කොරෝනා වයිරසයට අදාළව පැනවූ නීති උල්ලංඝනය කිරීම සම්බන්ධයෙන් චිලී ජනාධිපති සෙබස්තියන් පිසෙරාට ඇමරිකානු ඩොලර් 3500 ක (දළ වශයෙන්) දඩයක් නියම කර ඇති බව වාර්තාවේ.
එය ආසන්න වශයෙන් රුපියල් හයලක්ෂ හතළිස් අටදහසක් වන අතර ජනාධිපතිවරයා මුහුණු ආවරණයක් පැලඳ නොසිටීමේ සිද්ධියක් සම්බන්ධයෙන් මෙම දඩය නියම වී ඇත.
මුහුණු ආවරණයක් නොමැතිව ප්‍රසිද්ධ ස්ථානයක කාන්තාවක් සමග පෙනී සිටි සෙල්ෆි ඡායාරූපයක් මෙම මස මුලදී (දෙසැම්බර්) ජනමාධ්‍ය ඔස්සේ සංසරණය වීමෙන් අනතුරුව මෙලෙස ජනාධිපතිවරයාට එරෙහිව මෙලස නීතිය ක්‍රියාත්මක වී තිබේ. එම ඡායාරූපය සම්බන්ධයෙන් ජනාධිපතිවරයා ප්‍රසිද්ධියේ ජනතාවගෙන් සමාවද අයැදීමට කටයුතු කරන ලදි.
කචගුවා නගරයේ පිහිටි ඔහුගේ නිවස අසල වෙරළ තීරයේදී එම කාන්තාව තමන් සමග ඡායාරූපයකට පෙනී සිටින ලෙස ඇය ඔහුගෙන් ඉල්ලා සිට ඇත. ඒ අනුව තමන් අදාළ ඡායාරූපයට පෙනී සිටි නමුත් තමා එහිදී මුහුණ ආවරණයක් පැලඳ සිටිය යුතුව තිබුණු බව ජනාධිපතිවරයා සමාව අයදිමින් ප්‍රකාශ කර තිබේ.
ප්‍රසිද්ධ ස්ථානවලදී මුහුණු ආවරණ පැලඳීම සම්බන්ධයෙන් චිලී රාජ්‍යයේ දැඩි නීති ක්‍රියාත්මක වේ. ලතින් ඇමරිකාවේ වැඩිම කොවිඩ් – 19 ආසාදිතයන් සංඛ්‍යාවක් වාර්තා වන රටවල් අතුරින් චිලී රාජ්‍යය ඉදිරියෙන්ම සිටී. තවදුරටත් එහි රෝගීන් ඉහළ යමින් තිබේ. එක්සත් ජනපදයේ ජෝන් හෙප්කින්ස් විශ්වවිද්‍යාලයේ සංඛ්‍යා ලේඛනවලට අනුව මේ වනවිට චිලියෙන් කොවිඩ් – 19 ආසාදිතයන් 581,135 ක් වාර්තා වී ඇත. මරණ 16,051 ක් වාර්තා වී තිබේ.
The post මුහුණු ආවරණයක් නොපැළඳූ චිලී ජනාධිපතිට අධිකරණයෙන් ඩොලර් 3500ක දඩයක් appeared first on ColomboXnews.
Source From Colomboxnews
Author: Kamal Dhammika
#SriLanka #News #lka