කවද්ද දුමින්ද සිල්වා එළියට එන්නෙ ? අපි බලාගෙන ඉන්නවා – පොහොට්ටුවේ තරුණ සංගමය

මරණීය දණ්ඩනය නියම වී සිටින හිටපු පාර්ලිමේන්තු මන්ත්‍රී දුමින්ද සිල්වා මහතා නිදහස් වන්නේ කවදාද, දේශපාලන පළිගැනීම්වලට ලක්වූ සෙසු පාක්ෂිකයින්ට සාධාරණය ඉටුවන්නේ කවදාද යන්න පිළිබඳව තමන් මගබලා සිටින බව ශ්‍රී ලංකා පොදුජන තරුණ සංගමයේ බුද්ධික වික්‍රමාදර මහතා පවසයි. 

“දේශපාලන පළිගැනීම් වලට ලක්වෙච්ච ජනතාවක් හිටියා, ඔවුන්ට සාධාරණය ඉටුවෙන්නෙ කවද්ද ? මේ පිළිබඳවත් පොදුජන පෙරමුණ විදියට අපි බලාගෙන ඉන්නවා. වෙන ආණ්ඩුවක් තිබ්බා නම් ඔවුන් දන්නවා කොහොමද කටයුතු කරන්නෙ කියලා. 

අරලියගහ මන්දිරයට ගියා, අනුර දිසානායක මැතිතුමාට එන්න කිව්වා, අනෙකුත් පක්ෂවල කණ්ඩායම්වලට එන්න කිව්වා, කොහොමද දේශපාලන විරුද්ධවාදීන්ගෙන් පළිගන්නෙ කියන එක ඒගොල්ලො පැහැදිලිව කරනවා. උසාවි වලට දුරකථනයෙන් කතා කරනවා, රංජන් රාමනායක මහත්තයා හිටියා දුරකථනයෙන් කතා කරන්න උසාවි වලට. මේ විදියට වැරදි තොරතුරු ලබාදීලා මිනිස්සුන්ව දඬුකඳේ ගහන ජරාසම්පන්න ආණ්ඩුවක් තමයි තිබ්බෙ. නමුත් මේ ආණ්ඩුව එහෙම කරන්න යන්නෙ නෑ. 

තවමත් කොයිතරම් ප්‍රමාණයක් සිරගත වෙලා ඉන්නවද ? ඔවුන්ට නිදහස හිමිවෙන්නෙ කවද්ද ? නිර්දෝෂී මිනිස්සු ඇයි කිසිම හෙවිල්ලක් බැලිල්ලක් නැතිව හිරේ දාලා තියෙන්නෙ ? දේශපාලන පළිගැනීම්වලට ලක්වුණාම සමහර අයට රැකියාවල් නැතිවුණා, සමහර අයට රැකියා ස්ථානයේ මාරුවීම් සිද්ධ වුණා, සමහර අයට රැකියාව එපාවෙන තැනට පත්කරලා තියෙනවා. මේ සියල්ලට සාධාරණය ඉටුවිය යුතුයි කියන එක විශ්වාස කරනවා. 

කවද්ද දුමින්ද එළියට එන්නෙ, කවද්ද ඔවුන් එක්ක වැඩකරපු නිවැරදිකරුවන් එළියට එන්නෙ, කවද්ද දේශපාලන පළිගැනීම්වලට ලක්වුණු ගුරුවරුන්ට නිදහස ලැබෙන්නෙ, කවද්ද රාජ්‍ය සේවකයින්ට නිදහස ලැබෙන්නෙ ? ඔවුන් කරපු වැරැද්ද මොකද්ද ? මේ රට විනාශ වෙන්න වැඩකරපු ආණ්ඩුවක් ගෙදර යවන්න මේ රට ගැන හිතන ආණ්ඩුවක් ගේන එක වැරදිද ? ඔවුන් ඒ වෙනුවෙන් කටයුතු කරපු එක වැරදිද කියලා මං අහන්න කැමතියි” යනුවෙනුයි ඒ මහතා සඳහන් කළේ. 

බුද්ධික වික්‍රමාදර මහතා මේ බව පැවසුවේ ඊයේ (30) ශ්‍රී ලංකා පොදුජන පෙරමුණු මූලස්ථානයේ පැවති මාධ්‍ය හමුවක් අමතමිනි. 

The post කවද්ද දුමින්ද සිල්වා එළියට එන්නෙ ? අපි බලාගෙන ඉන්නවා – පොහොට්ටුවේ තරුණ සංගමය appeared first on ColomboXnews.