අඩක් භාවිත කළ ගෑස් සිලින්ඩර් ගෙවීම් සිදුකර නැවත බාරගන්න – අධිකරණයෙන් ගෑස් සමාගම්වලට නියෝගයක්

අඩක් භාවිත කළ ගෑස් සිලින්ඩර් ආපසු භාර ගැනීම සම්බන්ධයෙන් ජනතාව දැනුවත් කරන නිවේදන අද සිට ම විද්‍යුත් මාධ්‍ය ඔස්සේ පළ කිරීමට පියවර ගන්නා ලෙස පාරිභෝගික සේවා අධිකාරියට අද (ජන. 26) අභියාචනාධිකරණය නියෝග කළේ ය.

එහිදී පාරිභෝගික සේවා අධිකාරිය වෙනුවෙන් පෙනී සිටි රජයේ නීතිඥ මනෝහර ජයසිංහ මහතා අධිකරණයට දැනුම් දුන්නේ, ඒ පිළිබඳ පුවත්පත් නිවේදන අද පුවත්පත්වල පළ කර ඇති බව ය.

දිවයින පුරා වාර්තා වන ගෑස් උඳුන් පිපිරී යාමේ සිද්ධි සම්බන්ධයෙන් පරීක්ෂණයක් පවත්වන ලෙස ඉල්ලා ඉදිරිපත් කරන ලද පෙත්සම කැඳවූ අවස්ථාවේදී අධිකරණය මෙම නියෝගය නිකුත් කළේ ය. 

අදාළ පෙත්සම රුවන් ප්‍රනාන්දු සහ සම්පත් අබේකෝන් යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.

භාවිත කරන ලද ගෑස් සිලින්ඩර් ඉතිරි ප්‍රමාණයට ගෙවීමක් ද සිදු කර නැවත භාර ගැනීමට කටයුතු කරන ලෙස ඉකුත් වසරේ දෙසැම්බර් මස 17 වන අභියාචනාධිකරණය පාරිභෝගික සේවා අධිකාරියට නියෝග කර තිබිණි.

The post අඩක් භාවිත කළ ගෑස් සිලින්ඩර් ගෙවීම් සිදුකර නැවත බාරගන්න – අධිකරණයෙන් ගෑස් සමාගම්වලට නියෝගයක් appeared first on ColomboXnews.