කුරුණෑගල, බුවනෙකබාහු රජුගේ රාජ සභාවට අයත් ගොඩනැගිල්ලක් බවට සැලකෙන ගොඩනැගිල්ල කඩා බිඳදැමීමට පෙර ඒ සම්බන්ධයෙන් පුරාවිද්‍යා දෙපාර්තමේන්තුව හෝ වෙනත් කිසිදු රජයේ පාර්ශ්වයක් දැනුවත් කර නොමැති බව පුරාවිද්‍යා අධ්‍යක්ෂ ජෙනරාල්, මහාචාර්ය සෙනරත් දිසානායක මහතා පවසනවා.
අද (21) කොළඹදී පැවති මාධ්‍ය හමුවක් අමතමින් ඔහු මේ බව සඳහන් කළේය.
පුරාවිද්‍යා ස්ථානයක් හෝ ඓතිහාසික ස්ථානයක් හෝ තුළ සිදුවන කටයුතු සම්බන්ධයෙන් පුරාවිද්‍යා දෙපාර්තමේන්තුව ඇතුළු වගකිව යුතු ස්ථාන දැනුවත් කිරීම අනිවාර්ය බව පෙන්වා දෙන සෙනරත් දිසානායක මහතා පවසන්නේ එසේ දැනුවත් නොකර කිසිවක් සිදුකළ නොහැකි බවයි. මෙම සිද්ධිය පිටුපස සංකීර්ණ සිද්ධිදාමයක් ඇති බව පෙන්වා දෙන පුරාවිද්‍යා අධ්‍යක්ෂ ජෙනරාල්වරයා පවසන්නේ මෙම සිදුවීමේ යටි අරමුණු හා සැඟවුණු අරමුණු පවතින බවයි. මේ මොහොතේ ඒ සම්බන්ධයෙන් පැහැදිලි කිරීමේ හැකියාවක් නොමැති බවයි ඔහු වැඩිදුරටත් පවසන්නේ.
විශේෂයෙන්ම රාත්‍රී කාලයේදී මෙම ගොඩනැගිල්ල ඩෝසර් කිරීම සම්බන්ධයෙන් බරපතල සැකයක් පවතින බවයි ඔහු පෙන්වා දෙන්නේ. මෙම සිදුවීමට පෙර පසුගිය 06 වැනිදාද මාර්ග සංවර්ධන අධිකාරියේ සේවකයන් විසින් මෙම ගොඩනැගිල්ලේ කාණුවක කොටසකට හානි සිදුකර තිබෙන බවද ඔහු පවසනවා.
මීට පෙර මෙවැනි ස්ථානවලට සිදු වූ හානි සම්බන්ධයෙන් පොලීසිය වහාම පියවර ගෙන වගකිව යුතු පුද්ගලයන් අත්අඩංගුවට ගත් නමුත් මෙම සිදුවීමට අදාලව පොලීසිය අවශ්‍ය පියවර නොගැනීම ගැටලු සහගත බව ද සෙනරත් දිසානායක මහතා පෙන්වා දෙනවා.
The post ඩෝසර් කරන්න කලින් අපිට කිව්වෙ නෑ. මේ දක්වා පොලීසිය කවුරුවත් අත්අඩංගුවට අරගෙනත් නෑ – පුරාවිද්‍යා අධ්‍යක්ෂ appeared first on ColomboXnews.
Source From Colomboxnews
Author: Kamal Dhammika
#SriLanka #News #lka