පාස්කු ප්‍රහාරයට හේතුව ජනපති මෛත්‍රීගේ දියාරු මැදිහත්වීම සහ පූජිත් – නිලන්ත දෙදෙනාගේ කඹ ඇදිල්ලද?

පාස්කු ප්‍රහාරය සිදු වූයේ සමස්ත ක්‍රියාවලියේම වරදින් බව ඊයේ (28) හිටපු පොලිස්පති පූජිත් ජයසුන්දර මහතා පාස්කු ප්‍රහාරය සම්බන්ධයෙන් විමර්ශනය කරන ජනාධිපති විමර්ශන කොමිෂන් සභාව හමුවේ සාක්ෂි දෙමින් පැවසුවේය.

හිටපු පොලිස්පතිවරයා මේ බව සඳහන් කළේ මේ වන විට කොමිසම විසින් මෙහෙයවා ඇති සාක්ෂි අනුව රාජ්‍ය බුද්ධි සේවයේ හිටපු අධ්‍යක්ෂ නිලන්ත ජයවර්ධන හා හිටපු පොලිස්පති ලෙස පූජිත් ජයසුන්දර මහතා ලබා දී තිබෙන සාක්ෂි ඝට්ටනය නිසා දෙදෙනා අතර කඹ ඇදිල්ලක් තිබුණේද යන්න සාක්ෂි මෙහෙය වූ රජයේ අතිරේක සොලිසිටර් ජනරාල්වරිය කළ ප්‍රශ්න කිරීමට පිළිතුරු දෙමිනි. 

කෙසේ හෝ අවසානයේ ආරක්ෂක ලේකම්වරයාට සහ තමන්ට ඇගිල්ල දිගු වූ බව ජයසුන්දර මහතා කියා සිටියේය. රාජ්‍ය බුද්ධි සේවයට තිබුණේද සමාජ මාධ්‍ය හරහා ව්‍යාප්ත වෙමින් තිබුණු තොරතුරු, මෙරට පොලීසියෙන් සොයා ගෙන තිබුණු තොරතුරු ආදිය වන අතර අදාළ තොරතුර සම්බන්ධයෙන් වගකීම දැනුම් දීමෙන් පමණක් සීමා නොවන බවත්  අවසාන ක්‍රියාවලිය දක්වාම වගකීම පවතින බවයි ජයසුන්දර මහතා පැවසුවේ. 

අවසාන මාස හයක පමණ කාලය තුළ තමන්ව ආරක්ෂක මණ්ඩලයෙන්ද ඉවත්කර තිබුණු පසුබිමක තමන්ට දෙයක් දැන ගැනීමේ අවස්ථාව පවා අහිමි වී ගොස් තිබුණු ආකාරය පූජිත් ජයසුන්දර මහතා යළි සිහිපත් කළේය. 

ආරක්ෂක කවුන්සිලයට සහභාගී වූ සමයේදීද තමන්ට ලැබෙන්නේ ඉතා සීමිත කාලයක් බවත් මූලිකව රාජ්‍ය බුද්ධි සේවයේ අධ්‍යක්ෂවරයා, යුධ හමුදා බුද්ධි අධ්‍යක්ෂ,ත්‍රිවිධ හමුදාපතිවරු සහ ආරක්ෂක මාණ්ඩලික ප්‍රධානී ද සහභාගී වූ අතර ඔවුන්ගේ අදහස් දැක්වීමෙන් අනතුරුව තමන්ට අවස්ථාව හිමිවන අතර එයද ඉතා කෙටි කාලයක් බවයි ජයසුන්දර මහතා කියා සිටියේ. 

අවසානයේ කිසිම දෙයක් ජනාධිපති හෝ හමුදාපතිවරු හෝ ආරක්ෂක මාණ්ඩලික ප්‍රධානී හෝ නොදන්නා තත්ත්වයට පත් වූ බවයි හිටපු පොලිස්පතිවරයා සාක්ෂි දෙමින් පැවසුවේ. 

සෑම වාර්තාක්ම බුද්ධි වාර්තා නොවන අතර සිද්ධියක් වූ විට ඒ ගැන වාර්තා එවීම බුද්ධි තොරතුරු නොවන බව පැවසූ හිටපු පොලිස්පතිවරයා කියා සිටියේ බුද්ධි තොරතුරක් වෙන්නේ එය විශ්ලේෂණය කර විග්‍රහ කිරීමෙන් අනතුරුව බවයි. 

මෙහිදී සාක්ෂි මෙහෙය වූ රජයේ අතිරේක සොලිසිටර් ජනරාල්වරිය සක්ෂිකරුට ප්‍රශ්නයක් යොමු කළේය. 

රජයේ අතිරේක සොලිසිටර් ජනරාල්වරිය: ඔබට බුද්ධි තොරතුරු ගැන ඔය වගේ අවබෝධයක් තිබියදී තමන් සමඟ උතුරේ එකට වැඩ කළ පසුව රාජ්‍ය බුද්ධි සේවයේ අධ්‍යක්ෂ බවට පත් වූ නිලන්ත ජයවර්ධන මහතාට පැවසීමට තිබුණානේ ඔබ ඔය එවන්නේ බුද්ධි වාර්තා නොවෙයි මේ මේ විදිහට වැඩි දියුණු කරලා එවන්න කියලා?

සාක්ෂිකරු: ඔව් එහෙම කරන්න තිබුණා 

රජයේ අතිරේක සොලිසිටර් ජනරාල්වරිය: ඇයි එහෙම නොකළේ?

සාක්ෂිකරු: ඔව් මට මේක පැහැදිලි කරන්න ඕනේ. මගේ පාලනයකින් නොවෙයි රාජ්‍ය බුද්ධි සේවය ක්‍රියාත්මක වුණේ. ඇතැම් අවස්ථාවල ඔහු විදෙස් ගත වෙලා ඇවිල්ලත් දින කිහිපයකට පසු තමයි මට දැනුම් දෙන්නේ. මම දන්නේ නැහැ මොකද වෙන්නේ කියල. දැනගන්න ලැබෙන්නේ අහවලාට කියලා ගියේ කියලයි. අහවලා කියන්නේ හිටපු ජනාධිපති මෛත්‍රීපාල සිරිසේන මහතා. නමුත් මුල්  කාලයේ එහෙම තත්ත්වයක් තිබුණේ නැහැ. මා සමඟ ඉතා හොඳින් වැඩ කළා එක්සත් ජාතීන්ගේ සැසිවාරයට මා සමග එක්කන් ගියේත් ඔහුවයි. පසුව ඔහු වෙනස් වුණා. මම දන්නේ නැහැ ඒ ඇයි කියල. මං පොලිස්පති වුණාට පස්සේ පොලිසියේ හැම කොට්ඨාසයකම නිලධාරීන් හමුවෙලා ඔවුන් සමඟ කතා කළා. නමුත් මට SIS එක  සම්බන්ධ කරගන්න 4 වතාවක් උත්සහ කළා . නමුත් වැඩක් වුණේ නැහැ. මම ඒ ගැන වැඩිදුර අහන්න ගියෙත් නැහැ. 

රජයේ අතිරේක සොලිසිටර් ජනරාල්වරිය: ඔබට ලැබුණු තොරතුරු ගැන සෑහීමකට පත්වෙන්න බැරි නම් ඒවා ගැන ලිඛිතව දැනුම් දුන්නාද?

සාක්ෂිකරු: ඔව්. වැඩිදුර තොරතුරු හොයන්න ත්‍රස්ත විමර්ශන කොට්ඨාසයට  භාර දීලා තියෙනවා. පොලිස් කාර්යාංශයට දීලා තිබෙනවා. අපරාධ පරීක්ෂණ දෙපාර්තමේන්තුවට යොමු කරලා තිබෙනවා. යමක් පැහැදිලි කරගන්න ඕන තැනදී මම පැහැදිලි කර ගෙන තිබෙනවා ස්වාමීනි.  

පොලීසියත් අසමත් වෙලා තිබෙනවා

අත්අඩංගුවට ගැනීම් නොකර සහරාන් හෂීම්ට නිදහසේ හැසිරෙමින් ක්‍රියාත්මක වීමට අවස්ථාව ලැබී ඇති බව ද හිටපු පොලිස්පතිවරයා කොමිසම හමුවේ පිළිගන්නා ලදී.  

ආමී මොහිදීන් නැමැත්තා අත්අඩංගුවට නොගැනීම සම්බන්ධයෙන් වන ප්‍රශ්න කිරීමේදීයි ජයසුන්දර මහතා මේ බව කියා සිටියේ. 

ආමී මොහිදීන් සම්බන්ධයෙන් සියලු තොරතුරු ඔහු ඉන්නා ස්ථානය පවා ලබා දී තිබූ පරිසරයක අපරාධ පරීක්ෂණ දෙපාර්තමේන්තුව විසින් ඔහුව අත්අඩංගුවට නොගෙන තොරතුරුකරුවෙකු ලෙස භාවිතා කිරීම සම්බන්ධයෙන් වන ප්‍රශ්න කිරීම දීර්ඝව සිදුකෙරුණ අතර එහිදී ආමී මොහිදීන් අත්අඩංගුවට නොගැනීම වරදක් බවයි පොලිස්පතිවරයා පැවසුවේ. 

2017 මාර්තු 10 වන දින කාන්තන්කුඩි අලියාර් මංසන්ධියේ ඇතිවු ගැටුම සම්බන්ධයෙන් සහරාන් හෂීම් ඇතුළු සැකකරුවන් අත්අඩංගුවට ගන්නා ලෙස මඩකලපුව මහේස්ත්‍රාත් අධිකරණය විසින් කාත්තන්කුඩි පොලීසියට නියෝග කර තිබියදී අත්අඩංගුවට ගැනීමට වරෙන්තු නිකුත් කර තිබියදී  පොලීසිය ඔවුන් අත්අඩංගුවට ගැනීමට කටයුතු නොකළේ ඇයිද යන්න මෙහිදී අතිරේක සොලිසිටර් ජනරාල්වරිය ප්‍රශ්න කළේය. 

ඊට පිළිතුරු දෙමින් හිටපු පොලිස්පති පූජිත් ජයසුන්දර මහතා ප්‍රකාශ කළේ එම සැකකරුවන් ගැටුමෙන් පසු ඒ වනවිට එම ප්‍රදේශයෙන් පළාගොස් සිටි අතර  ඔවුන් පදිංචි ස්ථිර ලිපින හඳුනාගෙන තිබුණත් ඔවුන් එම ස්ථානවල නොසිටීමත් නොයෙක් නොයෙක් පුද්ගලයින් එම සැකකරුවන් සඟවාගෙන සිටීමත් නිසා  අත්අඩංගුවට ගැනීමට නොහැකි වී ඇති බවයි. 

අතිරේක සොලිසිටර් ජනරාල්වරිය:ඔවුන් යන එන තැන් රාජ්‍ය බුද්ධි සේවය ඔබට හෝ අපරාධ පරීක්ෂණ දෙපාර්තමේන්තුවට දැනුම් දුන්නා නේද?

සාක්ෂිකරු: සොයා ගැනීම පොලිස්පතිට විතරක් කරන්න බැහැ. අත්අඩංගුවට ගැනීම නිශ්චිත සිද්ධියක් සම්බන්ධයෙන් නම් එම පරීක්ෂණ වගකීම සම්පූර්ණයෙන්ම  අපරාධ පරීක්ෂණ දෙපාර්තමේන්තුවට දෙනවා. එහෙම වුණා කියල ඒ ගැන ප්‍රාදේශීය පොලිසියේ අවධානය අඩු විය යුතු නැහැ. පොලිස් ආඥා පනතේම තිබෙනවා සෑම නිලධාරියෙක්ම අදාළ කටයුතු සොයා බලා රාජකාරිය ඉටුකළ යුතු බවට.

අතිරේක සොලිසිටර් ජනරාල්වරිය:රාජ්‍ය බුද්ධි සේවය විසින් සැකකරුවන් සිටි ස්ථාන පවා අපරාධ පරීක්ෂණ දෙපාර්තමේන්තුවට පෙන්වලා තිබෙනවා. ඒ වගේ තත්ත්වයකත් අත්අඩංගුවට ගැනීමක් වෙන්නේ නැත්නම් ප්‍රශ්නය තියෙන්නේ කොතැනද හිටපු පොලිස්පතිතුමනි?

සාක්ෂිකරු: සැකකරුවන් හිටපු තැන් හරියටම හොයා ගෙන ගිහින් දැනුවත්ව පරීක්ෂණ කරන කණ්ඩායම් ගිහින් අත්අඩංගුවට ගන්නේ නැත්නම් එය බරපතල තත්ත්වයක්. එය වුණේ නැත්නම් එම පරීක්ෂණ කණ්ඩායම භාර නිලධාරියෙක් ඉන්නවා. ඒ නිලධාරී මට්ටමෙන් කතා කරගෙන පියවරක් ගන්න පුළුවන්. එහෙම හැකියාවක් නැති වුණොත් ජ්‍යෙෂ්ඨ නිලධාරීන් මට්ටමෙන් නැත්නම් අධ්‍යක්ෂ මට්ටමෙන් පියවරක් ගන්න බැරි වුණොත් අහවල් නිලධාරියා වැඩේ කළේ නැහැ. අහවල් අයට දැනුම් දුන්නා නමුත් වුණේ නැත්නම් පෞද්ගලිකව මට දැනුම් දෙන්න පුළුවන්. 

කෙසේවෙතත් අත්අඩංගුවට ගැනීම සඳහා වරෙන්තු නිකුත් කර තිබුණු ආමී මොහිදීන් නැමැත්තා සම්බන්ධයෙන් අදාළ අපරාධ පරීක්ෂණ දෙපාර්තමේන්තුවේ පරීක්ෂණ නිලධාරීන්ට පෙන්වා දී තිබූ බවට මේ වන විට කොමිසම හමුවේ සාක්ෂි මෙහෙයවා ඇති බවත් පසුව ඔහු තොරතුරුකරුවෙකු ලෙස යොදා ගෙන ඇති බවටත් සාක්ෂි සටහන්ව තිබෙනවා. ඒ අනුව ඔබ මේ ගැන කුමක් සිතන්නේ ද යන්න කොමිසම  හිටපු පොලිස්පතිවරයාගෙන විමසුවේය. 

එහිදී හිටපු පොලිස්පතිවරයා පැවසුවේ එය ව්‍යාකූල තත්ත්වයක් බවයි. ”තොරතුරුකරුවෙක් නම් පෞද්ගලික මට්ටමෙන් සම්බන්ධතාවයක් තියෙන්න ඕනේ.  ඒ අවස්ථාවේ වරෙන්තුකරුව අත්අඩංගුවට ගත යුතුව තිබුණා. අත්අඩංගුවට ගැනීමෙන් පසුව ඔහුට නීතිය ප්‍රකාරව සහනයක් හිමිවෙලා නම් තොරතුරුකරුවෙක් ලෙස තබා ගන්න පුළුවන්. නමුත් CID එක ආමී  මොහිදින් නැමැත්තාව තොරතුරුකරුවෙකු ලෙස භාවිතා කළ බවට වාර්තා වෙන්නේ සැකකරු අත්අඩංගුවට නොගත් තත්ත්වයක.” බව පූජිත් ජයසුන්දර මහතා පිළිතුර එලෙස පැහැදිලි කරන ලදී. 

අතිරේක සොලිසිටර් ජනරාල්වරිය: ආමී මොහිදීන් නමැත්තා හමුවෙලා ඔහුව තොරතුරුකරුවෙකු ලෙස තබා ගත්තා නම් එය ඔබට දැනුම් දෙන්න අවශ්‍යයි නේද?

සාක්ෂිකරු: දැනුම් දෙන්න ඕනේ. 

අතිරේක සොලිසිටර් ජනරාල්වරිය: කාටද එම වගකීම තියෙන්නේ? රාජ්‍ය බුධි සේවයටද? අපරාධ පරීක්ෂණ දෙපාර්තමේන්තුවටද?

සාක්ෂිකරු: දෙපාර්ශවයටම වගකීමක් තිබෙනවා. 

අතිරේක සොලිසිටර් ජනරාල්වරිය:එදින ආමී මොහිදීන්ව අත්අඩංගුවට ගත්තා නම් ඔහු හරහා සහරාන් හෂිම්වත් සොයා ගෙන අත්අඩංගුවට ගන්න තිබුණා කියල දැන් ඔබට වැටහෙන්නේ නැද්ද?

සාක්ෂිකරු: ඔව් මට එහෙම වැටහෙනවා ස්වාමීනි. ආමී මොහිදීන් අත්අඩංගුවට ගත්තා නම් බොහෝ තොරතුරු දැනගන්න තිබුණා. එහෙම වුණානම් අනතුර වළක්වා ගන්න තිබුණා. 

අතිරේක සොලිසිටර් ජනරාල්වරිය:එහෙම නොවෙන්න වගකීම කාගේද?

සාක්ෂිකරු: CID යට වගකීමක් තිබෙනවා. ඔවුන් සෘජුවම වැරදියි. පොලිස් නිලධාරියෙක් ලෙස අවසන් වන තෙක් ක්‍රියාත්මක වෙන්න අවශ්‍යයි. SIS එකටත් අවසාන වනතුරු වගකීමෙන් ඉවත්වෙන්න බැහැ. 

අතිරේක සොලිසිටර් ජනරාල්වරිය:ඒ ගැන ඔබව දැනුවත් කළා නම්?

සාක්ෂිකරු: පරීක්ෂණයක් කරන්න වෙනවා අත්අඩංගුවට නොගන්න හේතුව හොයන්න.

මෙහිදී කොමිසම විසින් හිටපු පොලිස්පතිවරයාගෙන් විමසුවේ සහරාන් හෂිම්ට නිදැල්ලේ හැසිරීමට පොලිස් නිලධාරීන්ගේ නොසැලකිලිමත් ක්‍රියාකලාපය හේතුවක් වී ඇති අබව දැන් වැටහෙන්නේද යන්නයි. 

සාක්ෂිකරු: ඔව් මට දැන් එය වැටහෙනවා ස්වාමීනි. නොසැලකිල්ල, අත්හැරීම වගේ දේවල් මෙතැනදී බලපාලා තිබෙනවා. 

මෙහිදී වැඩිදුරටත් කොමිසම සඳහන් කළේ වරෙන්තු නිකුත් කර තිබූ සැකකරුවෙක් අත්අඩංගුවට නොගැනීමම බරපතල වරදක්  බවයි. 

රාජ්‍ය බුද්ධි සේවය  විසින් වරින් වර තොරතුරු දී තිබියදීත් එය බීරි අලින්ට වීණා වයනවා වගේ තත්ත්වයක් තිබී ඇති අතර ඒ වෙනුවෙන් ක්‍රියාත්මක වීමක් සිදුව නැහැ නේද යන්නෙන් අතිරේක සොලිසිටර් ජනරාල්වරිය හිටපු පොලිස්පතිවරයාගෙන් ප්‍රශ්න කළ අතර එය හිටපු පොලිස්පතිවරයා විසින් ප්‍රතික්ෂේප කරන ලදී. 

මට ආපු තොරතුර බැහැර කළේ නැහැ – වැදගත් කොට සලකලා තමයි නිලධරීන් 04 දෙනෙකුට යොමු කළේ 

අප්‍රේල් 09 වැනිදා රාජ්‍ය බුද්ධි සේවයෙන් හා ජාතික බුද්ධි ප්‍රධානී වෙතින් ප්‍රහාරයක් සම්බන්ධ පූර්ව දැනුම් දීමේ තොරතුර ලද විට තමන් කුමක් කළේද යන්න පිළිබඳව අතිරේක සොලිසිටර් ජනරාල්වරිය පූජිත් ජයසුන්දර මහතාගෙන් ප්‍රශ්න කළේය. 

සාක්ෂිකරු:ස්වාමීනි මම ඒක නිශ්චිත වැදගත් තොරතුරක් ලෙස සැලකුවා. මම ඒ ලිපියට FNA ලෙස යොදා  මගේ යටතේ සිටි ජ්‍යෙෂ්ඨ නියෝජ්‍ය පොලිස්පතිවරු 04 දෙනෙක්ට යැව්වා. මම එය නොසලකා හැර නැහැ ස්වාමීනි.    

මෙහිදී කොමිසම විසින් ප්‍රශ්න කළේ “ඇයි ඔබ FNA කියලා දැම්මේ. ඔබ පොලිස්පතිවරයා ලෙස ඊට වඩා වැඩියමක් සදහන් කළ යුතුව තිබුණා නේද?  ඇයි කළයුතු දේ පිළිබඳ උපදෙස් දීමක් සිදු නොකළේ? යනුවෙනි. 

ඊට පිළිතුරු දුන් ජයසුන්දර මහතා පැවසුවේ, මේ තොරතුර ලද සැණින් මම කටයුතු කර තිබෙනවා. පමා වෙලා නැහැ. ස්වාමීනි. FNA කියන්නේ For Necessary Action කියන එක. නමුත් සමහර අය මේක For No Action හැටියට අපහාසාත්මකවත් අරන් තිබ්බා. මෙම තොරතුර නිශ්චිත තොරතුරක් විදේශ බුද්ධි අංශයකින් එවපු. නමුත්  ඊට අදාළව කිසිම තොරතුරක් අපේ රාජ්‍ය බුද්ධි සේවයෙන් සොයාගෙන තිබුණේ නැහැ. ඔවුන් මේක වගකීම් සහගත විදිහට නෙමෙයි එවලා තිබ්බේ.  ඉහත සඳහන් තොරතුර පිළිබඳව තවදුරටත් පරීක්ෂණ කරනවා, ලෙස තමයි ඔවුන් යොමුකරලා තිබුණේ. ඒ කියන්නේ තොරතුරේ  අවසානයක් නැහැ කියන එක. 

ආරක්ෂාව ලිහිල් වෙලා සහජීවනයට තැන දීලා තිබුණේ 

”ඒ වෙද්දී DIG ලා දන්නවා රටේ තිබුණ තත්ත්වය. ආරක්ෂක කටයුතු ලිහිල් වෙලා සහජීවනයට තැන දීල තිබුණේ. ඒ දේශපාලන පීඩනය ගැනත් මගේ ඉහළ නිලධාරීන් යම් මට්ටමකට හෝ දැනගෙන ඉන්න ඇති. ඒ පීඩනයත් දරාගෙන තමයි මම වැඩ කළේ. 

රාජ්‍ය බුද්ධි සේවයට තියෙන පහසුකම් හා වරප්‍රසාද එක්ක බලද්දි ඔවුන්ට නිරතවෙන්න තියෙන එකම වෘත්තීමය ක්ෂේත්‍රය තමයි බුද්ධි තොරතුරු කියන්නේ. එහෙම වටපිටාවක් තුළත් ඔවුන් මේකට කිසිවක් එකතු කර තිබුණේ  නැහැ. විදෙස් බුද්ධි තොරතුර විතරයි එවා තිබුණේ.  නමුත් එය වැදගත් තොරතුරක්. මේක මට යොමුකරලා තිබුණේ Top Secret Eyes Only කියල.   Eyes Only කියන්නේ මගේ අවධානයට විතරයි කියන එක. නමුත් තොරතුරේ බරපතලකම නිසා මගේ අවධානයට විතරක් යොමුවෙලා මදි නිසා තමයි ක්‍රියාත්මක විය හැකි මගේ යටතේ සිටි ජ්‍යෙෂ්ඨතම නිලධාරින් 04 දෙනාට යැව්වේ. මෙවැනි දෙයකට ක්‍රියාත්මක විය යුතු ආකාරය ඔවුන් දන්නවා. මම බලාපොරොත්තු වුණේ රහසිගතව මෙය කරන්න. නැත්නම් මහ කලබැගෑනියක් වෙනවා කියලා මම දන්නවා. මම වැඩ කළේ පොලීසියට එන චෝදනාව මඟහරවා ගන්න.” යනුවෙනි. 

මේ අතරම ඒ මොහොත වන විට ජනාධිපතිවරයා තමන් සමඟ අමනාපයෙන් සිටි අතර ඒ වන විටත් ප්‍රශ්න රැසකට මුහුණ දී සිටි නමුත් ”තමන්  රාජකාරිය පහර හරියේ නැහැ.රාජ්‍ය බුද්ධි සේවයේ කිසිවෙකු හෝ ඉස්ලාම් අන්තවාදය ත්‍රස්තවාදයක් බවට පත්ව ඇති බවට මම කිසිවෙක් තොරතුරු දීලා තිබුණේ නැහැ. අන්තර්ජාලය මඟින් සිය අනුගාමිකයින් අභිප්‍රේරණය කරමින් සිටින බවත් තවදුරටත් ඔවුන් ඒ සම්බන්ධයෙන් තවදුරටත් විමර්ශන සිදුකරන බවත්” තමන්ට දැනුම් දී තිබුණු බව ද ජයසුන්දර මහතා කියා සිටියේය. 

සහරාන්,රිල්වාන් සහ මිල්හාන් නමැත්තන් නැගෙනහිර පදිංචිකරුවන්ව බව දැන සිටියදී එම තොරතුර සම්බන්ධෙයන් එවකට නැගෙනහිර පළාතේ ජ්‍යෙෂ්ඨ නියෝජ්‍ය පොලිස්පතිවරයා දැනුවත් නොකළේ ඇයිද යන්න අතිරේක සොලිසිටර් ජනරාල්වරිය පූජිත් ජයසුන්දර මහතාගෙන් විමසා සිටියේය. 

සාක්ෂිකරු: ඔව් මම නැගෙනහිර ජ්‍යෙෂ්ඨ නියෝජ්‍ය පොලිස්පතිට යැව්වේ නැහැ. හේතුව තමයි ස්වාමීනි සියදිවි හානිකර ගැනීමේ කාරණය හා සම්බන්ධ වෙනත් කටයුතු සම්බන්ධයෙන් කරුණු කාරණා සඳහන් කළා මිස එක තැනකවත් පිටින් ලද තොරතුර හැර SIS  එකෙන් වෙනත් නිශ්චිත තොරතුරක් දන්වලා නැහැ. ඔවුන් එතෙක් කර තිබෙන්නේ පන්ති පවත්වාගෙන ගිය එක. අපේ බුද්ධි සේවය වෙන මොනවත් හොයාගෙන තිබුණේ නැහැ. ඒ වෙද්දී විස්තර තිබුණ වරෙන්තු නිකුත් කර තිබුණු අය අත්අඩංගුවට ගත යුතුව තිබුණා. නමුත් SIS එකේ මේ සිය දිවි නසා ගැනීමට අදාළව විදෙස් තොරතුර හැර වෙනත් තොරතුරු තිබිලා නැහැ. ගොඩක් සිදුවීම් දක්වලා තිබුණේ හුදෙකලා සිදුවීම් ලෙස. බුද්ධි අංශයකින් බලාපොරොත්තු වෙන්නේ තනි තනි සිදුවීම් නෙවෙයි. IS  ගැන, සහරාන්ලාගේ සම්බන්ධය ගැන විශ්ලේෂණයක් එක්ක විග්‍රහයක් තිබෙන්න ඕනේ. මා වෙත යොමු කර තිබූ වාර්තාවේ එහෙම නැහැ. ඒ වෙද්දී දේශනා පැවැත්වීම බරපතල තත්ත්වයක් නෙවෙයි. තව තව අය දේශනා පැවැත්වුවා. ඒ කාලේ තත්ත්වය එහෙමයි තිබුණේ. නැගෙනහිර පළාත ගැන කතා වුණෙත් මඩකලපුව සියොන් දේවස්ථානයට ප්‍රහාරයක් එල්ල කළ නිසයි. 

මේ අතර පසුගිය (26) වැනි දින කොමිසම හමුවේ හමුවේ සාක්ෂි දෙමින් පොලිස් විශේෂ කාර්ය බලකායේ හිටපු අණදෙන නිලධාරී එම්. ආර්.ලතීෆ් මහතා පැවසුවේ තමන් හා හිටපු පොලිස්පතිවරයා අතර හොද සම්බන්ධයක් නොපැවතී බවත් තමන්ට නිසි ලෙස මෙම විදෙස් බුද්ධි තොරතුර ගැන දැනුවත් කිරීමක් නොලැබුණු බවත්ය. 

එහෙත් ඊයේ දින කොමිසමේදී සාක්ෂි දෙමින් පූජිත් ජයසුන්දර මහතා පැවසුවේ එය එසේ නොවන අතර තමන් තොරතුර පිළිබඳව ලතීෆ් මහතාට ද දැනුම් දී තිබුණු බවත් විශේෂ කාර්ය බලකායේ අණදෙන නිලධාරී තනතුර මෙන්ම සංවිධානාත්මක අපරාධ, මත්ද්‍රව්‍ය යන කෂේත්‍රවල වගකීමද ඔහු සතුව පැවති බවත් ඔහු සතුව දිවයින පුරා කණ්ඩායම් සිටි බවත්ය. 

”ලතීෆ් මහතා කියනව නම් ඔහුට දැනුම් දුන්නේ නැහැ කියල එය ඔහුගේ උත්තරය. නමුත් මම ඔහුට කතා අර මෙය දැනුවත් කළා. ලතීෆ් අවශ්‍ය විධි විධාන යොදයි කියල මට විශ්වාසයක් තිබුණා.”

ඒ වෙද්දී වරුණ ජයසුන්දර ත්‍රස්ත විමර්ශාන් කොට්ඨාසයේ ප්‍රධානියා ලෙස සිටි හෙයින් ඔහුට වෙනම මේ ගැන කිව්වා මේ අදාළ කරුණු ගැන සලකා බලන්න කියලා. ලතීෆ්, නන්දන මුණසිංහ,ප්‍රියලාල් දසනායක යන තුන්දෙනාට කිව්වා ලිපි ගොණුව ලැබෙයි අදාළ කටයුතු කරන්න කියල. එහෙම තමයි මම දැනුම් දුන්නේ. යනුවෙන් පූජිත් ජයසුන්දර මහතා වැඩිදුරටත් සඳහන් කරන ලදී. 

The post පාස්කු ප්‍රහාරයට හේතුව ජනපති මෛත්‍රීගේ දියාරු මැදිහත්වීම සහ පූජිත් – නිලන්ත දෙදෙනාගේ කඹ ඇදිල්ලද? appeared first on ColomboXnews.

Source From Colomboxnews
Author: Kamal Dhammika
#SriLanka #News #lka