ඇමති ජනක බණ්ඩාරත් පුද්ගල ඝාතන නඩුවකින් බේරෙයි

ජනක බණ්ඩාර තෙන්නකෝන් ඇමතිවරයාට එරෙහිව පුද්ගල ඝාතනයක් සම්බන්ධයෙන් මහනුවර මහාධිකරණය හමුවේ ගොනුකර තිබූ අධිචෝදනා පත්‍රයක් ශුන්‍ය කිරීමට අභියාචනාධිකරණය අද(20) තීරණය කළේය. 

1999 වර්ෂයේ මහනුවර මහවෙල ප්‍රදේශයේ සිදු වූ පුද්ගල ඝාතනයක් සම්බන්ධයෙන් 2015 වසරේදී ජනක බණ්ඩාර තෙන්නකෝන් මහතාට මෙම චෝදනා එල්ල කර තිබිණි. අදාල නඩුව මහනුවර මහාධිකරණයේ විභාග වෙමින් තිබිණි.

මෙම නඩුවට එරෙහිව අභියාචනාධිකරණය හමුවේ පෙත්සමක් ගොනුකර තිබූ අතර එම පෙත්සම, අභියාචනාධිකරණයේ සභාපති විනිසුරු ඒ.එච්.එම්.ඩී. නවාස් සහ සෝභිත රාජකරුණා යන මහත්වරුන්ගෙන් සමන්විත ද්විපුද්ගල විනිසුරු මඩුල්ලක් හමුවේ විභාගයට ගැනිණි. තෙන්නකෝන් මහතා සිය පෙත්සමෙන් කියා සිටියේ 1999 වසරේ සිදු වූ ඝාතනයක් සම්බන්ධයෙන් 2015 වසරේදී නඩු පැවරීම දේශපාලනිකව පළිගැනීමේ අරමුණින් සිදුවූවක් බවයි.

විනිසුරු මඩුල්ල අද මෙම පෙත්සමේ තීන්දුව ප්‍රකාශයට පත් කරමින් ජනක බණ්ඩා රතන්නකෝන් මහතාට එරෙහිව ගොනුකර තිබූ අධි චෝදනා පත්‍රය ශුන්‍ය කිරීමට නියම කළේය.

The post ඇමති ජනක බණ්ඩාරත් පුද්ගල ඝාතන නඩුවකින් බේරෙයි appeared first on ColomboXnews.