ප‍්‍රශ්න පත‍්‍ර දෙන්න කියා නිවසට ගිය විද්‍යා ගුරුවරයා‌ දාසය හැවිරිදි සිසුවියට ලිංගික අතවර කරලා.

තමාගෙන් අධ්‍යාපනය ලබන දාසය වියැති ශිෂ්‍යාවකට බරපතළ ලිංගික අපයෝජනයක් සිදු කිරීමේ චෝදනාව යටතේ අත්අඩංගුවට ගත් විද්‍යා ගුරුවරයකු මෙම මස 28 දා දක්වා රක්‍ෂිත බන්ධනාගාරගත කිරීමට හිඟුරක්ගොඩ මහෙස්ත‍්‍රාත් සනත් නානායක්කාර මහතා 15දා නියෝග කළේය.
 
 මෙලෙස රක්‍ෂිත බන්ධනාගාරගත කරන ලද්දේ ලංකාපුර අධ්‍යාපන කොට්ඨාසයේ පාසලක විද්‍යා ගුරුවරයකු ලෙස සේවය කරන තිස්පස් වියැති තිදරු පියෙකි.
 
 සැකකාර ගුරුවරයා පසුගිය මාර්තු මාසයේ දිනෙක දැරියගේ නිවසට ගොස් ඇත්තේ ප‍්‍රශ්න පත‍්‍ර කීපයක් ලබා දීම සඳහාය. ඒ මොහොතේ දැරිය පමණක් එම නිවසේ සිට ඇති අතර ඉන් ප‍්‍රයෝජන ගත් මොහු දැරිය කාමරයකට රැගෙන ගොස් ඇයට ලිංගික අපරාධයක් සිදුකර ඇති බව සඳහන් වේ. එහිදී දැරිය බියවීම නිසා එම සිදුවීම දෙමාපියන්ට හෙළිකර නොමැති අතර ඉන් ප‍්‍රයෝජන ගත් ගුරුවරයා තවත් අවස්ථාවකදී එකී වින්දිත දැරිය එම කි‍්‍රයාවට පොළඹවාගෙන ඇති බව පැවසේ.
 
 පසුගිය දිනෙක අපො සා.පෙළ පංති යළි ආරම්භ වූ අවස්ථාවේදී දැරිය තම සමීප යෙහෙළියකට මේ බව පවසා ඇත. එම යෙහෙළිය සිය මවට මේ බව කියා ඇති අතර ඇය වින්දිත දැරියගේ මවට මේ සම්බන්ධ තොරතුරු දැනුම් දීමෙන් පසු එහි සුල මුල අනාවරණය වූ බව අධිකරණයට කරුණු දැක්වූ හිඟුරක්ගොඩ පොලිසිය සඳහන් කළේය.
 
 හිඟුරක්ගොඩ පොලිසියට මේ පිළිබඳව පැමිණිල්ලක් ලැබී ඇත්තේ මෙම මස 12 දා ය. ඒ අනුව සැකකාර ගුරුවරයා අත්අඩංගුවට ගැනීම සඳහා පරීක්‍ෂණ පවත්වන අතරතුර ඔහු 15 දා නීතිඥ ලලිත් මර්වින් සිල්වා මහතා මගින් පොලිසියට භාර වී තිබේ. පසුව පොලිස් අත්අඩංගුවට පත්වූ හෙතෙම අධිකරණය වෙත ඉදිරිපත් කිරීමෙන් පසු මෙලෙස රක්‍ෂිත බන්ධනාගාරගත කෙරිණි.

The post ප‍්‍රශ්න පත‍්‍ර දෙන්න කියා නිවසට ගිය විද්‍යා ගුරුවරයා‌ දාසය හැවිරිදි සිසුවියට ලිංගික අතවර කරලා. appeared first on ColomboXnews.

Source From Colomboxnews
Author: Kamal Dhammika
#SriLanka #News #lka