මංගලවත් එළියට දාපු බැසිල්ට විමල් මොකෙද්ද ? – බැසිල් පාර්ශ්වය විමල්ව ‘කෝචොක්‘ කරයි

20 වන ව්‍යවස්ථා සංශෝධනය මුල් කරගනිමින් ආණ්ඩුව තුළ ගැටළු ඇතිකිරීමට දිගින් දිගටම ක්‍රියා කරන්නේ නම් විමල් වීරවංශ මහතා ඇතුළු පිරිස ආණ්ඩුවෙන් නෙරපා හැරීමට සිදුවනු ඇති බව ශ්‍රී ලංකා පොදුජන පෙරමුණේ බැසිල් රාජපක්ෂ මහතාට හිතවත් පාර්ශ්වය අතර කතාබහට ලක්ව තිබේ. 

ඔවුන් පෙන්වා දෙන්නේ 2005 වසරේදී මහින්ද රාජපක්ෂ මහතාව ජනාධිපති ධුරයට පත්කිරීම උදෙසා අතිශයින්ම තීරණාත්මක භූමිකාව ඉටුකළ මංගල සමරවීර මහතා පවා ගැටුම්කාරී තත්වයක් ඇතිකරගත් මොහොතේ එම රජයෙන් එළියට දැමීමට නොපැකිළුණු බැසිල් රාජපක්ෂ මහතාට විමල් වීරවංශ යනු කොහෙත්ම සැලකිල්ලට ගතයුතු පුද්ගලයෙකු නොවන බවයි. 

මහින්ද රාජපක්ෂ මහතාට ජනාධිපතිවරණ අපේක්ෂකත්වය ලබාදීම, ඔහුට තීරණාත්මක සාධකය වූ ජනතා විමුක්ති පෙරමුණේ සහාය රැගෙනදීමට මැදිහත්වීම , 2005 ජනාධිපතිවරණ මෙහෙයුමේ කළමනාකාරීත්වය දැරීම යන ඉතාම තීරණාත්මක වගකීම් ඉටුකළ මංගල සමරවීර මහතා වුවත් පක්ෂය තුළ කැරැල්ලක් නිර්මාණය කිරීමට සූදානම් වූ මොහොතේ පක්ෂයෙන් නෙරපා හැරීමට තීන්දු කළේ බැසිල් රාජපක්ෂ මහතා විසිනි. එහි දේශපාලනික නිවැරදිභාවය පිළිබඳ ප්‍රශ්න තිබුණ ද බැසිල් රාජපක්ෂ මහතා ඊට පැකිළුණේ නැත. 

මංගල සමරවීර මහතා 2005දී ඉටු කළ භූමිකාව දෙස බැලීමේදී ගෝඨාභය රාජපක්ෂ මහතාව ජනාධිපති කරවීම සඳහා විමල් වීරවංශ මහතා කර ඇත්තේ මොනවාදැයි බැසිල් පාර්ශ්වයේ ප්‍රශ්න කිරීමට ලක්ව තිබේ. විශේෂයෙන් ගෝඨාභය රාජපක්ෂ මහතාව ජනාධිපති කරවූයේ තමන් විසින් යැයි විමල් වීරවංශ මහතා සිතාගෙන සිටීම උපහාසාත්මක වුවත් ඉවසිය හැකි බව පෙන්වාදෙන ඔවුන් පවසන්නේ එසේ සිතාගෙන සිටීම හරහා ආණ්ඩුව තුළ ගැටළු ඇතිකරමින් මෙසේ ප්‍රශ්න ඇතිකිරීමට ඉඩදිය නොහැකි බවයි. 

එසේම විමල් වීරවංශ මහතා මේ ආකාරයෙන් 20 මුල් කරගෙන බොරුවට මාධ්‍ය සංදර්ශන පවත්වමින් සිටින්නේ සිය ඇමතිකමට තවත් විෂයක් එකතු කරගැනීම, අමාත්‍යාංශ ලේකම්වරයා මාරුකරවීම, සංස්ථා සභාපතිකම් කිහිපයක් තම හිතවතුන්ට ලබාගැනීම වැනි අරමුණු කිහිපයක් මත බවයි ඔවුන් අවධාරණය කරන්නේ.

මේ අතරම විමල් වීරවංශ මහතා සුදුකොඩී ඔසවමින් බැසිල් රාජපක්ෂ මහතා සමඟ සාකච්ඡා කිරීමට අතරමැදියන් පිරිසක් එවා ඇති නමුත් බැසිල් රාජපක්ෂ මහතාට එවැනි වුවමනාවක් ද නොමැති බව පවසන බැසිල් පාර්ශ්වයේ පිරිස් අවධාරණය කරන්නේ 20 වැනි සංශෝධනයට ඡන්දය ප්‍රකාශ නොකර සිටීමට විමල් වීරවංශ මහතා තීරණය කළත් 20 වැනි සංශෝධනය අනිවාර්යයෙන්ම පාර්ලිමේන්තුවේ සම්මත කරගැනීමට බැසිල් රාජපක්ෂ මහතා කටයුතු කරන බවත් එහිදී විමල්ගේ පක්ෂයේ මන්ත්‍රීවරුන් කිහිපදෙනාගෙන් කොටසකුත් බැසිල් පාර්ශ්වය සමග එකතුවනු ඇති බවත්ය. 

The post මංගලවත් එළියට දාපු බැසිල්ට විමල් මොකෙද්ද ? – බැසිල් පාර්ශ්වය විමල්ව ‘කෝචොක්‘ කරයි appeared first on ColomboXnews.

Source From Colomboxnews
Author: Kamal Dhammika
#SriLanka #News #lka