අත්අඩංගුවට ගැනීම වලක්වන්නැයි ඉල්ලා රියාජ් බදුර්දීන්ගෙන් අභියාචනාධිකරණය රීට් පෙත්සමක්

තමන් යළිත් අත්අඩංගුවට ගැනීමට සූදානමක් පවතින බැවින්, අත්අඩංගුවට ගැනීම වළක්වන නියෝගයක් නිකුත් කරන්නැයි ඉල්ලා රියාජ් බදියුදීන් මහතා අභියාචනාධිකරණය හමුවේ රීට් පෙත්සමක් ගොනුකර තිබෙනවා.

වැඩබලන පොලිස්පතිවරයා, අපරාධ පරීක්ෂණ දෙපාර්තමේන්තුව භාරව සිටි හිටපු නියෝජ්‍ය පොලිස්පති නුවන් වෙදසිංහ මහතා, අපරාධ පරීක්ෂණ දෙපාර්තමේන්තුවේ අධ්‍යක්ෂක ප්‍රසන්න ද අල්විස් මහතා, පොලිස් පරීක්ෂක මිහිඳු අබේසිංහ මහතා ඇතුළු පුද්ගලයන් හත් දෙනෙකු පෙත්සමේ වගඋත්තරකරුවන් ලෙස නම්කර තිබේ.

පෙත්සම්කරු සිය පෙත්සම ඉදිරිපත් කරමින් කියා සිටින්නේ අප්‍රේල් 14 වැනිදා අත්අඩංගුවට ගත් තමාගෙන් පාස්කු ප්‍රහාරය සම්බන්ධයෙන් දිගින් දිගටම ප්‍රශ්න කළ බවයි. තමන්ට අයත් ව්‍යාපාර, නිවාස, දේපළ, බැංකු ගිණුම් ආදිය පිළිබඳව සිදුකළ දීර්ඝ විමර්ශනයෙන් පසු කිසිදු චෝදනාවක් තහවුරු කර ගැනීමට සාක්ෂි අනාවරණය නොවීම හේතුවෙන් තමන් මුදා හැරි බවද ඔහු පවසනවා.

එසේ තිබියදී මැති ඇමතිවරුන්, දේශපාලනඥයන් ඇතුළු විවිධ පාර්ශ්ව තමන්ව අත්අඩංගුවට ගැනීම සඳහා බලපෑම් සිදු කරන බවත්, දේශපාලන හේතූන් මත තමන්ව අත්අඩංගුවට ගැනීමේ සූදානමක් පවතින බවත් පෙන්වා දෙන පෙත්සම්කරු අධිකරණයෙන් ඉල්ලා සිටින්නේ අත්අඩංගුවට ගැනීමට එරෙහිව නියෝගයක් නිකුත් කරන ලෙසයි.

The post අත්අඩංගුවට ගැනීම වලක්වන්නැයි ඉල්ලා රියාජ් බදුර්දීන්ගෙන් අභියාචනාධිකරණය රීට් පෙත්සමක් appeared first on ColomboXnews.