බන්ධනාගාර නියාමක සංගමයේ සභාපති බන්ධනාගාරෙට හෙරොයින්, ජංගම දුරකථන ඇද අත්අඩංගුවට

වැලිකඩ බන්ධනාගාරය වෙත හෙරොයින්, ජංගම දුරකථන ඇතුළු තහනම් භාණ්ඩ රැගෙන ගොස් රැඳවියන්ට ලබාදී රුපියල් ලක්ෂ ගණනින් මුදල් ඉපයීමේ ජාවාරමක ප‍්‍රධානියා ලෙස කටයුතු කරද්දී අත්අඩංගුවට ගත් බන්ධනාගාර නියාමකවරයා බන්ධනාගාර නියාමක සංගමයේ සභාපතිවරයා වන බව වාර්තා වනවා.

රුපියල් දශලක්ෂයක හෙරොයින් තොගයක් සමග පෑලියගොඩ අපරාධ කොට්ඨාසය මගින් පෙරේදා (27 ) ඔහුව අත්අඩංගුවට ගත්තා.

සැකකාර බන්ධනාගාර නිලධාරියාගෙන් ප‍්‍රශ්න කිරීමේදී ඔහු පවසා ඇත්තේ බන්ධනාගාරයේ රඳවා සිටින හයිබි‍්‍රඞ් සුදා නමැති මත්ද්‍රව්‍ය ජාවාරම්කරුට ලබාදීමට මෙම හෙරොයින් රැගෙන යෑමට සූදානම් කර තිබූ බවයි.

හයිබි‍්‍රඞ් සුදා නමැති ජාවාරම්කරුගේ ගෝලයකු එම හෙරොයින් තොගය තමන්ට ලබාදුන් බවත් එය රැගෙන ගොස් හයිබි‍්‍රඞ් සුදාට ලබාදුන් පසු රුපියල් හැටදහසක මුදලක් තමන්ට ලැබෙන බවත් සැකකරු පොලිස් ප‍්‍රශ්න කිරීම් හමුවේ පවසා තිබුණා.

මේ දිනවල බන්ධනාගාරය වෙත පොලිස් විශේෂ කාර්ය බළකායේ ආරක්ෂාව යොදා ඇති බැවින් හෙරොයින් රැගෙන නොගොස් නිවසේ සඟවා තිබූ බව ද සැකකරු පොලිසියට පවසා තිබුණා.

සැකකරු වසරකට ආසන්න කාලයක් තිස්සේ මේ ආකාරයට බන්ධනාගාරය වෙත හෙරොයින්, ජංගම දුරකථන, සිම්කාඞ් පත් ඇතුළු තහනම් භාණ්ඩ රැගෙන ගොස් රැඳවියන්ට ලබාදී විශාල මුදලක් උපයා ඇති බව ද අනාවරණය වී තිබෙනවා.

The post බන්ධනාගාර නියාමක සංගමයේ සභාපති බන්ධනාගාරෙට හෙරොයින්, ජංගම දුරකථන ඇද අත්අඩංගුවට appeared first on ColomboXnews.

Source From Colomboxnews
Author: Kamal Dhammika
#SriLanka #News #lka