කෑගල්ලේ පැණිය පානය කල කථානායකගේ ආරක්ෂක, පෙරගමන් රියදුරු, ගෙදර සිටි පොලිසියේ SI කොවිඩ් රෝගීන්.. කථානායකත් නිරෝධායනයේ..

පසුගියදා පාර්ලිමේන්තුවටම පැමිණි කෑගල්ලේ කොරෝනා පැණිය කථානායකවරයාට බාරදුන් අතර එම පැණිය පානය කල කථානායකවරයාගේ පෙරගමන් රථයේ රියැදුරා කොවිඩ් ආසාදිතයකු බවට වාර්තා වීමත් සමඟ ඔහුගේ ආශ්‍රිතයන් කිහිපදෙනකු නිරෝධායනයට ලක්කර ඇති අතර කථානායකවරයාගේ නිල නිවෙසේ කළමනාකාරවරයා ඇතුළු කාර්ය මණ්ඩලය නිරෝධායනයට යොමු කර ඇතැයි පාර්ලිමේන්තුවේ වේත්‍රධාරි නරේන් ප්‍රනාන්දු පැවැසුවා.

කථානායක ආරක්ෂක නිලධාරියකු කොවිඩ් ආසාදිතව පාර්ලිමේන්තුව තුළ සැරිසැරූ බවට තොරතුරු අනාවරණය වීම නිසා කථානායක මහින්ද යාපා අබේවර්ධන තමා විසින්ම ස්වයං නිරෝධායනය වී සිටිනවා.

නිල නිවෙසේ රාජකාරියේ යෙදී සිටි උප පොලිස් පරීක්ෂකවරයකුද ආසාදනය වී ඇතැයි වාර්තා වනවා.

ආසාදිත වූ අය සමඟ සිට ඇති ළඟම ආශ්‍රිතයන් දෙදෙනකු පාර්ලිමේන්තුවේ සෝපානයක ගමන් කර ඇති අතර එක් අයකු තැපැල් කාර්යාලයටද ගොස් ඇති බව ආරක්ෂක කැමරා පරීක්ෂා කිරීමේදී සොයාගෙන තිබෙනවා.

කාර්ය මණ්ඩලයේ පිරිසක් මේ වනවිටත් PCR පරීක්ෂණවලට භාජන කර ඇති අතර එම පිරිසට තවත් දින 10කින් යළිත් PCR පරීක්ෂණ සිදුකෙරෙන බව සඳහන් කළ වේත්‍රධාරිවරයා, කථානායක කාර්ය මණ්ඩලයේ රියැදුරකු පාර්ලිමේන්තුවේ කාර්ය මණ්ඩල ආපනශාලාවටද ගොස් ඇති බව සඳහන් කරනවා.

කථානායකවරයාගේ කාර්ය මණ්ඩලයේ තවත් 20 දෙනකුට හෙට (31දා) PCR පරීක්ෂණ සිදුකිරීමට නියමිතව ඇතැයි හෙතෙම පැවසුවා.

ආසාදිත පුද්ගලයන් ඇසුරු කළ අයට සහ පාර්ලිමේන්තුවේ කාර්ය මණ්ඩලවලට අයත් පිරිසකටද පාර්ලිමේන්තුවට පැමිණීමෙන් වළකින ලෙස දැනුම් දී ඇති බවද නරේන් ප්‍රනාන්දු මහතා පැවැසුවා.

මෙම පුද්ගලයන් ආගිය සෑම ස්ථානයක්ම විසබීජහරණය කළ බව සඳහන් කළ නරේන් ප්‍රනාන්දු මහතා, තැපැල් කාර්යාලයද වැසීමට සිදුවන බව සඳහන් කළා.

The post කෑගල්ලේ පැණිය පානය කල කථානායකගේ ආරක්ෂක, පෙරගමන් රියදුරු, ගෙදර සිටි පොලිසියේ SI කොවිඩ් රෝගීන්.. කථානායකත් නිරෝධායනයේ.. appeared first on ColomboXnews.

Source From Colomboxnews
Author: Kamal Dhammika
#SriLanka #News #lka