලිබල සැපයුමෙන් 1/3ක් හෝ ඇතැම්විට 1/2ක් පමණ ඒකාධිකාරයක් ගොඩනගා ගැනීමෙන් මේ රට පාලනය කිරීමේ හැකියාව ඇමරිකාවට ලබා ගත හැකියි. නිවෙස්වලට, කර්මාන්තශාලාවලට විදුලිය ලබා දෙනවාද නැද්ද යන්න තීරණය කිරීමට ඔවුන්ට හැකියි. ඉන්දියානු සාගරය භූ දේශපාලනිකව ආතතිකාරී තත්වය තිබෙනවා. චීනය, ඉන්දියාව, ඇමරිකාව විවිධාකාර මැදිහත්වීම් කරමින් සිටිනවා. බලාගාරයේ අයිතිය හා ගෑස් සැපයුමට අමතරව ගෑස් ගබඩාව ලෙස තමන්ගේ නෞකාවක් කොළඹ වරායට ආසන්නව බටහිර වෙරළාසන්න මුහුදේ ස්ථීරව නවතා තැබීමට ඔවුනට අවස්ථාව ලැබෙනවා. ඔවුන් මෙම සාගර කලාපයේ පය තබා ගැනීමට තැනක් හොයමින් සිටියා. මේ ව්‍යාපෘතිය මගින් ඔවුන්ට ඒ සඳහා වන පහසුවක් ලැබෙනවා.

රටේ ජනතාවටත් කැබිනට් මණ්ඩලයටත් හොර රහසේ අත්සන් තබන ලද මෙම ගිවිසුම මගින් 01. විදුලිය ලබා දීමේ ඒකාධිකාරයක් ඇ.එ.ජ.ට ලබා දෙනවා. 02. බරපතළ නාස්තියක්, අවාසියක් හා ¥ෂණයක් රටට තිබෙනවා. 03. ඇමරිකානු මැදිහත්වීමට පාර කැපීමක් සිදුවනවා. මෙම මගඩිය සිදු වූයේ රාජපක්ෂ පවුලේ ඉහළම තිදෙනා සම්බන්ධ කරගෙනයි. නල පද්ධතියට හා ගබඩා පර්යන්තයට ජාත්‍යන්තර ටෙන්ඩර් කැඳවා තිබියෙදී 2021 ජනවාරි මාසයේ නිව් පෝට්ට‍්‍රස් එනර්ජි සමාගමේ ප‍්‍රධානියා වූ වෙස් ඊඩන්ස් ලංකාවට පැමිණ මහින්ද රාජපක්ෂ අගමැතිවරයා හමු වුණා. මේ මාසයේ ජූලි මාසයේදී නිව් පෝට‍්‍රස් එනර්ජි සමාගම සහ මුදල් අමාත්‍යංශයේ ලේකම්වරයා අතර පේ‍්‍රම්වර්ක් ඇග‍්‍රිමන්ට් එකක් අත්සන් තැබුණා. ඒ ගිවිසුම මේ රටේ ජනතාව දැක්කෙ නැහැ. පසුගිය සැප්තැම්බර් 06 බැසිල් රාජපක්ෂ මුදල් ඇමතිවරයා කැබිනට් පත‍්‍රිකාවක් ඉදිරිපත් කරනවා. ඒ ටෙන්ඩර් නොසලකා නිව් පෝට‍්‍රස් එනර්ජි සමාගමට අදාළ ව්‍යාපෘති ලබාදෙන්න. එම කැබිනට් පත‍්‍රිකාව එන විට විදුලි බල ඇමති හෝ ඛනිජතෙල් ඇමති දන්නේ නැහැ. සැප්. 17වැනිදා මධ්‍යම රාත‍්‍රී 12.06ට මෙම ගිවිසුමට අත්සන් තබනවා. කැබිනට් මණ්ඩලයට ඒ ගැන වාර්තාවක් ඉදිරිපත් කරන්නේ නැහැ. මේවා සිදුවුණේ ජනාධිපතිවරයා එක්සත් ජාතීන්ගේ සැසියට යන්න පැය කිහිපයකට කලිනුයි. ප‍්‍රසන්න රණතුංග වගේ ඇමතිවරු කියන විදිහට ජනාධිපතිවරයා මේ ගිවිසුමේ වාසිදායක තත්වය පිළිබඳව කැබිනට් මණ්ඩලයට දීර්ඝ දේශනයක් කර තිබෙනවා. ඒ නිසා මෙහි වගකීමෙන් ජනාධිපතිවරයාට, අගමැතිවරයාට සහ මුදල් ඇමතිවරයාට ගැලවෙන්න බැහැ.

මේ රටේ ජනතාව මෙම ගිවිසුම දැනගත යුතුව තිබෙනවා. ජනතාව පමණක් නොව පාර්ලිමේන්තුව සහ කැබිනට් මණ්ඩලය පවා එය දන්නේ නැහැ. රාජපක්ෂ පවුල විසින් කැබිනට් මණ්ඩලයටත් කොළේ වසා ගැසීමක්. අපේ මව්බිම ඉතාම අනතුරුදායක වේදිකාවකට කැඳවාගෙන යාමට ඔවුන් කටයුතු කර තිබෙනවා. කොළඹ වරාය දකුණු ජැටිය ආසන්නයේ අක්කර 13ක් සැපයුම් සේවා මධ්‍යස්ථානයක් වෙනුවෙන් පැවරීමට කටයුතු කර තිබෙනවා. දකුණු ජැටිය මේ වන විටත් අවුරුදු 35කට චීන සීඅයිසීටී සමාගමට පවරා අවසන්. බටහිර ජැටිය මීටර් 20ක් ගැඹුරු කර පාවිචිචි කිරීමට ඉන්දියාවේ අදානි සමාගමට ලබා දී තිබෙනවා. අපට ලාභ ඉපයිය හැකි කොළඹ වරායේ අයිතිය වෙනත් රටවලට පවරමින් තිබෙනවා. හම්බන්තොට වරාය අවුරුදු 200කට ආසන්න කාලයකට චීනයට ලබා දී තිබෙනවා. දැන් තෙල් ටැංකි සංකීර්ණය සහිත ත‍්‍රීකුණාමලය චීන වරාය භූමිය නීත්‍යානුකූලවම ඉන්දියාවට ලබා දෙන්න යනවා. රටේ භූ දේශපාලනික වැදගත්කම වෙන රටවලට සින්න වීමට මොවුන් ඉඩ ලබා දී තිබෙනවා. කොළඹ වරාය, හම්බන්තොට වරාය සහ ත‍්‍රීකුණාමල වරාය ආදී වැදගත්ම ස්ථාන මේ රටවල් විසින් අත්පත් කරගනිමින් තිබෙනවා. ඉන්දියාවේ විදේශ ලේකම්වරයා ලංකාවේ හැසිරෙන විදිහෙන්, කාබනික පොහොරවල ක්ෂුද්‍ර ජීවීන් නොමැති බවට චීන තානාපති කාර්යාලයෙන් තහවුරු කර ලිපි ලැබෙන විදිහෙන් මෙම රටවල් අපට බලපෑම් කරන ආකාරය පැහැදිලි වනවා. මේ ගිවිසුම් සියල්ල අපේ රට මර උගුලක හිරකරන ගිවිසුම් වන බව පැහැදිලියි.

මේ විනාශ කරමින් සිටින්නේ, සින්න කර දෙමින් සිටින්නේ අපේ මාතෘ භූමියයි. ජනතාව කොවිඞ් නිරෝධායන නීති තුළ සිර කර ආණ්ඩුව මාතෘ භූමිය විකුණමින් සිටිනවා. මේ ඇමරිකානු පුරවැසියන් අපේ මව්බිම විකුණා දමා අවසානයේ තමන්ගේ රටවලට පලායාවි. මව්බිමට ආදරය කරන සියලූ ජනතාව ඊට එරෙහිව නැගී සිටිය යුතුව තිබෙනවා. අපේ දේශපාලන වගකීම වන්නේ එයයි. මීට මාසයකට කලින් අත්සන් තබන ලද රහස් ගිවිසුම වහා හෙළිදරව් කරන ලෙස අපි ආණ්ඩුවට බල කරනවා. ඒ වගේම ආණ්ඩුව මේ යමින් සිටින ගමන නතර කිරීම සඳහා සියලූ වෘත්තිකයන්ට, වෘත්තීය සමිතිවලට, ප‍්‍රගතිශීලීන්ට, රට ගැන සිතන සියලූ දෙනාට ආරාධනා කරනවා.

මාධ්‍යවේදීන් නැගූ ප‍්‍රශ්නවලට පිළිතුරු ලබා දෙමින්

රාජපක්ෂවරුන් මේ සියල්ල කරන්නේ බලහත්කාරයෙනුයි. ඔවුන් මේ රටේ ජනතාව සද්භාවයෙන් ලබාදුන් ජනවරම භුක්තියට සරිකරගෙන. ඔවුන් ජනතාව, පාර්ලිමේන්තුව හෝ කැබිනට් මණ්ඩලය ගණන් ගන්නේ නැහැ. 20වැනි සංශෝධනය මගින් අත්කරගත් බලතල, කැබිනට් බලතල තිබියෙදී මේවා නීතිය මගින් සම්පූර්ණයෙන් විසඳා ගත නොහැකියි. රටට එරෙහි මේ උත්සාහයන් මුළුමනින්ම පරාජය කළ හැක්කේ ජනතා බලයකින් පමණයි.

කොවිඞ් වසංගතය හමුවේ ලෝකයේම දරුවන්ගේ අධ්‍යාපනය අර්බුදයට ගොස් තිබෙනවා. ඒ තත්වය තුළ අපේ රටේ ගුරුවරු ස්වේච්ඡුාවෙන් ඔන්ලයින් අධ්‍යාපනය දෙන්න පටන් ගෙන තිබුණා. අධ්‍යාපන අමාත්‍යාංශය කී පරිදිම ඔන්ලයින් පහසුකම් ලබාගැනීමට හැකිව තිබුණේ සිසුන්ගෙන් 50%කට පමණයි. දැන් වැටුප් ගැටලූව හමුවේ එම ඉගැන්වීම් නතර වී තිබෙනවා. මෙය ගුරුවරුන්ගේ වෘත්තීය සටනක් පමණක් නෙමෙයි; අභිමානයෙන් ජීවත්වීමට කරන අරගලයක්. මානසික තෘප්තියෙන් වෘත්තියේ නිරත වන ගුරුවරයෙක් බිහිකර ගත යුතුයි. ආණ්ඩුව මෙම ගැටලූව බලහත්කාරයෙන්, ඇෙඟ් හයියෙන් විසඳීමට හදනවා. මෙය දරුවන්ගේ අනාගතය සම්බන්ධ කරුණක්. එය වහා විසඳීමට කටයුතු කරන ලෙස අපි ආණ්ඩුවට බලකරනවා.

2019 ජනාධිපතිවරණයේදී සහ 2020 මහ මැතිවරණයේදී ගුරුවරුන් විශාල පිරිසක් ඡුන්දය ලබා දුන්නේ ආණ්ඩුවේ අපේක්ෂකයින්ටයි. දැන් ආණ්ඩුව තමන්ගේ පසුපෙළ මන්ත‍්‍රීවරුන් ලවා අපහාස කරනවා. තර්ජනය කරනවා. පොහොර ඉල්ලන විට ගොවීන්ට සමාගම් වෙනුවෙන් කතා කරන බව කියනවා. කෙරවලපිටිය විකිණීමට එරෙහි වීමේදී බලාගාරවලින් සල්ලි ගන්න බව කියනවා. ආණ්ඩුවට වෙනත් පිළිතුරු නැහැ.

The post ‘මේ විනාශ කරමින් සිටින්නේ, සින්න කර දෙමින් සිටින්නේ අපේ මාතෘ භූමියයි’ – වෛද්‍ය නලින්ද ජයතිස්ස appeared first on ColomboXnews.

Source From Colomboxnews
Author: Kamal Dhammika
#SriLanka #News #lka