කුරූණෑගලදී අත්අඩංගුවට ගත් සම්පායෝ කොළඹට ගෙන එයි

අද (02) පස්වරුවේ කුරූණෑගල දී අත්අඩංගුවට ගත් මීගමුව බන්ධනාගාරයේ හිටපු අධිකාරි අනුරුද්ධ සම්පායෝ කොළඹ අපරාධ පරීක්ෂණ දෙපාර්තමේන්තුව වෙත ගෙනවිත් තිබේ. ඒ, මීගමුව මූලස්ථාන ප්‍රධාන පොලිස් පරීක්ෂක ඇතුළු කණ්ඩායමක් විසින් ලද බුද්ධි තොරතුරක් මත සිදුකළ මෙහෙයුමකිනි.

කුරුණෑගල ශාන්ත ආනා විදුහල අසළ දී අද පස්වරු 3.35 ට පමණ සැකකරු අත්අඩංගුවට ගත් බව පොලිස් මූලස්ථානය සඳහන් කළේය. අනතුරුව සැකකරුව මීගමුව පොලිස් ස්ථානය වෙත රැගෙන එනු ලැබුවේය.

මීගමුව බන්ධනාගාරයේ රැඳවියන්ට සැප පහසුකම් සැපයීම සම්බන්ධයෙන් එල්ල වී ඇති චෝදනා මත මීගමුව බන්ධනාගාරයේ හිටපු අධිකාරි අනුරුද්ධ සම්පායෝ වැඩ තහනමට ලක්ව සිටී. 

එල්ල වී ඇති චෝදනා සම්බන්දයෙන් සිදු කරන විමර්ශන ගැන අපරාධ පරීක්ෂණ දෙපාර්තමේන්තුව අධිකරණයට කරුණු වාර්තා කළේය.

ඒ අනුව, වැඩ තහනමට ලක්ව සිටින මීගමුව බන්ධනාගාරයේ හිටපු අධිකාරි අනුරුද්ධ සම්පායෝ සහ ජේලර්වරු වන සරත් බණ්ඩාර, නිශාන්ත සේනාරත්න මෙන්ම දෙවන පෙළ ජේලර් කාලිංග කළුඅග්ගල යන පුද්ගලයින් අත්අඩංගුවට ගැනීමට වරෙන්තු ලබා ගන්නැයි නීතිපති දෙපාර්තමේන්තුව පසුගිය 21 වැනිදා අපරාධ පරීක්ෂණ දෙපාර්තමේන්තුවට උපදෙස් ලබාදුන්නේය.

ඉන්පසු සම්පායෝ සහ අනෙක් නිළධාරින් තිදෙනා වහාම අත්අඩංගුවට ගෙන අධිකරණයට ඉදිරිපත් කරන ලෙස මීගමුව වැඩබලන මහෙස්ත්‍රාත් ඉන්දික සිල්වා මහතා ජුලි 22වනදා නියෝග කළේය. ඉන්පසු අනෙක් නිළධාරින් තිදෙනා බාර වු අතර ඔවුන් බන්ධනාගාර ගත කර සිටී.

අත්අඩංගුවට ගත් අවස්ථාවේ වීඩියෝව

ජොනී ඇමතිතුමාගේ නම කැතවෙන නිසා මම බාරවෙන්නෙ..

The post කුරූණෑගලදී අත්අඩංගුවට ගත් සම්පායෝ කොළඹට ගෙන එයි appeared first on ColomboXnews.