මම නාමල් කුමාර කියල කෙනෙක් දන්නෙත් නැහැ, දැකලත් නැහැ – මෛත්‍රී පාස්කු කොමිසමේදී කියයි

අන්තවාදය සම්බන්ධයෙන් බුද්ධි අංශ වෙතින් ලැබී තිබුණු වාර්තා අනුව එය වැලැක්වීම සඳහා අවශ්‍ය උපදෙස් හා නියෝග දුන්  බවට ලිඛිත සාක්ෂි ඉදිරිපත්කිරීමට හැකියාවක් නැති අතර එම සාකච්ජා ජනාධිපති ලේකම් කාර්යාලයේ පැවති  බවත් ලිපි ලේඛන ඇත්නම් එම කාර්යාලයේ ලිපිගොණු පරීක්ෂා  කිරීමට සිදුවන බවත් හිටපු ජනාධිපති මෛත්‍රීපාල සිරිසේන මහතා ඊයේ (17) පාස්කු ප්‍රහාරය සම්බන්ධයෙන් විමර්ශනය කරන ජනාධිපති විමර්ශන කොමිෂන් සභාව හමුවේ සාක්ෂි දෙමින් පැවසුවේය. 

හිටපු ජනාධිපතිවරයා මේ බව සඳහන් කළේ සාක්ෂිය  මෙහෙය වු රජයේ අතිරේක සොලිසිටර් ජනරාල්වරිය විසින් නගන ලද “උපදෙස් හා නියෝග දුන් බවට ලිඛිත සාක්ෂි ඉදිරිපත් කිරීමට හැකියාවක් පවතිනවාද යන්න කළ ප්‍රශ්නයට පිළිතුරක් ලෙසය. 

රජයේ අතිරේක සොලිසිටර් ජනරාල්වරිය සිය සාක්ෂි මෙහෙයවීම අවසාන අදියරට ගෙන එමින් හිටපු ජනාධිපතිවරයාගෙන් විමසා සිටියේ හිටපු ආරක්ෂක ඇමති, නීතිය හා සාමය පිළිබඳ අමාත්‍යවරයා ලෙසත් විධායක ජනාධිපතිවරයා ලෙසත් දෙන ලද උපදෙස් හා නියෝග ක්‍රියාත්මක වී නැත්ද යන්නයි 

එහිදී හිටපු ජනාධිපතිවරයා සාක්ෂි දෙමින්  පැවසුවේ තමන් උපදෙස් හා නියෝග ලබා දී තිබුණද  පහළ සිටින නිලධාරීන් ඒවා ක්‍රියාත්මක කර නොමැති බව පෙනෙන්නට ඇති බවයි. 

එම පිළිතුරෙන් පසු යළි පෙරළා ප්‍රශ්නයක් යොමුකරමින් අතිරේක සොලිසිටර් ජනරාල්වරිය හිටපු ජනාධිපතිවරයාගෙන් විමසා සිටියේ තමන්  උපදෙස් හා නියෝග ලබා දී ඇත්නම් ඒවා ක්‍රියාත්මක වීම ගැන නිසි පරිදි පසුවිපරමක් සිදු වී නැති බව පෙනෙන්නට තිබෙනවා නේද යන්නයි. 

” මම නිසි පරිදි උපදෙස් දීලා තිබෙන්නේ. ඒවා පහළ නිලධාරීන් ක්‍රියාත්මක නොකිරීමේ ප්‍රශ්නයක් තිබෙන්නේ. එසේ ක්‍රියාත්මක වූවා නම් මෙවැනි තත්ත්වයකට මුහුණ දෙන්න වෙන්නේ නැහැ.” යනුවෙන්  හිටපු ජනාධිපතිවරයා ඊට පිළිතුරු ලබා දුන්නේය. 

මෙහිදී කොමිසම විසින් ප්‍රශ්නයක් නගමින් විමසුවේ එම කාලය තුළ පැවති දේශපාලන අර්බුදකාරී තත්ත්වය මත නිසි උපදෙස් නොලැබීමෙන් අන්තවාදීන්ට බෝම්බ පුපුරුවා ගැනීමට හැකියාවක් ලැබී තිබෙන බවට යෝජනා කරන බවයි. 

” ඒ වන විට දේශපාලන අර්බුදයක් තිබුණේ නැහැ. ශ්‍රේෂ්ඨාධිකරණ තීන්දුවෙන් පසු යළි ආණ්ඩුව පවත්වාගෙන ගියා. දේශපාලන මත ගැටුම් තිබුණත් අමාත්‍යාංශ, ආයතන වලට බලපෑමක් තිබුණේ නැහැ. එහෙම බලපෑවා කියලා මම විශ්වාස කරන්නෙත් නැහැ. මොකද හැම සතියකම කැබිනට් මණ්ඩලය රැස්වෙනවා. ආරක්ෂක අමාත්‍යාංශයේ රැස්වීම් තිබෙනවා. විවිධ කොමිටි තිබෙනවා. මේවායේදී සකච්ජ කරනවා. අවශ්‍ය කටයුතු කරගෙන ගියා. මෙතන වෙලා තියෙන්නේ වෙන දෙයක්. වසර හතරක් ආරක්ෂක මණ්ඩලයේ උපදෙස් හා නියෝග දීලා තිබෙනවා. ක්‍රියාත්මක නොවීමයි වෙලා තියෙන්නේ. බුද්ධි අංශ අතරින් විශාල බුද්ධි අංශය තිබෙන්නේ හමුදාවට. උතුරු නැගෙනහිර නාවික බුද්ධි අංශය තමා වඩා ශක්තිමත්ව සිටියේ. නමුත් මේ ගැන ඒ අංශවලින්වත් වාර්තා වුණේ නැහැ. මඩකලපුව පොලිස් නිලධාරීන්ගේ ඝාතනය ගැන වුණත් කිව්වේ එය LTTE වැඩක් විදිහට. පස්සේ තමයි සහරාන්ගේ කට්ටිය ළඟ තිබිලා එම නිලාධාරීන්ගේ ආයුධ හොයාගත්තේ.” යනුවෙන් හිටපු ජනාධිපතිවරයා සාක්ෂි ලබා දුන්නේය.

රජයේ අතිරේක සොලිසිටර් ජනරාල්වරිය: කුමන පැහැදිලි කිරීම කළත් මෙම කොමිසමට ඉදිරිපත්ව තිබෙන සාක්ෂි අනුව අන්තවාදී කටයුතු සම්බන්ධයෙන් ආරක්ෂක මණ්ඩලයේදී නිසි අවධානයක් යොමු නොකිරීමත් නිසිපරිදි අධීක්ෂණය නොවීමත් නිසා 21 වැනිදා ප්‍රහාරය සිදු වූ බවට ඒත්තු ගැන්වෙනව කියලා කිව්වොත්?

සාක්ෂිකරු: ඒ සාක්ෂි මම ප්‍රතික්ෂේප කරනවා. මම පිළිගන්නේ නැහැ. 2019 ජනවාරි, පෙබරවාරි මාසවලත් ආරක්ෂක මණ්ඩලය පැවතුණා. ඊට පෙර වසරවලත් ආරක්ෂක මණ්ඩලය රැස්වුණා. ආරක්ෂක අමාත්‍යාංශයේ නිලධාරීන් හමුවෙනවා. මම උපදෙස් දීලා තිබෙනවා. අවශ්‍ය දේ ක්‍රියාත්මක වෙලා නැති එකයි මෙතන ප්‍රශ්නය තියෙන්නේ. පරීක්ෂණ කරන නිලධාරීන් හරියට එය නොකළා නම් ඒ ඇයි කියන ප්‍රශ්නය තිබෙනවා. අප්‍රේල් 16 නැගෙනහිර පළාතේ මෝටර් සයිකලය පිපිරුණ වෙලාවේ ඒ ගැන හරියට පරීක්ෂණ කරන්න කියල ජනාධිපති උපදෙස් දෙන්න අවශ්‍ය නැහැ. ඒ ප්‍රදේශවල බුද්ධි අංශ තියෙනවා. ඒ අය මොනවද කළේ කියන ප්‍රශ්නය තිබෙන්නේ. මේ අංශවල දුර්වලතා රාශියක් තිබිලා තියෙන බව පේනවා. 

නැවතත් රජයේ අතිරේක සොලිසිටර් ජනරාල්වරිය සාක්ෂිකරු වෙත යෝජනා කළේ ”ආගමික අන්තවාදය ගැන නිසි පරීක්ෂණ නොකිරීමත් බුද්ධි අංශවල තොරතුරුවලට නිසි අවධානය යොමු නොකිරීමත් ගත යුතු නිසි ක්‍රියාමාර්ග අනුගමනය නොකිරීමත් නිසා ආගමික අන්තවාදය හිස ඔසවමින් අප්‍රේල් 21 ප්‍රාහරය සිදු වී ඔබගේ රටේ අහිංසක ජනතාවගෙන් කොටසක් ඊට හසු වී මිය ගොස් ඇති බවයි. 

ඊට පිළිතුරු දෙමින් හිටපු ජනාධිපතිවරයා එම යෝජනාව ප්‍රතික්ෂේප කරන ලදී. 

” මම අද මේ කොමිසමට සාක්ෂි දෙන්නේ හතරවෙනි දවසට. මම ස්තුති වන්තවෙනවා ප්‍රහාරයෙන් පසුව මම පාර්ලිමේන්තුවේ කළ ප්‍රකාශය මේ කොමිසමේ ඇහෙන්නට සැලැස්වීම ගැන. ඒක තමයි මගේ  හෘද සාක්ෂිය. පාස්කු ප්‍රහාරයට පෙරත් මම කටයුතු කළේ ඒ විදිහට. මම දේශපාලනය කළේ රට වෙනුවෙන් සහ රටේ ජනතාව වෙනුවෙන්. වෙනත් අංශ වල වගකීම පැහැර හැරීම මගේ ප්‍රශ්නයක් නෙවෙයි. මං ආරක්ෂක විශේෂඥයෙක් හෝ බුද්ධි විශේෂඥයෙක් නොවෙයි. ඒ තනතුරුවලට සුදුසු අය තම අයදුම්පත් කැඳවලා පත්කරලා තිබෙන්නේ. බඳවා ගත්තට පස්සෙත් පුහුණුවීම් කරනවා. රටරටවලට යවලා පුහුණු කරන්නේ. ඒ නිසා ඔවුන් ඔවුන්ගේ රාජකාරිය ඉටුකළ යුතුවෙනවා. නමුත් බුද්ධි අංශ නිසිපරිදි ක්‍රියාත්මක නොවුණේ ඇයි කියන ප්‍රශ්නය තිබෙනවා. අවශ්‍ය උපදෙස් මඟපෙන්වීම ලැබුණා නම් ඇයි ක්‍රියාත්මක නොවුණේ ? මම පුදුමයට පත්වෙනවා,නැගෙනහිර නාවික බුද්ධි අංශය ශක්තිමත්. ඒත් ඔවුන්ටවත් මේ තොරතුරු ලැබිලා නැහැ. මම ජනාධිපති  ලෙස මගේ වගකීම ඉටුකරලා තිබෙනවා. එතනින් පහළට වෙලා නැහැ. අන්තවාදය මර්දනය කිරීම ගැන ආරක්ෂක මණ්ඩ නියෝග එහිදී ලබා දී තිබෙනවා. එතැනින් පහළට ප්‍රාදේශීය නිලධාරින්ද ඇතුළුව ක්‍රියාත්මක වෙන්නේ  එහි වගකීම ඔවුන් ගත යුතු වෙනවා” යනුවෙන් හිටපු ජනාධිපතිවරයා සාක්ෂි ලබා දුන්නේය. 

මේ අතර ප්‍රහාරය වළක්වා නොගැනීමේ වගකීම හිටපු පොලිස්පතිවරයා භාරගන්නේ නම්  මලල්ගොඩ කමිටුවේ නිර්දේශ වෙනස් කිරීමට තමන්ට  හැකි බවට පොලිස්පතිවරයාට පැවසුවේ ද යන්න පිළිබඳව ද රජයේ අතිරේක සොලිසිටර් ජනරාල්වරිය හිටපු ජනාධිපතිවරයාගෙන් විමසුවේය. 

ඊට පිළිතුරු දෙමින් මෛත්‍රීපාල සිරිසේන මහතා කියා සිටියේ ශ්‍රේෂ්ඨාධිකරණ විනිසුරුවරයෙක්ගෙන් සමන්විත කමිටුවක නිර්දේශ වෙනස් කිරීමට තරම් තමන් අමනෝඥයෙකු නොවන බවයි. 

ජාතික ආරක්ෂාවට වඩා  නාමල් කුමාර නැමැත්තා සම්බන්ධයෙන් වැඩි අවධානයක් යොමුකර තිබෙනවාද යන්න කළ ප්‍රශ්න කිරීමේදී හිටපු ජනධිපතිවරයා සඳහන් කළේ තමන් සම්පුර්ණයෙන් එය ප්‍රතික්ෂේප කරන බවයි. 

”ආරක්ෂක මණ්ඩලයේදී නාමල් කුමාර ගැන කතා කරලා නැහැ. මම නාමල් කුමාරව දන්නෙත් නැහැ. දැකලත් නැහැ. කවුරුන් හෝ එවැනි සාක්ෂියක් දී ඇත්නම් එය වැරදියි.” යනුවෙන් ඒ සම්බන්ධයෙන් තවදුරටත් සාක්ෂි දෙමින් සිරිසේන මහතා පවසන ලදී. 

රජයේ අතිරේක සොලිසිටර් ජනරාල්වරිය: හිටපු ජනාධිපතිතුමනි,ජාතික ආරක්ෂාවට වඩා මත් ද්‍රව්‍ය හා මදුෂ් ගැන වැඩි අවධානයක් ඔබේ කාලයේදී යොමු කළා කිව්වොත්?

සාක්ෂිකරු: ඒක නිවැරදි නැහැ. ඒවා එක් එක් කාලවලදී ආපු ප්‍රශ්න. පාතාලය හා මදුෂ් වගේ කාරණා අවස්ථාවට අනුව කතා කළේ. ඒවාට ජාත්‍යන්තර සම්බන්ධතා පවා තිබෙනවා. මදුෂ්ට මුල් තැන දීලා ජාතික ආරක්ෂාව යටපත් වුණේ නැහැ. ජාතික ආරක්ෂාවට මුල්තැන දීලා තමයි අනෙක් දේවල් කතා කළේ. 

රජයේ අතිරේක සොලිසිටර් ජනරාල්වරිය:ඒ කියන්නේ ආරක්ෂක මණ්ඩලයේදී මදුෂ් ගැන කතා කළේ නැහැ කියන එකද?

සාක්ෂිකරු: කතා කළා 

රජයේ අතිරේක සොලිසිටර් ජනරාල්වරිය: මුස්ලිම් ජන කොට්ඨාස නියෝජනය කරන ඇමතිවරුන්ට ඔබ කිව්වද මෙහෙම අන්තවාදය ගැන වාර්තා එනවා. ඒවා ප්‍රාදේශීය වශයෙන්ම පාලනය කරගන්න කියන උපදෙස් දීලා තිබුණද ?

සාක්ෂිකරු: ඔව් එහෙමයි 

රජයේ අතිරේක සොලිසිටර් ජනරාල්වරිය: මෙම කොමිසම හමුවේ මේ වෙද්දී හිටපු අමාත්‍ය කබීර් හෂීම් මහතා සාක්ෂි දී තිබෙනවා. එතුමා සාක්ෂි දී තිබෙනවා කැබිනට් මණ්ඩලයේදී එහෙම උපදෙසක් ලැබුණේ නැහැ කියල?

සාක්ෂිකරු: එහෙම නම් එතුමා ඒ කැබිනට් රැස්වීමට ඇවිල්ලා නැතුව ඇති. අවස්ථා කිහිපයකදීම මම උපදෙස් දුන්නා 

රජයේ අතිරේක සොලිසිටර් ජනරාල්වරිය: ඒ කියන්නේ කබීර් ඇමතිතුමා ඒ එකම කැබිනට් රැස්වීමකටවත් ඇවිත් නැහැ කියන එකද?

සාක්ෂිකරු: ඒ ගැන මම දන්නේ නැහැ. එයා එහෙම කිව්වේ ඇයි කියල තමයි ප්‍රශ්නේ. 

රජයේ අතිරේක සොලිසිටර් ජනරාල්වරිය: තස්ලීම්ට වෙඩි තියපු වෙලාවේ තමන්ගේ ආරක්ෂාව වැඩි කරන්න කියල කබීර් හෂීම් හිටපු ඇමතිතුමා ඉල්ලීමක් කරලා තිබුණා නේද?

සාක්ෂිකරු: එහෙමයි 

රජයේ අතිරේක සොලිසිටර් ජනරාල්වරිය: නමුත් එය වුණේ නැහැ තමන්ගේ ආරක්ෂාව තමන්ටම සලසගන්න වුණා කියලයි කබීර් හෂීම් මහතා කිව්වේ. ඔබතුමා මොකද ඒ ගැන කියන්නේ ?

සාක්ෂිකරු: කබීර්ගේ සිද්ධිය ගැන මට මතකයි. අවස්ථා කිහිපයකදී මම පොලිස්පතිතුමාට ඒ ගැන කතා කළා. අදාළ නියෝජ්‍ය පොලිස්පතිට කතා කළා. ආරක්ෂාව ඉල්ලපු වෙලාවේ එය වැඩි කරන්න කියල කිව්වා. එහෙම නොදුන්නා නම් නිලධාරීන්ගේ ප්‍රශ්නයක්. 

ඒ අනුව අවශ්‍ය කටයුතු නිසියාකාරව සිදු නොවුණු බවට කරුණු ඉදිරිපත් වී තිබෙනවා නේදැයි යන්න මෙහිදී සාක්ෂිය මෙහෙය වූ රජයේ අතිරේක සොලිසිටර් ජනරාල්වරිය හිටපු ජනාධිපතිවරයාගෙන් තවදුරටත් ඒ ගැන ප්‍රශ්න කරන ලදී.

එහිදී හිටපු ජනධිපතිවරයා පැවසුවේ හොඳට වැඩකරන නිලධාරීන් සිටිනවා මෙන්ම එසේ නොවන අයද සිටින බවයි. 

” මං බොහොම පැහැදිලිව කියල තියෙනවා ආරක්ෂාව වැඩිකරන්න ඒ වගේම පරීක්ෂණ කඩිනම් කරන්න කියල.”

මෙහිදී කොමිසම විසින් හිටපු ජනාධිපතිවරයාට ප්‍රශ්නයක් යොමුකරමින් අසා සිටියේ ලබා දී ඇති නියෝග ක්‍රියාත්මක වී නැති බවත් තමන් ඒ ගැන දැනුවත්ද යන්නයි 

නියෝග ක්‍රියාත්මක වී නැති බව පැවසූ මෛත්‍රීපාල සිරිසේන මහතා කියාසිටියේ එසේ නොවීම ගැන පැමිණිල්ලක් හෝ නොලැබුණු බවයි. පැමිණිල්ලක් ආවා නම් ඒ ගැන සොයා බලන්න තිබුණු බවද  හෙතෙම සඳහන් කළේය.

එලෙස පැමිණිල්ලක් නොකරන්නේ සහනයක් ලැබෙයි කියා සිතන නිසා නේදැයි යන්න පිළිබඳවද හිටපු ජනාධිපතිවරායාගෙන් විමසුවේය. 

”ඔව්, නමුත් පැමිණිල්ලක් ආවේ නැහැ” යනුවෙන් ඊට ඔහු පිළිතුරු දුණි. 

හිටපු ජනාධිපතිවරයාගෙන් කොමිසම විසින් සාක්ෂි මෙහෙයවීම අවසන් කළ අතර හරස් ප්‍රශ්න විමසීම  එළඹෙන 22 වැනිදා පස්වරු 04.00ට ආරම්භ කිරීමට නියමිත අතර ප්‍රථමයෙන් හරස් ප්‍රශ්න විමසීම හිටපු පොලිස්පති පූජිත් ජයසුන්දර මහතා වෙනුවෙන් පෙනී සිටින ජනධිපති නීතිඥ අනුර මැද්දෙගොඩ මහතා විසින් සිදුකරනු ලබයි. 

The post මම නාමල් කුමාර කියල කෙනෙක් දන්නෙත් නැහැ, දැකලත් නැහැ – මෛත්‍රී පාස්කු කොමිසමේදී කියයි appeared first on ColomboXnews.

Source From Colomboxnews
Author: Kamal Dhammika
#SriLanka #News #lka