පාස්කු ප්‍රහාරයට පෙර කිසිදු වාර්තාවක් ආරක්ෂක ලේකම්ට දුන්නේ නැහැ – රාජ්‍ය බුද්ධි සේවයේ හිටපු අධ්‍යක්ෂ පිළිගනී

පාස්කු ප්‍රහාරයට පෙර අප්‍රේල් 04 වැනිදා සිට 20 වැනිදා දක්වා කාලය තුළ සහරාන් හෂීම් හා ජාතික තවුහිද් ජමාත් සංවිධානයේ ක්‍රියාකාරකම් මඟින් ප්‍රහාරයක් එල්ල වන බවට විදෙස් බුද්ධි සේවාවක් මඟින් තොරතුරු ලැබී තිබියදීත් ඒ සම්බන්ධයෙන් එවකට සිටි ආරක්ෂක ලේකම් හේමසිරි ප්‍රනාන්දු මහතා වෙත කිසිදු වාර්තාවක් යොමු කර නැති බව ඊයේ (26) පාස්කු ප්‍රහාරය සම්බන්ධයෙන් විමර්ශනය කරන ජනාධිපති කොමිසම හමුවේ සාක්ෂි ලබා දෙමින් හිටපු රාජ්‍ය බුද්ධි සේවයේ අධ්‍යක්ෂ නිලන්ත ජයවර්ධන මහතා පිළිගත්තේය. 

හිටපු ආරක්ෂක ලේකම් හේමසිරි ප්‍රනාන්දු මහතා වෙනුවෙන් පෙනී සිටින ජනාධිපති නීතිඥ ඩිල්ශාන් ජයසූරිය මහතාගේ හරස් ප්‍රශ්න කිරීම්වලට පිළිතුරු දෙමිනුයි නිලන්ත ජයවර්ධන මහතා එය පිළිගත්තේ. 

කෙසේවෙතත් 2019 අප්‍රේල් 04 වැනිදා විදෙස් බුද්ධි සේවාවක් ඔස්සේ ලද තොරතුර සම්බන්ධයෙන් ජාතික බුද්ධි ප්‍රධානී වෙත වාර්තාවක් යොමු කර වැඩිදුර උපදෙස් ඉල්ලා ඇති බවත් අප්‍රේල් 07 වැනිදා ඒ බව ආරක්ෂක ලේකම්වරයා වෙත දුරකථනයෙන් දැනුම් දුන් බවත් එහිදී ජයවර්ධන මහතා සඳහන් කළේය.

ජනාධිපති නීතිඥ ඩිල්ෂාන් ජයසූරිය මහතා තවදුරටත් ප්‍රශ්න කරමින් අවධාරණය කළේ අප්‍රේල් 07 වැනිදා රාජ්‍ය බුද්ධි සේවයේ අධ්‍යක්ෂ විසින් ආරක්ෂක ලේකම් හේමසිරි ප්‍රනාන්දු මහතා වෙත එවැනි දුරකථන ඇමතුමක් ලබා ගෙන නැති බවයි. 

එහෙත් එය දිගින් දිගටම ප්‍රතික්ෂේප කළ හිටපු රාජ්‍ය බුද්ධි අධ්‍යක්ෂවරයා සඳහන් කළේ තමන් වැඩිදුර උපදෙස් පතා ජාතික බුද්ධි ප්‍රධානියා වෙත වාර්තාවක් යොමුකළ බවත් ඒ බව 07 වැනිදා දුරකථන ඇමතුමක් ගෙන ආරක්ෂක ලේකම්වරයාට පැවසූ බවත් පෙරළා ආරක්ෂක ලේකම්වරයාද ”හරි නිලන්ත වැඩේ කරගෙන යන්න” යනුවෙන් පැවසූ බවයි. 

නමුත් ජනාධිපති නීතිඥවරයා විසින් එය ප්‍රතික්ෂේප කරන ලදී. ඔහු සක්ෂිකරුගෙන් ප්‍රශ්න කරමින් යෝජනා කළේ එවැනි දුරකථන ඇමතුමක් ආරක්ෂක ලේකම්වරයාට ගෙන නොමැති බවයි. 

ප්‍රහාරයට පෙර එවන ලද වාර්තාවල සහරාන් හෝ NTJ සිදුකළ හැකි මරාගෙන මැරෙන ප්‍රහාරයක් ගැන තොරතුරු නැහැ 

හේමසිරි ප්‍රනාන්දු මහතා ආරක්ෂක ලේකම් ධූරය දැරූ 2018 නොවැම්බර් 02 වැනිදා සිට 2019 අප්‍රේල් 23 වැනිදා දක්වා කාලය තුළ රාජ්‍ය බුද්ධි සේවයේ අධ්‍යක්ෂ විසින් ඒවා ඇත්තේ වාර්තා 11  ක් පමණක් වන අතර පාස්කු ප්‍රහාරයට පෙර ඉන් වාර්තා 08 ලැබී ඇති නමුත් ( 2018නොවැම්බර් මස වාර්තා 05,2018දෙසැම්බර් මස වාර්තා 02, 2019 මාර්තු මස වාර්තා 01, 2019 ජනවාරි හා පෙබරවාරි යන මාසවල SIS වෙතින් ආරක්ෂක ලේකම්වරයාට කිසිදු වාර්තාවක් යොමු කර නැත) එම කිසිදු වර්තාවක සහරාන් හෂීම් හා ජාතික තවුහිද් ජමාත් සංවිධානයේ ක්‍රියාකාරකම් හරහා ශ්‍රී ලංකාව තුළ මරාගෙන මැරෙන ප්‍රහාරයක් එල්ල විය හැකි බවට කිසිදු තොරතුරක් සඳහන්ව නොතිබුණු බවද ජනධිපති නීතිඥවරයාගේ හරස් ප්‍රශ්නවලදී  ඊයේ කොමිසමේදී අනාවරණ විය. 

ඒ වන විට එවැනි තොරතුරක් වාර්තා වී නොතිබුණු බවයි රාජ්‍ය බුද්ධි සේවයේ  හිටපු අධ්‍යක්ෂවරයා කොමිසම හමුවේ සාක්ෂි දෙමින් පැවසුවේ.

කෙසේවෙතත් ඒ වන විට එවැනි මාරාගෙන මැරෙන ප්‍රහාරයක් සම්බන්ධයෙන් තොරතුරු ලැබී තිබුණේ නම් උක්ත වාර්තාවලට එය ඇතුල් කරනවා නේද යනුවෙන්  ජනාධිපති නීතිඥවරයා අසන ලද ප්‍රශ්නයට පිළිතුරු දෙමින් ජයවර්ධන මහතා පැවසුවේ ඔව් ඇතුල් කරනවා යනුවෙනි.

හේමසිරි ප්‍රනාන්දු මහතා ආරක්ෂක ලේකම් ධූරය දරන සමය තුළ මරාගෙන මැරෙන ප්‍රහාරයක් සම්බන්ධයෙන් රාජ්‍ය බුද්ධි සේවයට තොරතුරු ලැබී  නැහැ 

හේමසිරි ප්‍රනාන්දු මහතා ආරක්ෂක ලේකම් ධූරය දරන සමය තුළ මරාගෙන මැරෙන ප්‍රහාරයක් සම්බන්ධයෙන් රාජ්‍ය බුද්ධි සේවයට තොරතුරු ලැබී තිබුණේ නැති බව පිළිගන්නවාද? නැද්ද? යනුවෙන් ජනාධිපති නීතිඥ ඩිල්ශාන් ජයසූරිය මහතා කරන ලද ප්‍රශ්න කිරීමේදී නිලන්ත ජයවර්ධන මහතා පැවසුවේ එවැනි නිශ්චිත තොරතුරක් ලැබී නොතිබුණු බවයි.

මාවනැල්ල බුදු පිළිම කැඩීමේ සිද්ධියට සහරාන් හෂිම්ගේ සම්බන්ධයක් පවතින බවට ආරක්ෂක කවුන්සිලයේදී දැනුවත් කළ අතර බවත් ඔහු සාක්ෂි දෙමින් කියා සිටියේය. 

හෙට ගහනවා යනුවෙන් තොරතුරු නැතත් එවැනි තැනකට තත්ත්වය වර්ධනය වෙමින් පැවති බව තමන් ආරක්ෂක ලේකම්වරයා දැනුවත් කර තිබෙන බවත් පවසන ලදී.

කෙසේවෙතත් තමන් හා ආරක්ෂක ලේකම්වරයා අතර ඉතා සුහද මට්ටමේ රාජකාරී සම්බන්ධයක් පැවති හෙයින්  ආරක්ෂක ලේකම්වරයා තමන්ගෙන්  නිතර තොරතුරු විමසන බවත් තමන්ද ඔහු සමඟ නිතර කතා කරන බව නිලන්ත ජයවර්ධන මහතා සාක්ෂි ලබා දෙමින් කියා සිටියේය.

එවැනි සුහද රාජකාරී සම්බන්ධයක් තිබියදීත් 04 වැනිදා විදෙස් බුද්ධි සේවාවකින් ලද තොරතුර සම්බන්ධයෙන් ආරක්ෂක ලේකම්වරයා දැනුවත් කිරීමට කටයුතු නොකළේ මන්ද යන්නෙන්  ජනාධිපති නීතිඥවරයා කළ ප්‍රශ්න කිරීමට සාක්ෂි ලබාදෙමින් ජයවර්ධන මහතා පැවසුවේ ඒ මොහොතේ ආරක්ෂක ලේකම්වරයාට දැනුම් දීමට අවශ්‍යතාවක් නොතිබුණු අතර වැඩිදුර උපදෙස් සඳහා ජාතික බුද්ධි ප්‍රධානියාට යොමු කළ බවයි. 

එහෙත් ආරක්ෂක ලේකම් තමන්ගේ සෘජු අධීක්ෂණ නිලධාරියා බවට කොමිසම හමුවේ සාක්ෂි ලබා දී තිබෙන පසුබිමක අප්‍රේල් 04 වැනිදා වට්ස්ඇප් පණිවිඩයක් මඟින් විදෙස් බුද්ධි සේවාවකින් ලද තොරතුර අප්‍රේල් 05 වැනිදා ලිඛිතව ලැබී තිබුන අතර  ඒ ගැන කිසිදු ලිඛිත වාර්තාවක් ආරක්ෂක ලේකම්වෙත යව නැති බව පිළිගන්නවාද යනුවෙන් ජනධිපති නීතිඥවරයා හරස් ප්‍රශ්නයක් යොමු කරන ලදී.

ඊට පිළිතුරු දුන් නිලන්ත ජයවර්ධන මහතා කියා සිටියේ 04,05,06 යන දිනයන්හි තමන් ඒ සම්බන්ධයෙන් තොරතුරු සොයමින් සිටි බවයි. 

එවැනි වැදගත්,භයානක තොරතුරක් ලද විට වාර්තාවක් නොයවා දැනුම් දුන්නේ කෙසේද යන්න පෙරළා ජයවර්ධන මහතාගෙන් ප්‍රශ්න කළ අතර ඊට ඔහු පිළිතුරු දුන්නේ දුරකථනයෙන් බවයි. 

එහෙත් එවැනි ඇමතුමක් අප්‍රේල් 07 වැනිදා රාජ්‍ය බුද්ධි සේවයේ අධ්‍යක්ෂවරයා ලබා ගෙන නොමැති බවයි ජනාධිපති නීතිඥවරයා දිගින් දිගටම කොමිසමට යෝජනා කළේ. 

ප්‍රහාරයක්  එල්ල වෙන බවට තොරතුරු ලැබී තිබියදී ආරක්ෂක ලේකම්ට එය වාර්තා නොකිරීම මඟින් රාජ්‍ය බුද්ධි සේවයේ හිටපු අධ්‍යක්ෂ රාජකාරීමය වගකීම පහර හැර ඇති බවට ජනාධිපති නීතිඥවරයා කොමිසම හමුවේ යෝජනා කළ අතර නිලන්ත ජයවර්ධන මහතා විසින් එය බැහැර කරන ලදී. 

අප්‍රේල් 20 තෙක් නිශ්චිත තොරතුරක් තිබුණේ නැහැ 

කෙසේවෙතත් අප්‍රේල් 20 වැනිදා වනතෙක් ප්‍රහාරයක් එල්ල වෙන බවට නිශ්චිත තොරතුරු රාජ්‍ය බුද්ධි සේවය සතුවනොතිබුණ බවද නිලන්ත ජයවර්ධන මහතා කොමිසම හමුවේ සාක්ෂි දෙමින් පැවසුවේය. 

ඒ අනුව අප්‍රේල් 04 වැනිදා සිට 20 වැනිදා දක්වා කාලය තුළ ආරක්ෂක ලේකම්වරයා වෙත සහරාන් හෝ ජාතික තවුහිද් ජමාත් සංවිධානයේ ක්‍රියාකාරම් මගින් ප්රාහ්රයක් එල්ල වෙන බවට කිසිදු වාර්තාවක් යොමු නොකළ බව හිටපු රාජ්‍ය බුද්ධි සේවයේ අධ්‍යක්ෂවරයා කොමිසමේදී පිළිගන්නා ලදී.

රහය බුද්ධි සේවයේ හිටපු අධ්‍යක්ෂ නිලන්ත ජයවර්ධන මහතා 19 වැනි දිනටත් ඊයේ (26)  කොමිසම හමුවේ සාක්ෂි ලබා දුන් අතර අද (27) දිනයේදීත් සාක්ෂි ලබා දීමට නියමිතයි. 

(LNW)

The post පාස්කු ප්‍රහාරයට පෙර කිසිදු වාර්තාවක් ආරක්ෂක ලේකම්ට දුන්නේ නැහැ – රාජ්‍ය බුද්ධි සේවයේ හිටපු අධ්‍යක්ෂ පිළිගනී appeared first on ColomboXnews.