ඩයනාගේ පුරවැසිභාවය ප්‍රශ්ණ කරමින් සිවිල් පුරවැසියෙකු අධිකරණයට

ඩයනා ගමගේ මන්ත්‍රීවරියට එරෙහිව පළමු, නීතිමය පියවර ගැනීමට සමගි ජන බලවේගය නීතිමය කටයුතු භාර පිරිස් මේ වන විට සූදානමින් සිටී. 20 වැනි ආණ්ඩුක්‍රම ව්‍යවස්ථා සංශෝධන පනත් කෙටුම්පතට එරෙහිව ඡන්දය දීමට සමගි ජන බලවේගය ගත් තීරණයට පටහැනිව යමින් ඩයනා ගමගේ මන්ත්‍රීවරිය ඇතුළු සමගි ජන බලවේගය තවත් මන්ත්‍රීවරුන් 07 දෙනෙකු ආණ්ඩුවත් සමඟ ඊට පක්ෂව ඡන්දය පාවිච්චි කරන ලදී .

ඩයනා ගමගේ මන්ත්‍රීවරියට එරෙහිව ගන්නා ලබන පළමු නීතිමය පියවරේ පදනම ලෙස ඇගේ පුරවැසිභාවය පිළිබඳව කරුණක් මුල් වී ඇති බවද ආරංචි මාර්ග සඳහන් කරයි.

ඒ සම්බන්ධයෙන් වූ පැමිණිල්ල ගොනු කිරීම සමගි ජන බලවේගයේ නොවන ස්වාධීන ඡන්දදායකයකු හරහා සිදු කිරීමට නියමිතය .

20 වෙනි ආණ්ඩුක්‍රම ව්‍යවස්ථා සංශෝධන පනත් කෙටුම්පතට ආණ්ඩුවත් සමග ඡන්දය දුන් සමගි ජනබලවේගය මන්ත්‍රීවරුන් අතරින් එම බලවේගය නියෝජනය කරන එකම මන්ත්‍රීවරිය වන්නේ ඩයනා ගමගේ මහත්මියයි.

අන් මන්ත්‍රීවරුන් හත් දෙනා සමගි ජනබලවේගයේ සන්ධානගත පාර්ශවයන් වන ශ්‍රී ලංකා මුස්ලිම් කොංග්‍රසය, සමස්ත ලංකා මුස්ලිම් කොංග්‍රසය හා දෙමළ ප්‍රගතිශීලී පෙරමුණ නියෝජනය කරයි .

මෙම මන්ත්‍රීවරුන් 8 දෙනාම මේ වනවිට සමගි ජන බලවේග මන්ත්‍රී කණ්ඩායමෙන් ඉවත් කොට ඇති බව විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා විසින් කතානායක මහින්ද යාපා අබේවර්ධන මහතා වෙත ද දැනුම් දී තිබේ .

ඩයනා ගමගේ මන්ත්‍රීවරිය සමගි ජන බලවේගය ජාතික ලැයිස්තුවෙන් පත්වූ අතර එම පක්ෂය අයත් වන්නේ සිය ස්වාමි පුරුෂයා වන සේනක ද සිල්වා මහතාට වන බවත් තමා එම පක්ෂයේ නියෝජ්‍ය ප්‍රධාන ලේකම් බවත් ඒ නිසා තමන්ට එරෙහිව කිසිදු විනය හෝ නීතිමය පියවරක් ගැනීමට එම පක්ෂයට නොහැකි බව ඩයනා ගමගේ මහත්මිය ප්‍රසිද්ධියේම ප්‍රකාශ කොට තිබේ .

The post ඩයනාගේ පුරවැසිභාවය ප්‍රශ්ණ කරමින් සිවිල් පුරවැසියෙකු අධිකරණයට appeared first on ColomboXnews.

Source From Colomboxnews
Author: Kamal Dhammika
#SriLanka #News #lka