එජාප නව නායකයා පත්කර ගැනීම අද – නායකත්වය රුවන්ට යන ලකුණු

එක්සත් ජාතික පක්ෂයේ නව නායකයා තෝරා  ගැනීම අද දින සිරිකොතේදී පැවැත්වෙන කෘත්‍යාධිකාරී මණ්ඩල රැස්වීමේදී සිදුවනු ඇතැයි වාර්තා වෙයි. 

මීට පෙර අවස්ථා කිහිපයකම නව නායකත්වය ගැන සාකච්ජා කර තිබුණද අවසන් තීන්දුවකට පැමිණීමට හැකිව තිබුණේ නැහැ. 

කෙසේවෙතත් නායකත්වය සඳහා එජාප ඉදිරි පෙළ නම් කිහිපයක්ම යෝජනා වී තිබෙන අතර ස්වාධීනව ඉදිරිපත් වූ කිහිප දෙනෙක්ද වෙයි. 

ඒ අනුව එක්සත් ජාතික පක්ෂයේ මහ ලේකම් අකිල විරාජ් කාරියවසම්, වජිර අබේවර්ධන, දයා ගමගේ,නවීන් දිසානායක, රුවන් විජේවර්ධන, අර්ජුන රණතුංග යන කිහිප දෙනෙක්ම එජාප නව නායකත්වය භාර ගැනීම සඳහා සූදානමින් පසුවෙයි. 

මේ අතර සමඟි ජන බලවේගයේ පාර්ලිමේන්තු මන්ත්‍රී තිස්ස අත්තනායක මහතා පැවසුවේ එජාපය යළි නගා සිටුවීමට නම් එම නායකත්වය සජිත් ප්‍රේමදාස මහතාට භාර දිය යුතු බවයි. 

එමෙන්ම එක්සත් ජාතික පක්ෂය යළි ගොඩනැංවීම සඳහා තමන් සූදානම් අතර එජාප නායකත්වය භාරගැනීමට හිටපු කථානායක කරු ජයසූරිය මහතාද කැමැත්ත පළ කර තිබුණි. 

එහෙත් මේ වන විට වාර්තා වන පරිදි සියලු යෝජනා හා ඉදිරිපත් වීම අභිබවා රුවන් විජේවර්ධන මහතා එජාප නායකත්වයට පත් කිරීමට වත්මන් නායකත්වය විසින් සූදානමින් පසුවන බවයි. 

නව නායකයා පත්කර ගැනීමෙන් පසු ජාතික ලැයිස්තුවෙන් හිමි එකම මන්ත්‍රීධූරය සඳහා නම් කිරීම සිදුකරනු ඇති බවද සඳහන් වේ. 

The post එජාප නව නායකයා පත්කර ගැනීම අද – නායකත්වය රුවන්ට යන ලකුණු appeared first on ColomboXnews.