මහින්දානන්දට කොරෝනා..? මැතිවරණ රැස්වීම් රැසකට ගිහින් – උසාවියටත් ආවේ නෑ

හිටපු රාජ්‍ය අමාත්‍ය මහින්දානන්ද අලුත්ගමගේට එරෙහිව පවරා ඇති නඩුවක් සැප්තැම්බර් මස 03 වෙනිදා කැදවීමට කොළඹ ස්ථිර ත්‍රිපුද්ගල විනිසුරු මඩුල්ල අද නියෝග කළා.

හිටපු අමාත්‍ය මහින්දානන්ද අලුත්ගමගේ අද අධිකරණයේ පෙනී නොසිටි අතර ඔහු වෙනුවෙන් පෙනී සිටි නීතිඥවරයා පවසා සිටියේ තම සේවාදායකයා පසුගිය දිනවල මහනුවර ප්‍රදේශයේ මහමැතිවරණ ප්‍රචාරක කටයුතු වල නිරත වී ඇති බවත් එම ප්‍රදේශ වල කොරෝනා රෝගීන් වාර්තා වී ඇති බැවින් සෞඛ්‍ය ආරක්ෂාව වෙනුවෙන් අද(15) දින අධිකරණයේ පෙනී නොසිටින බවයි.

දෙවන විත්තිකරු වන සතොස ආයතනයේ හිටපු සභාපති නලින් ප්‍රනාන්දු ද විවෘත අධිකරණයේ පෙනී නොසිටි අතර ඔහුද මැතිවරණ ප්‍රචාරක කටයුතු වලට සහභාගි වී ඇති බැවින් අධිකරණයෙන් පිටත රැදී සිටින නීතිඥවරයා අධිකරණයට දැනුම් දුන්නා.

2014 වර්ෂයේ ක්‍රීඩා අමාතයවරයා ලෙස කටයුතු කිරීමේදී ක්‍රීඩා උපකරණ මිල දී ගැනීමේදී රුපියල් පන් කෝටි තිස් එක් ලක්ෂයකට අධික මුදලක් අවභාවිත කර ඇතැයි කියන සිද්ධියට අදාලව අල්ලස් කොමිෂන් සභාව අලුත්ගමගේට සහ සතොස ආයතනයේ හිටපු සභාපති නලින් ප්‍රනාන්දු යන අයට එරෙහිව අධිකරණයේ නඩු පවරා තිබෙනවා.

ඒ අනුව මෙම නඩුව සැප්තැම්බර් මස 3 දින කැදවීමට විනිසුරු ආර්. ගුරුසිංහ, ශෂී මහේන්ද්‍රන් සහ අමල් රණරාජා යන විනිශ්චයකාරවරුන්ගෙන් සමන්විත ස්තීර ත්‍රිපුද්ගල විනිසුරු මඩුල්ල නියෝග කළා

The post මහින්දානන්දට කොරෝනා..? මැතිවරණ රැස්වීම් රැසකට ගිහින් – උසාවියටත් ආවේ නෑ appeared first on ColomboXnews.